ຟອມດີຕໍ່ເນື່ອງ U16 ລາວ ຊະນະ ຮົງກົງ 3-1
ທ້າຍອາທິດຜ່ານມາ ນັກກິລາທີມຊາດຍິງ U16 ລາວ ລົງສະໜາມຄັ້ງທີ 3 ຍັງສາມາດໂຊຟອມການຫລິ້ນດີ ໂດຍການເອົາ ຊະນະ ຮົງກົງ ໄດ້ແບບຂາດລອຍ 3-1 ໃນການແຂ່ງຂັນບານເຕະຍິງ ຊີງແຊ້ມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກ 2019 AFC U-16 WOMEN’S CHAMPIONSHIP 2019 ທີ່ປະເທດມົງໂກລີ ໃນລະຫວ່າງວັນທີ 15-23 ກັນຍາ 2018.
ທີມຊາດລາວ ໄດ້ປະຕູຈາກນາງ ແສງເດືອນ ພົງໄພລາດ ນາທີ 49 ແລະ ນາງ ອິນທິດາ ຄູນສີ ນາທີ 78 ສ່ວນປະຕູທີ 3 ໄດ້ຈາກນາງ ໃຈຄໍາ ໃນນາທີ 86. ຂະນະທີ່ ທີມຊາດຮົງກົງ ມາໄດ້ປະຕູຕີໄຂ່ແຕກໃນເວລາທົດບາດເຈັບ ຈາກຜູ້ຫລີ້ນໝາຍເລກ 9 SHIKAWA KARIN ນາທີ 90+5 ຈົບເກມ ທີມຊາດລາວ ສາມາດເອົາຊະນະ ທີມຊາດຮົງກົງ ໄດ້ 3-1 ສົ່ງຜົນໃຫ້ທີມຊາດລາວ ຢູ່ອັນດັບທີ 2 ຂອງກຸ່ມ ຈາກການລົງສະໜາມ 3 ຄັ້ງ ຊະນະ3 ຄັ້ງ ລວມມີ 9 ຄະແນນ.
ການແຂ່ງຂັນເຕະບານຍິງ ຊີງແຊ້ມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກ 2019 AFC U-16 WOMEN’S CHAMPIONSHIP 2019 ທີ່ປະເທດມົງໂກລີ ທີມຊາດລາວ ຢູ່ຮ່ວມກຸ່ມບີ ປະກອບມີ : ອິນເດຍ, ຮົງກົງ, ປາກິດສະຖານ ແລະ ມົງໂກລີ (ເຈົ້າພາບ).
ສໍາລັບຕາຕະລາງການແຂ່ງຂັນ ຂອງທີມຊາດລາວຈະລົງສະໜາມອີກ 1 ຄັ້ງຄື: ວັນທີ 23 ກັນຍາ ເວລາ 17:00 ໂມງ ພົບ ອິນເດຍ
