ສະພາປະຊາຊົນນະຄອນໂຮ່ຈິມິນ ແລະ ບັນດາສະພາປະຊາຊົນຂັ້ນແຂວງຂອງລາວ ຮ່ວມແລກປ່ຽນບົດຮຽນ

ສະຖາບັນຄົ້ນຄວ້ານິຕິກໍາສະພາແຫ່ງຊາດ ແລະ ສະພາປະຊາຊົນແຂວງຕ່າງໆຂອງລາວໄດ້ຮ່ວມກັບ ສະພາປະຊາຊົນນະຄອນໂຮ່ຈິມິນ, ຈັດກອງປະຊຸມສຳມະນາແລກປ່ຽນບົດຮຽນ ລະຫວ່າງວຽກງານຕ່າງໆນໍາກັນ, ຂຶ້ນໃນວັນທີ 20 ກັນຍານີ້, ທີ່ນະຄອນປາກເຊ ແຂວງຈໍາປາສັກ, ໂດຍການເປັນປະທານຮ່ວມຂອງທ່ານ ຄຳເຜີຍ ປານມະໄລທອງ ຫົວໜ້າສະຖາບັນນິຕິກຳສະພາແຫ່ງຊາດ ແລະ ທ່ານ ເມກສະຫວັນ ພົມພິທັກ ຮອງເລຂາພັກແຂວງ, ປະທານສະພາປະຊາຊົນແຂວງຈໍາປາສັກ ແລະ ທ່ານ ນາງ ຫງວຽນ ທິ ກວຽດ ເຕິມ ປະທານສະພາປະຊາຊົນນະຄອນໂຮ່ຈີມິນ; ມີຜູ້ຕາງໜ້າສະພາປະຊາຊົນ ບໍລິຄໍາໄຊ, ສະຫວັນະເຂດ, ຄໍາມ່ວນ, ໄຊສົມບູນ ເຂົ້າຮ່ວມ 138 ທ່ານ.

ໃນກອງປະຊຸມ, ທ່ານ ຄຳເຜີຍ ປານມະໄລທອງ ໄດ້ມີຄໍາເປັນວ່າ: ໂດຍສືບຕໍ່ເສີມຂະຫຍາຍສາຍພົວພັນ ມິດຕະພາບອັນເປັນ ມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ, ໂດຍສະເພາະລະຫວ່າງສະພາແຫ່ງຊາດລາວ-ຫວຽດນາມ ທີ່ໄດ້ລົງນາມໃນວັນທີ 6 ມີນາ 2017, ຄະນະຜູ້ແທນສະພາປະຊາຊົນ ນະຄອນໂຮ່ຈິມິນ ສສ.ຫວຽດນາມ ໄດ້ເດີນທາງມາຢ້ຽມຢາມ ແລະ ຈັດກອງປະຊຸມ ສໍາມະນາ ຮ່ວມກັບບັນດາສະຫາຍ ທີ່ເປັນເສນາທິການໃຫ້ສະພາປະຊາຊົນຂັ້ນແຂວງຂອງລາວ ພາຍຫຼາຍໄດ້ຮັບການສ້າງຕັ້ງຂຶ້ນ ໃນກາງປີ 2016 ແລະຕ່າງກໍໄດ້ເອົາໃຈໃສ່ປະຕິບັດພາລະບົດບາດ, ສິດ ແລະ ໜ້າທີ່ ທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ ຊຶ່ງໄດ້ມີຜົນງານ ແລະ ຜົນສໍາເລັດຫລາຍດ້ານ  ແຕ່ເຖິງຢ່າງໃດກໍຕາມການປະຕິບັດໜ້າທີ່ໃນວຽກງານດັ່ງກ່າວ ຍັງມີບາງດ້ານບໍ່ທັນມີປະສິດທິພາບສູງ ຊຶ່ງຕ້ອງໄດ້ປັບປຸງ ແລະ ຕ້ອງຫັນປ່ຽນໃຫ້ດີຂຶ້ນຕື່ມອີກ. ພວກເຮົາຖືວ່າການສຳມະນາຄັ້ງນີ້ຈະເປັນໂອກາດດີອັນໜຶ່ງ ເພື່ອເປັນຂໍ້ມູນທາງທິດສະດີ ແລະ ພຶດຕິກໍາ ໃນການປັບປຸງວຽກງານຕົວຈິງຂອງພວກເຮົາໃນຕໍ່ໜ້າ.

ກອງປະຊຸມໄດ້ຮັບຟັງການສະເໜີບົດຮຽນຂອງສະພາປະຊາຊົນນະ ຄອນໂຮ່ຈິມິນ ກ່ຽວກັບປະສົບການໃນການຄົ້ນຄວ້າ ແລະ ພິຈາລະນາຮັບຮອງເອົາ ແຜນງົບປະມານຂອງທ້ອງຖິ່ນ, ປະສົບການໃນການນໍາໃຊ້ຜົນຂອງການກວດສອບແຫ່ງລັດ ຂອງສະພາປະຊາຊົນນະຄອນໂຮ່ຈິມິນ, ປະສົບການໃນການຄົ້ນຄວ້າ ແລະ ຮັບຮອງເອົາຕົວເລກ GDP ແລະ ປະສົບການໃນການພິຈາລະນາຄົ້ນຄວ້າ ແລະ ຮັບຮອງເອົາແຜນພັດທະນາເສດຖະກິດ-ສັງຄົມຂອງ ນະຄອນໂຮ່ຈີມິນ; ພ້ອມນັ້ນ, ຜູ້ເຂົ້າຮ່ວມໄດ້ສຸມສະຕິປັນຍາຮັບຟັງການສະເໜີບົດຮຽນທັງແລກປ່ຽນຄວາມຄິດຄວາມເຫັນໃນຫຼາຍປິເດັນຢ່າງມີຜົນສໍາເລັດ. ກອງປະຊຸມດັ່ງກ່າວ ເປັນການປະກອບສ່ວນສໍາຄັນຂອງຫວຽດນາມ ເພື່ອແບ່ງປັນຄວາມຮູ້ກ່ຽວກັບການເຄື່ອນໄຫວວຽກງານສະພາປະຊາຊົນທ້ອງຖິ່ນ ນັບທັງດ້ານເນື້ອໃນ, ດ້ານງົບປະມານ ແລະ ອື່ນໆ ແກ່ການດໍາເນີນກອງປະຊຸມຄັ້ງນີ້.

ໃນໂອກາດດຽວກັນ ທ່ານປະທານສະພາປະຊາຊົນນະຄອນໂຮ່ຈິມິນ ພ້ອມດ້ວຍຄະນະຍັງໄດ້ຢ້ຽມຢາມ ແລະ ມອບຂວງຂວັນ ໃຫ້ໂຮງຮຽນມິດຕະພາບລາວ-ຫວຽດນາມ, ມອບເງິນຊ່ວຍເຫລືອໃຫ້ຄອບຄົວຜູ້ທຸກຍາກຂາດເຂີນຂອງແຂວງຈໍາປາສັກ 21 ຄອບຄົວ ແລະ ຜູ້ຖືກຜົນກະທົບໄພນໍ້າຖ້ວມຢູ່ແຂວງອັດຕະປືອີກຈໍານວນໜຶ່ງ.