ຝຣັ່ງສືບຕໍ່ສະໜັບສະໜູນວຽກງານປົກປັກຮັກສາຊີວະນາໆພັນໃນລາວ-ກໍາປູເຈຍ- ມຽນມາ

ອົງການຝຣັ່ງເພື່ອການພັດທະນາ (AFD) ຮ່ວມກັບ ກອງທຶນຝຣັ່ງເພື່ອສິ່ງແວດລ້ອມໂລກ (FFEM) ແລະ ອົງການອະນຸລັກສັດປ່າ (WCS) ສືບຕໍ່ຮ່ວມມືສະໜັບສະໜູນບັນດາ ກິດຈະກຳ ການອະນຸລັກປ່າສະຫງວນ 6 ແຫ່ງ ທີ່ມີລະບົບຊີວະນາໆພັນທີ່ຫລາກຫລາຍ ແລະ ອຸດົມຮັ່ງມີ, ໂດຍໄດ້ແບ່ງອອກ ເປັນ 14 ເຂດປ່າສະຫງວນໃນລາວ, ກຳປູເຈຍ ແລະ ມຽນມາ. ການຕົກລົງດັ່ງກ່າວ, ໄດ້ມີຂຶ້ນໃນວັນທີ 19 ກັນຍານີ້, ທີ່ເຮືອນພັກທູດຝຣັ່ງທີ່ ນະຄອນຫລວງວຽງຈັນ ລະຫວ່າງທ່ານນາງ Florence Jeanblanc-Risler ເອກອັກຄະລັດຖະທູດຝຣັ່ງປະຈຳລາວ, ທ່ານ Matthieu Bommier ຫົວໜ້າຫ້ອງການອົງການຝຣັ່ງເພື່ອການພັດທະນາ (AFD) ປະຈຳລາວ ແລະ ທ່ານ ດຣ. Christopher Holmes ຜູ້ອໍານວຍການ ຂອງອົງການອະນຸລັກສັດປ່າປະຈໍາລາວ, ມີທ່ານ ຄໍາບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະ ປ່າໄມ້ເຂົ້າຮ່ວມນໍາດ້ວຍ.

ທຶນການຊ່ວຍເຫລືອຄັ້ງນີ້, ມີທັງໝົດ 8,1 ລ້ານເອີໂຣ ຫລື ປະມານ 80 ຕື້ກີບ, ໃນນີ້ ຈາກອົງການຝຣັ່ງເພື່ອການພັດທະນາ (AFD) ຈຳນວນ 3 ລ້ານເອີໂຣ, ກອງທຶນຝຣັ່ງເພື່ອສິ່ງແວດລ້ອມໂລກ (FFEM) ຈຳນວນ 1,1 ລ້ານເອີໂຣ ແລະ ອົງການອະນຸລັກສັດປ່າ (WCS) ຈຳນວນ 4 ລ້ານເອີໂຣ ເພື່ອສະໜັບສະໜູນໂຄງການອະນຸລັກຊີວະນາໆພັນ ແລະ ການເຕີບໂຕສີຂຽວຢູ່ໃນເຂດຊີວະນາໆພັນອິນດູ-ເບີມ້າ. ໂຄງການນີ້, ຈະແກ້ໄຂບັນດາຍຸດທະສາດ ທີ່ກໍານົດໄວ້ໃນປະເທດລາວແຜນປະຕິບັດງານດ້ານຊີວະນາໆພັນ ແລະ ແຜນການປະຕິບັດງານທີ່ມີຈຸດປະສົງ ເພື່ອເສີມຂະຫຍາຍບົດບາດຂອງຊີວະນາໆພັນເປັນມໍລະດົກແຫ່ງຊາດ ແລະ ເປັນການປະກອບສ່ວນ ໃຫ້ແກ່ການຫລຸດຜ່ອນຄວາມທຸກຍາກ ແລະ ການເຕີບໂຕຂອງເສດຖະກິດທີ່ຍືນຍົງ.

ໂຄງການດັ່ງກ່າວ, ຈະເນັ້ນໃສ່ 5 ອົງປະກອບທີ່ສໍາຄັນ ເຊັ່ນ: ວິທີການຄຸ້ມຄອງພູມສັນຖານປະສົມປະສານ, ການພັດທະນາຂອງວິສາຫະກິດ ທີ່ນໍາໄປສູ່ຊຸມຊົນທີ່ເປັນມູນຄ່າການອະນຸລັກຊີວະນາໆພັນ, ການປັບປຸງການປະຕິບັດ ການຄ້າສໍາລັບການຂະຫຍາຍຕົວສີຂຽວ, ສົ່ງເສີມການນໍາໃຊ້ສິ່ງແວດລ້ອມ – ສັງຄົມ ແລະ ການຄຸ້ມຄອງມາດຕະຖານປົກປ້ອງ, ການສື່ສານ ແລະ ການແລກ ປ່ຽນປະສົບການຕ່າງໆອີກດ້ວຍ.