ໂຄງການ KUBOTA ປັນນໍ້າໃຈໃຫ້ນ້ອງ ປີ 4

ບໍລິສັດ KUBOTA Lao Sole Ltd ໄດ້ຈັດພິທີມອບອຸປະກອນການຮຽນໃຫ້ເດັກນ້ອຍ ແລະ ເຍົາວະຊົນລາວທົ່ວປະເທດ ພາຍໃຕ້ “ໂຄງການ KUBOTA ປັນນໍ້າໃຈໃຫ້ນ້ອງ” (KUBOTA SharingTheFuture) ປີທີ 4 ຂຶ້ນໃນວັນທີ 19 ກັນຍານີ້, ທີ່ມະຫາວິທະຍາໄລແຫ່ງຊາດ, ເພື່ອປະກອບສ່ວນໃນການພັດທະນາ ແລະ ຕອບແທນສັງຄົມ, ມຸ່ງຫວັງໃຫ້ເດັກນ້ອຍ ແລະ ເຍົາວະຊົນລາວ ໄດ້ມີອຸປະກອນການຮຽນ ແລະ ມີຄຸນນະພາບຊີວິດດີຂຶ້ນ. ໂດຍການເຂົ້າຮ່ວມຂອງທ່ານ ນາງ ຂັນທະລີ ສິລິພົງພັນ ຫົວໜ້າຫ້ອງການກະຊວງສຶກສາທິການ ແລະ ກິລາ, ມີທ່ານ ສົມບູນ ຈິນຕະະນາຜົນ ຜູ້ຊ່ວຍກໍາມະການຜູ້ຈັດການໃຫຍ່ ຜູ້ຈັດການທົ່ວໄປ ສາຍງານຂາຍ ແລະ ບໍລິການ ບໍລິສັດສະຫຍາມຄູໂບຕ້າ ຄອບປໍເລຊັ່ນ ຈໍາກັດ ພ້ອມດ້ວຍຄະນະຜູ້ບໍລິຫານ ບໍລິສັດຄູໂບຕ້າ  ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ສົມບູນ ຈິນຕະນາຜົນ ໃຫ້ຮູ້ວ່າ: ຕະຫຼອດໄລຍະຂອງການເຮັດທຸລະກິດ KUBOTA Lao Sole Ltd ໄດ້ເຫັນເຖິງຄວາມສໍາຄັນຂອງການສຶກສາ ເພາະເປັນພື້ນຖານຂອງການພັດທະນາປະເທດໃຫ້ກ້າວໄປໜ້າຢ່າງໝັ້ນຄົງ ແລະ ເຍົາວະຊົນຄືພະລັງສໍາຄັນໃນການພັດທະນາສັງຄົມ ແລະ ປະເທດຊາດ, ດັ່ງນັ້ນ, ຈຶ່ງໄດ້ຈັດໂຄງການເພື່ອສະໜັບສະໜູນດ້ານການສຶກສາທັງພາຍໃນ ແລະ ຕ່າງປະເທດມາໂດຍຕະຫຼອດ ເຊັ່ນດຽວກັບໂຄງການ “KUBOTA ປັນນໍ້າໃຈໃຫ້ນ້ອງ” ທີ່ຈັດຂຶ້ນໃນລາວຕໍ່ເນື່ອງມາເປັນປີທີ 4 ເພື່ອມອບອຸປະກອນການຮຽນໃຫ້ກັບເຍົາວະຊົນທຸກຍາກໃນເຂດຊົນນະບົດຫ່າງໄກສອກຫຼີກ ເພື່ອໃຫ້ມີກໍາລັງໃຈສຶກສາຮໍ່າຮຽນທີ່ຈະຮຽນ ມີຄຸນນະພາບຊີວິດທີ່ດີໃນອະນາຄົດ. ຈາກຄວາມສໍາເລັດຂອງໂຄງການດັ່ງກ່າວໃນ 3 ປີຜ່ານມາ ເຫັນວ່າອຸປະກອນການຮຽນທີ່ໄດ້ມອບໃຫ້ນັກຮຽນໄປນັ້ນ ມີສ່ວນຊ່ວຍພັດທະນາສັກກະຍະພາບການຮຽນ ແລະ ເປັນກໍາລັງໃຈໃຫ້ແກ່ເດັກນ້ອຍໄດ້ ແລະ ຍັງມີຫຼາຍພື້ນທີ່ໃນລາວ ທີ່ຕ້ອງການໃຫ້ບໍລິສັດເຂົ້າໄປຊ່ວຍເຕີມເຕັມໂອກາດດ້ານການສຶກສາຢູ່, ໃນປີນີ້, ຈຶ່ງໄດ້ສືບຕໍ່ຈັດໂຄງການດັ່ງກ່າວຂຶ້ນອີກຄັ້ງ ໂດຍໄດ້ຮັບຄວາມຮ່ວມມືຈາກ ກົມອະນຸບານ ແລະ ປະຖົມສຶກສາ ກະຊວງສຶກສາທິການ ແລະ ກິລາ ສົ່ງມອບອຸປະກອນການຮຽນລວມທັງໝົດ 13.000 ຊຸດ ລວມມີມູນຄ່າ 500 ລ້ານກີບ ເພື່ອຂະຫຍາຍໂອກາດໃຫ້ເດັກນ້ອຍ  ແລະ ເຍົາວະຊົນໃນຕ່າງແຂວງຂອງລາວ ໄດ້ຮັບອຸປະກອນການຮຽນຢ່າງທົ່ວເຖິງ.

ພ້ອມນີ້ໂຄງການ “KUBOTA ປັນນໍ້າໃຈໃຫ້ນ້ອງ” ຍັງມີແຜນທີ່ຈະສົ່ງມອບອຸປະກອນການຮຽນໃຫ້ກັບເດັກນ້ອຍ ແລະ ເຍົາວະຊົນ ໃນບັນດາປະເທດອ້ອມຂ້າງທັງໝົດ 49.000 ຊຸດ, ໃນນັ້ນ, ປະເທດລາວ ຈໍານວນ 13.000 ຊຸດ, ກໍາປູເຈຍ ຈໍານວນ 20.000 ຊຸດ ແລະ ມຽນມາ ຈໍານວນ 16,000 ຊຸດ, ສະເພາະລາວມີ ແຂວງເປົ້າໝາຍຄື: ສະຫວັນນະເຂດ, ບໍລິຄໍາໄຊ ແລະ ແຂວງຈໍາປາສັກ. ນອກນີ້, ຍັງມີໂຄງການອື່ນໆທີ່ກ່ຽວຂ້ອງກັບການຕອບແທນສັງຄົມອີກດ້ວຍ ທັງໃນດ້ານການພັດທະນາຊຸມຊົນ ແລະ ສັງຄົມ ລວມເຖິງການສຶກສາ ແລະ ເຍົາວະຊົນ ເຊັ່ນ: ໂຄງການ KUBOTA Education Center (KTEC), ໂຄງການ KUBOTA ພະລັງໃຈສູ້ໄພໜາວ ແລະ ໂຄງການ KUBOTA ພະລັງໃຈສູ້ໄພພິບັດດັ່ງນີ້ເປັນຕົ້ນ.