ອັລເລກຣີ ຊີ້ຖ້າມີ VAR ໂຣນັລໂດ ບໍ່ໄດ້ໃບແດງ
ມັສຊິມິເລຍໂນ ອັລເລກຣີ ຜູ້ຈັດການທີມ ຢູເວນຕຸສ ຍັກໃຫຍ່ແຫ່ງກັລໂຊ ເຊເຣຍ ອາ ອີຕາລີ ອອກມາລະບຸວ່າ: ຄຣິສເຕຍໂນ ໂຣນັລໂດ ດາວເຕະຂອງທີມ ຈະບໍ່ໄດ້ໃບແດງໄລ່ອອກຈາກສະໜາມແນ່ນອນ ຖ້າມີການໃຊ້ລະບົບ VAR ມາຊ່ວຍໃນການຕັດສິນ, ຫລັງດາວເຕະທີມຊາດໂປຣຕຸເກສ ຖືກຜູ້ຕັດສິນໄລ່ອອກຈາກສະໜາມຂໍ້ຫາໃຊ້ມືຍູ້ຫົວຄູ່ແຂ່ງ ໃນຊ່ວງກາງເຄິ່ງທຳອິດ ໃນເກມ ຢູຟາ ແຊມປ້ຽນລີກ ຮອບແບ່ງກຸ່ມ ກຸ່ມ H ນັດທີ່ ຢູເວນຕຸສ ບຸກຊະນະ ບາເລນເຊຍ 2-0 ໃນວັນທີ 19 ກັນຍາ.
ໃນການແຂ່ງຂັນດັ່ງກ່າວ ໂຣນັລໂດ ມີຈັງຫວະປະທະກັບ ໄຮຊອນ ມູຣິລໂຢ ກອງຫລັງ ບາເລນເຊຍ ໂດຍພາບຊ້າຈະສະແດງໃຫ້ເຫັນວ່າ ໂຣນັລໂດ ໃຊ້ມືຍູ້ຫົວຂອງກອງຫລັງເຈົ້າຖິ່ນ ກ່ອນ ເຟລິກ ບຣີ ຜູ້ຕັດສິນຊາວເຢຍລະມັນຈະຈົກໃບແດງໄລ່ດາວເຕະ ຢູເວນຕຸສ ອອກຈາກສະໜາມ ເຊິ່ງຖືເປັນໃບແດງທຳອິດຂອງ ໂຣນັລໂດ ໃນການລົງຫລິ້ນຖ້ວຍໃຫຍ່ຂອງເອີຣົບທັງໝົດ 145 ນັດ ແລະ ຖ້າອຸທອນໂທດບໍ່ຜ່ານອາດສົ່ງຜົນໃຫ້ ໂຣນັລໂດ ຖືກຫ້າມ 3 ເກມ ແລະ ຕ້ອງພາດລົງສະໜາມພົບກັບ ຍັງ ບອລ ໃນເກມຕໍ່ໄປ ລວມທັງເກມກັບ ແມນເຊັສເຕີ ຢູໄນເຕັດ ອະດີດຕົ້ນສັງກັດຂອງ ໂຣນັລໂດ ທັງ 2 ນັດຢ້ຽມ-ຢາມນຳອີກ.
