ກະຕໍ້ລາວຈະເດີນເຂົ້າຮ່ວມ ຊີງແຊ້ມໂລກຄັ້ງທີ 33 ເສົານີ້
ນັກກິລາກະຕໍ້ທີມຊາດລາວຍິງ-ຊາຍ ຈະເດີນທາງເຂົ້າຮ່ວມການແຂ່ງຂັນກະຕໍ້ຊີງແຊ້ມໂລກຄັ້ງທີ 33 ໃນວັນເສົານີ້ ທີ່ປະເທດໄທເປັນເຈົ້າພາບ ເຊິ່ງຈະຈັດຂຶ້ນລະຫວ່າງວັນທີ 23-30 ກັນຍານີ້.
ທ້າວ ໂຍທິນ ສົມບັດພູທອນ ນັກກິລາກະຕໍ້ທີມຊາດລາວ ໃຫ້ສໍາພາດວ່າ: ພາຍຫລັງສໍາເລັດການເຂົ້າຮ່ວມແຂ່ງຂັນເອຊຽນເກມຄັ້ງທີ 18 ແລ້ວ ພວກເຮົາກໍສືບຕໍ່ຝຶກຊ້ອມຢ່າງຕໍ່ເນື່ອງເພື່ອກຽມຄວາມພ້ອມເຂົ້າຮ່ວມການແຂ່ງຂັນກະຕໍ້ຊີງແຊ້ມໂລກຄັ້ງທີ 33 ນີ້, ການເຂົ້າຮ່ວມແຂ່ງຂັນຊີງແຊ້ມໂລກຄັ້ງນີ້ ທາງຄະນະສະຫະພັນກະຕໍ້ແຫ່ງຊາດລາວ ໄດ້ກໍານົດໃຫ້ເຂົ້າຮ່ວມຊາຍ 5 ລາຍການ, ຍິງ 5 ລາຍການຄື: ກະຕໍ້ລອດຮວງ ທີມ 4 ຄົນ, ທີມດ່ຽວ 3 ຄົນ, ທີມຄູ່ ແລະ ທີມຊຸດ ເຊິ່ງໃນເບື້ອງຕົ້ນແມ່ນຈະສົ່ງພຽງແຕ່ຊາຍ 4 ລາຍການ, ຍິງ 4 ລາຍການເທົ່ານັ້ນ.
ສໍາລັບການເດີນທາງ ສະຫະພັນກະຕໍ້ແຫ່ງຊາດລາວໄດ້ກໍານົດເດີນທາງໃນວັນທີ 22 ກັນຍານີ້.
