ປັດໃຈທີ່ສົ່ງຜົນຕໍ່ຄວາມສະຫຼາດຂອງລູກ
ບໍ່ແມ່ນວ່າພຽງແຕ່ການກິນອາຫານທີ່ບໍ່ມີປະໂຫຍດ ແລະ ຈະສົ່ງຜົນເຮັດໃຫ້ລູກມີພັດທະນາການຊ້າ ແລະ ເຮັດໃຫ້ລູກສະຫຼາດນ້ອຍລົງ ເພາະປັດໃຈທີ່ຈະສົ່ງຜົນເຖິງຄວາມສະຫຼາດຂອງຄົນເຮົານັ້ນ ຫຼັກໆແລ້ວມີຢູ່ 2 ປະເພດ ໄດ້ແກ່: ພັນທຸກໍາ ແລະ ສິ່ງແວດລ້ອມ ຊຶ່ງໄດ້ແກ່ການອົບຮົມລ້ຽງດູ, ຖານະທາງເສດຖະກິດ ແລະ ສະພາບແວດລ້ອມທີ່ຢູ່ອາໄສຮອບຕົວ.
ແຕ່ທັງນີ້ທັງນັ້ນ ບໍ່ວ່າຄວາມສະຫຼາດຈະເກີດຈາກສິ່ງໃດກໍແລ້ວແຕ່ ຄວາມສະຫຼາດເປັນສິ່ງທີ່ພັດທະນາໄດ້ ແລະ ສາມາດພັດທະນາໄດ້ດີຕັ້ງແຕ່ຍັງເປັນເດັກນ້ອຍ ໂດຍສະເພາະຢ່າງຍິ່ງໃນໄວ 3 ປີທໍາອິດນັ້ນ ສະໝອງຈະເຈີນເຕີບໂຕ ແລະ ພັດທະນາການໄດ້ຫຼາຍເຖິງ 80% ດັ່ງນັ້ນພໍ່ແມ່ທີ່ຢາກໃຫ້ລູກສະຫຼາດຈຶ່ງຄວນຕ້ອງໃສ່ໃຈເບິ່ງແຍງເປັນພິເສດ ພ້ອມທັງປ້ອງກັນສິ່ງທີ່ເປັນອຸປະສັກທີ່ເຮັດໃຫ້ສະໝອງຂອງລູກເຮົາບໍ່ພັດທະນາ. ຊຶ່ງປັດໃຈອື່ນໆທີ່ອາດຈະສົ່ງຜົນໃຫ້ລູກເປັນຄົນບໍ່ສະຫຼາດືຫຼືສະໝອງບໍ່ພັດທະນາ ມີຕົວຢ່າງດັ່ງນີ້:
- ເດັກນ້ອຍໄດ້ຮັບສານອາຫານບໍ່ຄົບທັງ 5 ໝູ່
- ສະພາບແວດລ້ອມທີ່ເປັນມົນລະພິດ
- ເດັກຂາດການສໍາພັດກັບສັງຄົມ
- ເດັກຂາດປະສົບການຮຽນຮູ້ທີ່ດີ
- ເດັກມີສຸຂະພາບຈິດບໍ່ດີ
ແນວໃດກໍຕາມ ເຊື່ອວ່າຄວາມສະຫຼາດຂອງລູກນັ້ນ ຢູ່ທີ່ການລ້ຽງດູຂອງພໍ່ແມ່ເປັນສໍາຄັນ ຢ່າທໍ້ແທ້ ທີ່ວັນນີ້ລູກຂອງເຮົາອາດຈະຍັງບໍ່ເກັ່ງ ຫຼືຍັງບໍ່ສະຫຼາດ ເພາະຫາກພໍ່ແມ່ລ້ຽງດູເຂົາດ້ວຍຄວາມຮັກ ແລະ ເອົາໃຈໃສ່ແລ້ວ ຄວາມສະຫຼາດຂອງລູກກໍຈະພັດທະນາຂຶ້ນມາໄດ້ໃນທີ່ສຸດ.
