ລາວເລັ່ງພັດທະນາສີມືແຮງງານໃຫ້ສາມາດແຂ່ງຂັນກັບປະເທດອາຊຽນ
ກອງປະຊຸມສະໄໝສາມັນຄັ້ງທີ VIII ຂອງສະພາທີ່ປຶກສາອາຊີວະສຶກສາ ແລະ ພັດທະນາສີມືແຮງງານແຫ່ງຊາດ (ສອພຊ) ໄດ້ຈັດຂຶ້ນໃນວັນທີ 19 ກັນຍານີ້ຢູ່ທີ່ນະຄອນຫລວງວຽງຈັນ, ໂດຍເປັນປະທານຂອງທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ທັງເປັນປະທານສະພາທີ່ປຶກສາອາຊີວະສຶກສາ ແລະ ພັດທະນາສີມືແຮງງານແຫ່ງຊາດ, ມີທ່ານປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ພ້ອມພະນັກງານ-ວິຊາການເຂົ້າຮ່ວມເປັນຈໍານວນຫລາຍ.
ທ່ານນາງ ແສງເດືອນ ຫຼ້າຈັນທະບູນ ກ່າວວ່າ: ໜຶ່ງປີຜ່ານມາ, ການຈັດຕັ້ງປະຕິບັດມະຕິກອງປະຊຸມສະໄໝສາມັນຄັ້ງທີ VII ຂອງສະພາທີ່ປຶກສາອາຊີວະສຶກສາແຫ່ງຊາດ ເຫັນວ່າຫລາຍອັນມີຜົນສຳເລັດ, ມີລັກສະນະຕັ້ງໜ້າ, ແຕ່ຄຽງຄູ່ກັນນັ້ນຍັງມີບາງອັນຄົງຄ້າງ ແລະ ມີຄວາມຫຍຸ້ງຍາກໃນການຈັດຕັ້ງປະຕິບັດຕົວຈິງ ທີ່ຕິດພັນກັບພາລະບົດບາດຂອງ ສອພຊ ແລະ ໜ່ວຍງານກຸ່ມອາຊີບ, ພ້ອມທັງບັນຫາພື້ນຖານທີ່ກ່ຽວພັນກັບການຮ່ວມມືລະຫວ່າງພາກລັດ ແລະ ເອກະຊົນໃນຂົງເຂດອາຊີວະສຶກສາ ແລະ ພັດທະນາສີມືແຮງງານ, ໂດຍສະເພາະການສົ່ງເສີມຍົກລະດັບສີມືແຮງງານຂອງພວກເຮົາໃຫ້ສາມາດແຂ່ງຂັນກັບບັນດາປະເທດສະມາຊິກອາຊຽນໄດ້.
ທ່ານລັດຖະມົນຕີ ເວົ້າເນັ້ນວ່າ: ກອງປະຊຸມຄັ້ງນີ້ ພວກເຮົາຈະໄດ້ພ້ອມກັນຄົ້ນຄວ້າພິຈາລະນາ ແລະ ປະກອບຄຳເຫັນໃສ່ເອກະສານສຳຄັນຈຳນວນໜຶ່ງ ເຊັ່ນ: ຮ່າງບົດສະຫລຸບການເຄື່ອນວຽກຂອງສະພາທີ່ປຶກອາຊີວະສຶກສາ ແລະ ພັດທະນາສີມືແຮງງານແຫ່ງຊາດ 2017 ແລະ ທິດທາງແຜນການ 2018 ຕິດຕາມດ້ວຍການສະເໜີບັນຫາຕ່າງໆຂອງກົມອາຊີວະສຶກສາກ່ຽວກັບວຽກຈຸດສຸມຂອງການພັດທະນາສີມືແຮງງານ, ການສະເໜີຂອງຫ້ອງການເລຂາທິການສະພາການຄ້າກ່ຽວກັບການຊຸກຍູ້ສົ່ງເສີມການສ້າງ ແລະ ພັດທະນາກຳລັງແຮງຂອງສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ການນໍາສະເໜີກ່ຽວກັບການຮ່ວມມືໃນຂົງເຂດກະສິກຳຂອງວິທະຍາໄລເຕັກນິກກະສິກຳດົງຄຳຊ້າງໃນນາມກຸ່ມອາຊີບກະສິກຳທີ່ຈະສ້າງຕັ້ງຂຶ້ນໃນມໍ່ໆນີ້, ສະເໜີຮ່າງປັບປຸງກົດໝາຍອາຊີວະສຶກສາ ເຊິ່ງເປັນປະເດັນສຳຄັນສຳລັບກອງປະຊຸມຄັ້ງນີ້ ເພາະຢູ່ໃນພາກທີ 10 ຂອງກົດໝາຍສະບັບນີ້ ແມ່ນເວົ້າເຖິງສະພາທີ່ປຶກສາອາຊີວະສຶກສາ ແລະ ພັດທະນາສີມືແຮງງານແຫ່ງຊາດ ເຊິ່ງພວກເຮົາຈະໄດ້ປະກອບຄຳຄິດເຫັນໃສ່ໃຫ້ມີຄວາມຊັດເຈນ ແລະ ສາມາດຈັດຕັ້ງຜັນຂະຫຍາຍໄດ້.
