ຈີນຈະຕອບໂຕ້ພາສີໃໝ່ອາເມລິກາ ສ່ວນທຸລະກິດຊີ້ຊາວອາເມລິກາຮັບເຄາະ
ຈີນເຜີຍບໍ່ມີທາງເລືອກນອກຈາກຕ້ອງຕອບໂຕ້ອາເມລິກາທີ່ປະກາດເກັບພາສີຮອບໃໝ່ກັບສິນຄ້າຈີນ, ສ່ວນທຸລະກິດອາເມລິກາຊີ້ວ່າ: ຜູ້ບໍລິໂພກຊາວອາເມລິກາຄືຜູ້ຮັບເຄາະຈາກການຕັດສິນໃຈຂອງປະທານາທິບໍດີ ໂດນັລ ທຣຳ.
USTR Finalizes Tariffs on $200 Billion of Chinese Imports in Response to China’s Unfair Trade Practices https://t.co/qja1EL8iXb pic.twitter.com/a07fpjZ4vS
— USTR (@USTradeRep45) September 17, 2018
ກະຊວງການຄ້າຈີນຖະແຫລງສັ້ນໆໃນວັນທີ 18 ກັນຍາວ່າ: ເພື່ອປົກປ້ອງສິດ ແລະ ຜົນປະໂຫຍດອັນຊອບທຳ ລວມທັງລະບຽບການຄ້າເສລີສາກົນ, ຈີນບໍ່ມີທາງເລືອກນອກຈາກຕ້ອງຕອບໂຕ້ແບບກະທັນຫັນ ແຕ່ບໍ່ໄດ້ລະບຸຈະແຈ້ງວ່າຈະເຮັດແນວໃດ. ຖະແຫລງການລະບຸອີກວ່າ: ອາເມລິກາຢືນຢັນເລື່ອງເພີ່ມພາສີ ເພີ່ມຄວາມບໍ່ແນ່ນອນໃຫ້ແກ່ການເຈລະຈາການຄ້າທະວີພາຄີ, ຈີນຫວັງວ່າອາເມລິກາຈະເນັ້ນໜັກເຖິງຜົນເສຍທີ່ຈະຕາມມາ ແລະ ດຳເນີນການແກ້ໄຂຢ່າງທັນເວລາ.
ປະທານາທິບໍດີ ທຣຳ ປະກາດໃນວັນທີ 17 ກັນຍາ ຕາມເວລາອາເມລິກາ ເລື່ອງເກັບພາສີ 10% ນັບແຕ່ວັນທີ 24 ກັນຍານີ້ ກັບສິນຄ້າຈີນມູນຄ່າ 200.000 ລ້ານໂດລາສະຫະລັດ ແລະ ຈະເພີ່ມເປັນ 25% ພາຍໃນທ້າຍປີນີ້ ພ້ອມກັບຂູ່ຈະເກັບພາສີກັບສິນຄ້າຈີນອີກ 267.000 ລ້ານໂດລາສະຫະລັດ ຖ້າຈີນຕອບໂຕ້ມາດຕະການຫລ້າສຸດຂອງອາເມລິກາ.
ສະພາອຸດສາຫະກຳເຕັກໂນໂລຊີຂໍ້ມູນຂ່າວສານອາເມລິກາ ຕຳນິວ່າ: ປະທານາທິບໍດີ ທຣຳ ຕັດສິນໃຈຜິດພາດ ເຊິ່ງຈະເປັນຜົນຮ້າຍຢ່າງຍາວນານໄປທົ່ວປະເທດ. ຂະນະທີ່ສະມາຄົມຜູ້ນຳອຸດສາຫະກຳຄ້າຍ່ອຍອາເມລິກາຊີ້ວ່າ: ພາສີທີ່ອາເມລິກາຮຽກເກັບຈາກຈີນຈະໄປຕົກທີ່ຄອບຄົວຊາວອາເມລິກາ ເຊັ່ນດຽວກັບກະສິກອນ ແລະ ຜູ້ລ້ຽງສັດອາເມລິກາທີ່ຈະເດືອດຮ້ອນເມື່ອການຕອບໂຕ້ຍິ່ງຮຸນແຮງຂຶ້ນ.
