ລາວໄດ້ຮັບຜົນກະທົບໜັກຈາກໄພທຳມະຊາດ
ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ປະທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໄດ້ລາຍງານຕໍ່ກອງປະຊຸມລັດຖະບານເປີດກວ້າງທີ່ພວມດຳເນີນຢູ່ໃນປັດຈຸບັນນີ້ວ່າ: ນັບແຕ່ກາງເດືອນກໍລະກົດຮອດຕົ້ນເດືອນກັນຍາ 2018 ນີ້ ໄດ້ມີລົມພາຍຸເຂດຮ້ອນເຊິນຕິນ ແລະ ເບີບິນກາພັດຜ່ານປະເທດເຮົາ ເຮັດໃຫ້ມີຝົນຕົກໜັກຕິດຕໍ່ຫລາຍວັນໃນທົ່ວປະເທດ ສົ່ງຜົນໃຫ້ແມ່ນ້ຳຂອງ, ແມ່ນ້ຳສາຂາ ແລະ ຫ້ວຍຕ່າງໆຂຶ້ນສູງ, ບວກກັບການປ່ອຍນ້ຳອອກຈາກເຂື່ອນ ເຮັດໃຫ້ເກີດນ້ຳຖ້ວມ ແລະ ດິນເຈື່ອນຢູ່ຫລາຍທ້ອງຖິ່ນ, ມີ 16 ແຂວງ ແລະ ນະຄອນຫລວງ, ມີ 110 ເມືອງ, 2.099 ບ້ານ, 113.530 ກວ່າຄອບຄົວ ໄດ້ຮັບຜົນກະທົບ ໃນນີ້ມີຜູ້ເສຍຊີວິດ 54 ຄົນ (ສະເພາະແຂວງອັດຕະປືມີ 40 ຄົນ) ແລະ ສູນຫາຍເກືອບ 100 ຄົນ, ໄດ້ຍົກຍ້າຍປະຊາຊົນໄປໄວ້ບ່ອນພັກເຊົ່າຊົ່ວຄາວເບື້ອງຕົ້ນ 4.890 ກວ່າຄອບຄົວ ສ່ວນໃຫຍ່ແມ່ນຢູ່ນະຄອນຫລວງວຽງຈັນ ແລະ ແຂວງອັດຕະປື.
ນອກນີ້, ຍັງມີເຮືອນເກືອບ 2.000 ຫລັງ, ເລົ້າເຂົ້າ 9.300 ກວ່າຫລັງ, ສຸກສາລາ 14 ແຫ່ງ, ລະບົບນ້ຳລິນ 75 ແຫ່ງ, ນ້ຳບາດານ 4.500 ກວ່າຈຸດ, ໂຮງຮຽນ 349 ຫລັງ, ເສັ້ນທາງ 416 ເສັ້ນ, ຂົວ 52 ແຫ່ງຖືກເປ່ເພເສຍຫາຍ ແລະ ມີເນື້ອທີ່ນາ 114 ພັນກວ່າເຮັກຕາ, ເນື້ອທີ່ທຳການຜະລິດອື່ນໆ 23.250 ກວ່າເຮັກຕາ, ໜອງປາ 3.440 ກວ່າໜອງ, ງົວ 976 ໂຕ, ຄວາຍ 230 ກວ່າໂຕ, ແບ້ 930 ກວ່າໂຕ, ໝູ 800 ກວ່າໂຕ ແລະ ສັດປີກອື່ນໆຫລາຍສີບ ພັນໂຕເສຍຫາຍ, ມີຊົນລະປະທານ 398 ແຫ່ງຖືກເປ່ເພ. ຈາກຜົນກະທົບດັ່ງກ່າວ ຄະນະກຳມະການປ້ອງກັນໄພພິບັດຂັ້ນຕ່າງໆໄດ້ຮີບຮ້ອນລົງໃຫ້ການຊ່ວຍເຫລືອ ໂດຍນຳໃຊ້ກຳລັງທະຫານ, ຕຳຫລວດ, ຊາວໜຸ່ມ ພ້ອມດ້ວຍກົນຈັກພາຫະນະ ແລະ ອຸປະກອນກູ້ໄພເຂົ້າຊ່ວຍຍົກຍ້າຍປະຊາຊົນ, ວັດຖຸສິ່ງຂອງ ແລະ ສັດລ້ຽງໄປໄວ້ບ່ອນປອດໄພ ແລະ ຊ່ວຍໃຫ້ການສູນເສຍເບົາບາງລົງ, ພ້ອມທັງປະສານສົມທົບກັບບັນດາຂະແໜງການຢູ່ສູນກາງ, ຄູ່ຮ່ວມມືສາກົນ ທັງພາຍໃນ ແລະ ຕ່າງປະເທດໃຫ້ການຊ່ວຍເຫລືອບັນເທົາທຸກສຸກເສີນແກ່ປະຊາຊົນທີ່ໄດ້ຮັບຜົນກະທົບໃນທົ່ວປະເທດ, ພ້ອມທັງໄດ້ມີຄະນະນຳແຕ່ລະຂັ້ນ ແລະ ທ້ອງຖິ່ນໄດ້ລົງຢ້ຽມຢາມໃຫ້ກຳລັງໃຈ ແລະ ຄວາມອົບອຸ່ນແກ່ປະຊາຊົນທີ່ຖືກກະທົບຈາກໄພພິບັດ ທັງມອບເຄື່ອງຊ່ວຍເຫລືອເປັນວັດຖຸເງິນຄຳ, ເຄື່ອງອຸປະໂພກ-ບໍລິໂພກ ແລະ ວັດຖຸສິ່ງຂອງຈຳເປັນຈຳນວນໜຶ່ງໃຫ້ຜູ້ປະສົບໄພຢ່າງທົ່ວເຖິງ.
ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ໃນຕໍ່ໜ້ານີ້ ແມ່ນຈະໄດ້ເລັ່ງສືບຕໍ່ເຝົ້າລະວັງ ຕິດຕາມ ແລະ ແຈ້ງເຕືອນສະພາບອາກາດ ລົມພາຍຸ, ຝົນຕົກ, ລະດັບນ້ຳອື່ນໆໃຫ້ປະຊາຊົນໄດ້ຮັບຊາບ ແລະ ມີມາດຕະການແກ້ໄຂ ເພື່ອຫລຸດຜ່ອນຄວາມສູນເສຍໃຫ້ໜ້ອຍທີ່ສຸດ. ສືບຕໍ່ຮັບບໍລິຈາກການຊ່ວຍເຫລືອຂອງສັງຄົມ ເພື່ອຊ່ວຍເຫລືອຜູ້ປະສົບໄພພິບັດຢູ່ບັນດາແຂວງ, ໂດຍສະເພາະເມືອງສະໜາມໄຊ ແຂວງອັດຕະປື, ພ້ອມທັງສືບຕໍ່ຈັດສັນລະບົບສາງເກັບມ້ຽນເຄື່ອງຊ່ວຍເຫລືອ ແລະ ຮີບຮ້ອນຈັດສົ່ງເຄື່ອງຊ່ວຍເຫລືອດັ່ງກ່າວໄປໃຫ້ຜູ້ປະສົບໄພພິບັດໃຫ້ທັນກັບສະພາບການ; ສົມທົບກັບຂະແໜງການທີ່ກ່ຽວຂ້ອງຢູ່ສູນກາງ ແລະ ທ້ອງຖິ່ນ ລວມທັງຄູ່ຮ່ວມງານສາກົນໃຫ້ການຊ່ວຍເຫລືອຟື້ນຟູຮີບດ່ວນຫລັງໄພພິບັດ ຢູ່ບັນດາແຂວງທີ່ຖືກຜົນກະທົບ, ເປັນຕົ້ນການສ້ອມແປງເຮືອນຊານຂອງປະຊາຊົນ, ການບຳບັດແຫລ່ງນ້ຳກິນ, ນ້ຳໃຊ້, ວິດຖ່າຍ, ການປູກຝັງ, ລ້ຽງສັດ ແລະ ອື່ນໆ ເພື່ອໃຫ້ຊີວິດການເປັນຢູ່ຂອງຜູ້ປະສົບໄພກັບຄືນສູ່ສະພາບປົກກະຕິໂດຍໄວ.
