ລາວ-ກຳປູເຈຍ ສືບຕໍ່ແກ້ໄຂບັນຫາຊາຍແດນຖອນກຳລັງທະຫານອອກຈາກຈຸດຄົງຄ້າງ

ພາຍຫລັງສຳເລັດການພົບປະສອງຝ່າຍ ຢູ່ນະຄອນຫລວງຮ່າໂນ້ຍ ສສຫວຽດນາມໃນວັນທີ 13 ກັນຍາ 2018, ທ່ານນາຍົກລັດຖະມົນຕີລາວ ແລະກຳປູເຈຍ ໄດ້ຮ່ວມກັນຖະແຫລງຜົນການປຶກສາຫາລືເພື່ອແກ້ໄຂບັນຫາຊາຍແດນລະຫວ່າງສອງປະເທດ, ໂດຍທ່ານສົມເດັດ ຮຸນເຊນ ນາຍົກລັດຖະມົນຕີແຫ່ງລາຊະອານາຈັກກຳປູເຈຍແຈ້ງວ່າ: ໄດ້ສັ່ງໃຫ້ທະຫານກຳປູເຈຍຖອນອອກຈາກເຂດຊາຍແດນທີ່ຍັງເປັນຈຸດຄົງຄ້າງແລ້ວ.

ທ່ານ ສົມເດັດຮຸນເຊນ ກ່າວວ່າ: ເປັນການແຈ້ງຂ່າວຢ່າງຊັດເຈນຕໍ່ປະຊາຊົນຂອງສອງປະເທດເພື່ອເປັນຫລັກຖານອັນໜຶ່ງໃຫ້ແກ່ປະຊາຊົນ ກໍຄືກອງທັບສາມາດປະຕິບັດ. ເທື່ອນີ້ເປັນຄັ້ງທີສາມ ທີ່ລາວ ແລະ ກຳປູເຈຍ ໄດ້ຮ່ວມຖະແຫລງການດັ່ງກ່າວ ມີຢູ່ນະຄອນຫລວງວຽງຈັນ, ພະນົມເປັນ ແລະ ຮ່າໂນ້ຍ. ຂ້າພະເຈົ້າຖືໂອກາດນີ້ ເພື່ອຊີ້ແຈງກ່ຽວກັບເຂດຫ້ວຍຕະເງົ້າ, ເຊິ່ງພວກເຮົາຖືວ່າເປັນເຂດທີ່ຍັງບໍ່ທັນແກ້ໄຂ, ໃນນັ້ນພວກເຮົາມີເງື່ອນໄຂສາມຢ່າງກ່ຽວກັບເຂດທີ່ຍັງບໍ່ທັນແກ້ໄຂນີ້ຄື: ອັນທີໜຶ່ງ ບໍ່ໃຫ້ມີກອງທັບທະຫານ, ສອງບໍ່ໃຫ້ມີປະຊາຊົນຢູ່ທີ່ນັ້ນ, ສາມຕ້ອງລາດຕະເວນຮ່ວມກັນ. ການລາດຕະເວນຮ່ວມກັນ, ພວກເຮົາສາມາດເດີນທາງທາງບົກ ແລະ ໃຊ້ໂດຣນໄດ້, ການລາດຕະເວນທາງບົກກໍຕ້ອງຮ່ວມກັນ, ການໃຊ້ໂດຣນກໍຕ້ອງໃຊ້ຮ່ວມກັນ.

ກ່ຽວກັບການຖອນທະຫານຂອງຝ່າຍກຳປູເຈຍ, ຂ້າພະເຈົ້າໄດ້ລົມກັນກັບນາຍົກລັດຖະມົນຂອງລາວແລ້ວວ່າ: ຂ້າພະເຈົ້າໄດ້ສັ່ງໃຫ້ທະຫານກຳປູເຈຍຖອນກຳລັງອອກຈາກເຂດຫ້ວຍຕະເງົ້າໃຫ້ໝົດ. ສິ່ງໃໝ່ໆທີ່ພວກເຮົາສ້າງຂຶ້ນແມ່ນເພື່ອຄວາມໄວ້ເນື້ອເຊື່ອໃຈຮ່ວມກັນ, ພວກເຮົາຕົກລົງໃຫ້ມີການລາດຕະເວນຮ່ວມສອງປະເທດ, ແຕ່ກ່ອນຕ່າງຝ່າຍຕ່າງລາດຕະເວນຂອງໃຜຂອງລາວ, ຝ່າຍທະຫານກຳປູເຈຍກໍລາດຕະເວນຢູ່ທາງເບື້ອງກຳປູເຈຍ, ຝ່າຍລາວກໍລາດຕະເວນຢູ່ເບື້ອງຂອງລາວ. ປັດຈຸບັນນີ້ພວກເຮົາຕ້ອງມີການລາດຕະເວນຮ່ວມກັນ. ກ່ຽວກັບເລື່ອງການແກ້ໄຂບັນຫາແຜນທີ່, ນາຍົກລັດຖະມົນຕີຂອງສອງປະເທດກໍໄດ້ຕົກລົງກັນແລ້ວໃຫ້ປະເທດຝຣັ່ງຊ່ວຍສົ່ງແຜນທີ່ມາໃຫ້ພວກເຮົາເປັນຜູ້ຖ່າຍ. ເວົ້າລວມເຂດຫ້ວຍຕະເງົ້າຕິດກັບຊາຍແດນຫ້ວຍອາໄລໄປຮອດຊາຍແດນລາວເປັນເຂດທີ່ພວກເຮົາຍັງບໍ່ທັນໄດ້ແກ້ໄຂ, ເປັນຈຸດຄົງຄ້າງ ແລະ ເຂດດັ່ງກ່າວຕ້ອງໄດ້ຢັ້ງຢືນວ່າຢູ່ໃນສາມເງື່ອນໄຂຂອງພວກເຮົາທັງສອງຝ່າຍທີ່ໄດ້ເວົ້າມາຄື: ໜຶ່ງບໍ່ໃຫ້ມີກຳລັງທະຫານ, ສອງບໍ່ໃຫ້ປະຊາຊົນເຂົ້າມາດຳເນີນທຸລະກິດ ຫລື ທຳມາຫາກິນ ແລະ ສາມ ຖ້າຫາກວ່າຢາກລາດຕະເວນກໍຕ້ອງມີການລາດຕະເວນຮ່ວມກັນ.

ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ກໍໄດ້ກ່າວວ່າ: ການພົບປະຂອງສອງນາຍົກໃນຄັ້ງນີ້ໄດ້ຕົກລົງບັນຫາສຳຄັນຄືກັນກັບນາຍົກຮຸນເຊນໄດ້ສະເໜີໄປແລ້ວນັ້ນ, ພວກເຮົາຢືນຢັນວ່າເຂດນີ້ຍັງເປັນເຂດຄົງຄ້າງ, ມິດຕະພາບທີ່ສອງລັດຖະບານໄດ້ຕົກລົງກັນມານັ້ນ ແຕ່ຂ້າພະເຈົ້າຄິດວ່າການຕົກລົງໃນມື້ນີ້ ເປັນການຕົກລົງທີ່ສ້າງຄວາມໄວ້ເນື້ອເຊື່ອໃຈໃຫ້ແກ່ສອງປະເທດ ກໍຄືສ້າງຄວາມອຸ່ນໃຈໃຫ້ແກ່ປະຊາຊົນທັງສອງປະເທດ. ສາມຫລັກການທີ່ສົມເດັດຮຸນເຊນ ໄດ້ສະເໜີມານັ້ນພວກເຮົາສອງຝ່າຍຈະພ້ອມກັນຈັດຕັ້ງປະຕິບັດໃຫ້ເຂັ້ມງວດ ແລະ ເວລາດຽວກັນນັ້ນກໍເຫັນດີກັບສົມເດັດຮຸນເຊນ, ສອງກະຊວງການຕ່າງປະເທດຕ້ອງສະເໜີໄວໄປໃຫ້ປະເທດຝຣັ່ງ ເພື່ອໃຫ້ສົ່ງແຜນທີ່ມາໃຫ້ພວກເຮົາເພື່ອສືບຕໍ່ສຶກສາ; ໃຫ້ສອງຄະນະກຳມະການຊາຍແດນທີ່ຖືກແຕ່ງຕັ້ງນັ້ນ ສືບຕໍ່ລົງໄປສະຖານທີ່ເພື່ອໃຫ້ສຶກສາຄົ້ນຄວ້າ, ຖ້າຫາກວ່າບ່ອນໃດມີການລະເມີດ, ຄະນະກຳມະການຊາຍແດນສອງຝ່າຍຕ້ອງພ້ອມກັນແກ້ໄຂໂລດ ເພື່ອບໍ່ໃຫ້ເລື່ອງມັນບານປາຍອອກໄປ. ຂ້າພະເຈົ້າຄິດວ່າສອງນາຍົກພວກເຮົາໄດ້ຕົກລົງກັນແລ້ວ ຈະໄດ້ສືບຕໍ່ຊີ້ນຳຢ່າງໃກ້ຊິດ ເພື່ອເຮັດໃຫ້ການແກ້ໄຂບັນຫາຊາຍແດນກ້າວໄປຕາມບາດກ້າວທີ່ພວກເຮົາໄດ້ເຄີຍຕົກລົງກັນຂ້າພະເຈົ້າຄິດວ່າການຕົກລົງຄັ້ງນີ້ເປັນການສ້າງຄວາມໄວ້ເນື້ອເຊື່ອໃຈ, ສືບຕໍ່ເຮັດໃຫ້ສອງລັດຖະບານຮ່ວມມືກັນສ້າງໃຫ້ຊາຍແດນເປັນຊາຍແດນສັນຕິພາບ-ການຮ່ວມມື, ພວກເຮົາຍັງຕົກລົງກັນວ່າສອງຄະນະກຳມະການຮ່ວມມືຊາຍແດນຂອງລາວ-ກຳປູເຈຍຄວນພົບປະຫາລືກັນໄວເພື່ອປຶກສາຫາລືກັນໃນຫລາຍດ້ານ ໃນຕໍ່ໄປຜັນຂະຫຍາຍການຕົກລົງຂອງຂ້າພະເຈົ້າ ແລະ ສົມເດັດຮຸນເຊນ ທີ່ໄດ້ຕົກລົງກັນໃນເວລາທີ່ຂ້າພະເຈົ້າ ໄດ້ໄປຢ້ຽມຢາມຢ່າງເປັນທາງການນັ້ນໃຫ້ເກີດໝາກເກີດຜົນ.