ລາວ-ຈີນ ຮ່ວມມືດ້ານອາຊີວະສຶກສາ

ວິທະຍາໄລເຕັກນິກລາວ-ເຢຍລະມັນ ໄດ້ຈັດກອງປະຊຸມ ຮ່ວມມືດ້ານອາຊີວະສຶກສາລາວ-ຈີນ ແລະ ສາຂາຂອງສະຖາບັນເຕັກໂຕໂລຊີ ສະຖາປັດຈຽງຊູ, ຂຶ້ນໃນທ້າຍອາທິດຜ່ານມານີ້, ທີ່ນະຄອນຫຼວງວຽງຈັນ ເພື່ອປຶກສາຫາລືການພົບພັນຮ່ວມມືສອງຝ່າຍ.

ວິທະຍາໄລເຕັກນິກລາວ-ເຢຍລະມັນ ໄດ້ສ້າງຕັ້ງຂຶ້ນໃນປີ 1964 ໂດຍການຮ່ວມມືລະຫວ່າງ ລັດຖະບານລາວ ແລະ ສະຫະພັນເຢຍລະມັນ ໂດຍຊື່ວ່າ: ໂຮງຮຽນມັດທະຍົມການຊ່າງ ລາວ-ເຢຍລະມັນ, ມາຮອດປີ 1975 ໄດ້ປ່ຽນຊື່ມາເປັນໂຮງຮຽນ ການຊ່າງວຽງຈັນ, ປີ 1993 ໄດ້ປ່ຽນຊື່ມາເປັນ ໂຮງຮຽນເຕັກນິກລາວ-ເຢຍລະມັນ ແລະ ປີ 2015 ໄດ້ປ່ຽນຊື່ມາເປັນ ວິທະຍາໄລເຕັກນິກ ລາວ-ເຢຍລະມັນ ຮອດປັດຈຸບັນ. ວິທະຍາໄລແຫ່ງນີ້ ເປັນຕົ້ນແບບ ແຫ່ງການພັດທະນາ ກຳລັງແຮງງານ ແລະ ນັກວິຊາການ ໃນຂະແໜງອຸດສາຫະກໍາ ເພື່ອສະໜອງໃຫ້ແກ່ ການພັດທະນາເສດຖະກິດ-ສັງຄົມຂອງປະເທດ. ຊຶ່ງປະກອບມີ 6 ພະແນກ ແລະ 5 ພາກວິຊາຄື: ວິຊາອຸດສາຫະກໍາ, ໄຟຟ້າ-ເອເລັກໂຕຣນິກ, ເຕັກໂນໂລຊີລົດຍົນ, ກົນຈັກໜັກ-ກົນຈັກກະສິກຳ ແລະ ຈັກກົນໂຮງງານ, ມີຫ້ອງຮຽນທິດສະດີ 30 ຫ້ອງ, ຫ້ອງທົດລອງ 5 ຫ້ອງ, ຫ້ອງຝຶກງານ ແລະ ໂຮງຊ່າງ 5 ຫ້ອງ, ຄອມພິວເຕີ 5 ຫ້ອງ, ເຕັກນິກຄວບຄຸມ 2 ຫ້ອງ ແລະ ຫ້ອງປະຊຸມ 2 ຫ້ອງ, ພະນັກງານ, ຄູ-ອາຈານທັງໝົດ 90 ຄົນ.

ໃນກອງປະຊຸມດັ່ງກ່າວ ທ່ານເລຂາພັກສະຖາບັນຈຽງຊູ ໃຫ້ຮູ້ວ່າ: ສໍາລັບສະຖາບັນເຕັກໂຕໂບຊີ ສະຖາປັດຊຽງຈູ ສປ ຈີນ ເນັ້ນການຮຽນ-ການສອນທາງດ້ານສະຖາປັດຊະຍະກໍາ, ເຊິ່ງມີຫຼາຍຫຼັກສູດເປັນຕົ້ນ ພະນັກງານບໍ່ແຮ່, ໄຟຟ້າ, ເອເລັກໂຕຣນິກ, ຄອມພິວເຕີ, ອາຫານ-ການໂຮງແຮມ ແລະ ອື່ນໆ.