ໄຂ້ມາລາເຣຍລະບາດໃນ ເກາະແຜ່ນດິນໄຫວອິນໂດເນເຊຍ
ເຈົ້າໜ້າທີ່ອິນໂດເນເຊຍລາຍງານໃນວັນທີ 17 ກັນຍາວ່າ: ໄຂ້ມາລາເຣຍລະບາດໜັກ ມີຜູ້ຕິດເຊື້ອຢ່າງໜ້ອຍ 137 ຄົນ ທີ່ລອມບອກຕາເວັນຕົກ ພາຍຫລັງເກາະລອມບອກຫາກໍຜະເຊີນແຜ່ນດິນໄຫວຫລາຍຮອບເມື່ອສອງເດືອນກ່ອນ.
ແຜ່ນດິນໄຫວ ແລະ ອາບເຕີຊ໋ອກຫລາຍເທື່ອທີ່ເກາະລອມບອກນັບແຕ່ເດືອນກໍລະກົດ-ສິງຫາ ເຮັດໃຫ້ມີຜູ້ເສຍຊີວິດປະມານ 500 ຄົນ ແລະ ອີກຫລາຍແສນຄົນຕ້ອງອົບພະຍົບໄປຢູ່ໃນເຕັ້ນ ແລະ ສູນພັກເຊົ່າຊົ່ວຄາວ. ຂະນະທີ່ຕົວເລກຜູ້ຕິດເຊື້ອໄຂ້ມາລາເຣຍເພີ່ມຂຶ້ນສອງເທົ່າຈາກໄລຍະດຽວກັນຂອງປີຜ່ານມາ ເຮັດໃຫ້ທາງການລອມບອກຕາເວັນຕົກຕ້ອງປະກາດສະຖານະການສຸກເສີນດ້ານສາທາລະນະສຸກ ເພື່ອຂໍຮັບງົບຊ່ວຍເຫລືອ 230.000 ໂດລາ ຈາກທາງການທ້ອງຖິ່ນ ແລະ ລັດຖະບານກາງສຳລັບຮັບມືກັບວິກິດດັ່ງກ່າວ. ໃນກຸ່ມຜູ້ຕິດເຊື້ອໄຂ້ມາລາເຣຍ 137 ຄົນເປັນເດັກນ້ອຍ ແລະ ຍິງຖືພາ. ເຈົ້າໜ້າທີ່ຕ້ອງໃຊ້ມາດຕະການຢັບຢັ້ງພະຍາດລະບາດບໍ່ໃຫ້ຂະຫຍາຍວົງກວ້າງຂຶ້ນເຊັ່ນ: ກວດເລືອດ, ແຈກມຸ້ງ ແລະ ສີດຢາກຳຈັດຍຸງ. ຂະນະທີ່ອິນໂດເນເຊຍຈະເລີ່ມເຂົ້າສູ່ລະດູຝົນນັບແຕ່ເດືອນໜ້າ ຍິ່ງເຮັດໃຫ້ກັງວົນວ່າ: ໄຂ້ມາລາເຣຍ ເຊິ່ງເປັນພະຍາດຕິດຕໍ່ຈາກຍຸງຈະລະບາດໃນພື້ນທີ່ນ້ຳຖ້ວມຫລາຍຂຶ້ນ.
