ດື່ມນຳ້ຫລາຍເກີນໄປອັນຕະລາຍຫລືບໍ່ ?
ແນ່ນອນວ່າອັນໃດທີ່ຫລາຍຈົນເກີນໄປມັກສົ່ງຜົນຮ້າຍສະເໝີ ການດື່ມນຳ້ເທື່ອລະຫລາຍໆຈະເປັນການສ້າງພາລະໃຫ້ກັບໝາກໄຂ່ຫລັງທີ່ພະຍາຍາມຈະເອົານຳ້ພາກສ່ວນທີ່ເກີນຄວາມຈຳເປັນຕໍ່ຮ່າງກາຍອອກ ໝາກໄຂ່ຫລັງຈະເຮັດວຽກໜັກຂຶ້ນ ຍ້ອນຕ້ອງຮັກສາເວລາໃນການໄລ່ນຳ້ສ່ວນເກີນອອກຈາກຮ່າງກາຍ ເພື່ອຮັກສາຄວາມດຸ່ນດ່ຽງພາຍໃນຮ່າງກາຍໃນເວລາອັນຈຳກັດ ດັ່ງນັ້ນ ຫາກມີບັນຫາກ່ຽວກັບໝາກໄຂ່ຫລັງຢູ່ແລ້ວ ຈະຍິ່ງເປັນອັນຕະລາຍຕໍ່ຮ່າງກາຍຂຶ້ນຕື່ມ.
ແນວໃດກໍຕາມ ຫາກທ່ານເປັນຄົນສຸຂະພາບແຂງແຮງດີ 100% ອາດຈະໄດ້ຮັບອັນຕະລາຍຈາກການດື່ມນຳ້ຫລາຍເກີນໄປໜ້ອຍກ່ວາຄົນທີ່ມີບັນຫາທາງສຸຂະພາບ ພຽງແຕ່ຫາກຍັງມີພຶດຕິກຳດື່ມນຳ້ເທື່ອລະຫລາຍໆຢູ່ຕະຫລອດ ກໍຈະສ່ຽງເປັນອັນຕະລາຍໄດ້ຄືກັນ ແຕ່ການດື່ມນຳ້ຂອງແຕ່ລະຄົນຈະບໍ່ເທົ່າກັນ ຂຶ້ນຢູ່ກັບຮູບຮ່າງ, ນຳ້ໜັກ, ສຸຂະພາບໂດຍລວມ ແລະ ກິດຈະກຳທີ່ເຮົາເຮັດໃນແຕ່ລະມື້ນຳ. ໃຫ້ສັງເກດວ່າຫາກຍ່ຽວເປັນສີເຫລືອງເຂັ້ມປົນສົ້ມ ທ່ານຄວນດື່ມນຳ້ໃຫ້ຫລາຍຂຶ້ນຕື່ມ, ຫາກຍ່ຽວເປັນສີເຫລືອງອ່ອນເກືອບໃສ ສະແດງວ່າທ່ານດື່ມນຳ້ຢ່າງພຽງພໍແລ້ວ, ກິ່ນຂອງຍ່ຽວກໍສຳຄັນ ຫາກກິ່ນແຮງເກີນໄປຈະສະແດງວ່າທ່ານກຳລັງດື່ມນຳ້ໜ້ອຍເກີນໄປຄືກັນ. ຈຳນວນການຍ່ຽວກໍຈະແມ່ນທຸກໆ 3 – 4 ຊົ່ວໂມງ ຫາກໃນ 1 ມື້ ທ່ານຍ່ຽວໜ້ອຍກ່ວາ 3 – 4 ເທື່ອ ສະແດງວ່າທ່ານກຳລັງດື່ມນຳ້ໜ້ອຍເກີນໄປ ເຊິ່ງສົ່ງຜົນອັນຕະລາຍຕໍ່ພົກຍ່ຽວ ແລະ ພາກ ສ່ວນອື່ນໆຂອງຮ່າງກາຍໄດ້.
ເຄັດລັບໃນການດື່ມນຳ້ໃຫ້ເປັນປະໂຫຍດຕໍ່ຮ່າງກາຍ :
- ຄວນດື່ມນຳ້ 1 ຈອກຫລັງຕື່ນນອນຕອນເຊົ້າເພື່ອກະຕຸ້ນການເຮັດວຽກຂອງລະບົບຕ່າງໆພາຍໃນຮ່າງກາຍໃຫ້ເລີ່ມເຮັດວຽກໄດ້ຢ່າງເປັນປົກກະຕິ.
- ດື່ມນຳ້ 1 ຈອກຫລັງອາບນຳ້ ຊ່ວຍຫລຸດຄວາມດັນເລືອດ.
- ດື່ມນຳ້ 1 ຈອກກ່ອນກິນເຂົ້າປະມານ 30 ນາທີ ຊ່ວຍໃຫ້ລະບົບຍ່ອຍອາຫານເຮັດວຽກໄດ້ດີຍິ່ງຂຶ້ນ.
- ດື່ມນຳ້ 1 ຈອກຫລັງຈາກ ກິນເຂົ້າແລ້ວ ຊ່ວຍໃຫ້ຮ່າງກາຍ ດູດຊຶມສານອາຫານໄດ້ດີຍິ່ງຂຶ້ນ.
- ດື່ມນຳ້ 1 ຈອກກ່ອນນອນ ຊ່ວຍເພີ່ມນຳ້ໃຫ້ກັບຮັບຮ່າງກ່ອນການພັກຜ່ອນຫລາຍຊົ່ວໂມງໂດຍບໍ່ໄດ້ດື່ມນຳ້ເລີຍ (ແຕ່ບໍ່ຄວນດື່ມເກີນ 1 ຈອກ ເພາະຈະເຮັດໃຫ້ລຸກຂຶ້ນມາຍ່ຽວກາງເດິກ ເຊິ່ງຈະລົບກວນການນອນຂອງທ່ານ).
- ໃນລະຫ່ວາງມື້ໃຫ້ໝັ່ນດື່ມນຳ້ເທື່ອລະກືນ ບໍ່ຄວນດື່ມຫລາຍໃນເທື່ອດຽວ ເພາະສ່ຽງເກີດອາການນຳ້ເປັນພິດ ແລະ ສ່ຽງໝາກໄຂ່ຫລັງເຮັດວຽກໜັກເກີນໄປ.
- ໝັ່ນສັງເກດສີ ແລະ ກິ່ນຂອງນຳ້ຍ່ຽວຕົນເອງໃຫ້ເປັນສີເຫລືອງອ່ອນເກືອບໃສ ແລະ ບໍ່ມີກິ່ນແຮງຈົນເກີນໄປ.
- ເຖິງວ່າຈະດື່ມເຄື່ອງດື່ມຕ່າງໆຫລວງຫລາຍໃນແຕ່ລະມື້, ແຕ່ແນວໃດກໍຢ່າລືມດື່ມນຳ້ບໍລິສຸດໄປນຳ.
