ກອງປະຊຸມປຶກສາຫາລືເພື່ອແກ້ໄຂຂອດການບໍລິການປິ່ນປົວສຸຂະພາບລະຫວ່າງ ຫກປຊ ແລະ ໂຮງໝໍຄູ່ສັນຍາ

ເພື່ອເປັນການທົບທວນການປະຕິບັດສັນຍາສະບັບເລກທີ 0230/ຫກປຊ ລົງວັນທີ 29 ມີນາ 2017 ກ່ຽວກັບການບໍລິການປິ່ນປົວສຸຂະພາບ ຕາມລະບົບປະກັນສັງຄົມ ລະຫວ່າງ ຫ້ອງການກອງທຶນປະກັນສັງຄົມແຫ່ງຊາດ ກັບ ບັນດາໂຮງໝໍຄູ່ສັນຍາສູນກາງ, ໃນເຊົ້າວັນທີ 13 ກັນຍານີ້, ທີ່ກະຊວງສາທາລະນະສຸກ ໄດ້ມີກອງປະຊຸມປຶກສາຫາລືເພື່ອແກ້ໄຂຂອດການບໍລິການປິ່ນປົວສຸຂະພາບລະຫວ່າງຫ້ອງການກອງທຶນປະກັນສຸຂະພາບແຫ່ງຊາດ (ຫກປຊ) ແລະ ໂຮງໝໍຄູ່ສັນຍາສູນກາງ ແລະ ກົມປິ່ນປົວ ໂດຍການເຂົ້າຮ່ວມຂອງ ທ່ານ ດຣ ບຸນໜັກ ໄຊຊະນະສົງຄາມ ຫົວໜ້າກົມປິ່ນປົວ ກະຊວງສາທາລະນະສຸກ ແລະ ທ່ານ ປະເດີມພອນ ສົນທະນີ ຜູ້ອຳນວຍການ ຫກປຊ, ຊຶ່ງມີຄະນະອໍານວຍການ, ພ້ອມດ້ວຍຜູ້ປະສານງານໂຮງໝໍມະໂຫສົດ, ເສດຖາທິຣາດ, ມິດຕະພາບ ແລະ 103, ຄະນະຫ້ອງການກອງທຶນປະກັນສຸຂະພາບແຫ່ງຊາດ, ຄະນະອຳນວຍການ ຫກປຊ ແລະ ສູນການແພດຟື້ນຟູໜ້າທີ່ການເຂົ້າຮ່ວມນໍາດ້ວຍ.

ພາຍຫຼັງປະທານກ່າວເປີດກອງປະຊຸມ, ທ່ານ ດຣ ນາງ ບົວຫອມ ພົມມະຈັນ ຮອງຜູ້ອຳນວຍການ ຫກປຊ ໄດ້ລາຍງານກ່ຽວກັບສະພາບການ ຈັດຕັ້ງປະຕິບັດສັນຍາໃນໄລຍະທີ່ຜ່ານມາ, ຊຶ່ງເຫັນວ່າບັນດາໂຮງໝໍໄດ້ປະຕິບັດນະໂຍບາຍປິ່ນປົວສຸຂະພາບໃຫ້ແກ່ຜູ້ເກີດສິດຕາມສັນຍາ ແລະ ລະບຽບການຕ່າງໆໄດ້ຮັບການປັບປຸງ ແລະ ແກ້ໄຂ, ແຕ່ກໍ່ຍັງມີບາງບັນຫາທີ່ຍັງບໍ່ທັນເປັນເອກະພາບກັນ ເປັນຕົ້ນແມ່ນບາງໂຮງໝໍຍັງມີຫາງສຽງຈົມວ່າກ່ຽວກັບພະນັກງານຕ້ອນຮັບ ແລະ ການບໍລິການຂອງແພດ, ມີບາງຄັ້ງຄົນເຈັບສຸກເສີນໄປໂຮງໝໍອື່ນໄດ້ຈ່າຍເງິນເອງ, ບາງໂຮງໝໍຍັງບໍ່ທັນມີຢາພຽງພໍສະໜອງໃຫ້ແກ່ຄົນເຈັບ ໄດ້ໄປຊື້ຢາຢູ່ນອກ ແລະ ການຖອນເງິນຄືນຊັກຊ້າ ຫຼື ບາງເທື່ອບໍ່ຖອນໃຫ້, ການຜ່າຕັດໃສ່ເຫຼັກ, ການອະທິບາຍແກ່ຜູ້ປະກັນຕົນກ່ຽວກັບການບໍລິການບາງອັນທີ່ໂຮງໝໍຈໍາເປັນຕ້ອງໄດ້ເກັບເງິນນໍາຄົນເຈັບ ຍ້ອນວ່າບໍ່ຢູ່ໃນລາຍການຄຸ້ມຄອງຂອງປະກັນສັງຄົມ ເປັນຕົ້ນແມ່ນ ຫ້ອງນອນພິເສດ, ການກວດພູມແພ້ ແລະອື່ນໆ, ການອອກໃບຢັ້ງຢືນສຸຂະພາບໃຫ້ຄົນເຈັບ ເຫັນວ່າຍັງມີຊ່ອງວ່າງ ແລະ ບໍ່ທັນເໝາະສົມ, ພ້ອມທັງສະເໜີໃຫ້ກອງປະຊຸມເອກະພາບປັບແບບໃບຢັ້ງຢືນຕີເປີເຊັນເສຍອົງຄະຕື່ມ.

ກອງປະຊຸມໄດ້ຄົ້ນຄ້ວາ ແລະ ມີການປະກອບຄຳເຫັນຂອງຫຼາຍພາກສ່ວນ ແລະ ເອກະພາບກັນບາງບັນຫາດັ່ງນີ້: ໂຮງໝໍຈະນໍາຂໍ້ສະເໜີເລື່ອງການຮ້ອງຮຽນຕໍ່ການບໍລິການຂອງພະນັກງານຕ້ອນຮັບ ແລະ ແພດໝໍໄປປັບປຸງໃນໂຮງໝໍຂອງຕົນ; ການຜ່າຕັດໃສ່ເຫຼັກ ແມ່ນຖ້າເປັນເຫຼັກທີ່ໃສ່ໃນເວລາຜ່າຕັດ ບໍ່ແມ່ນອຸປະກອນເສີມ ແມ່ນໂຮງໝໍຈະຈ່າຍໃຫ້ຕາມສັນຍາ; ໂຮງໝໍຈະພະຍາຍາມຈັດຫາຢາທີ່ຈໍາເປັນ ມາໄວ້ໃນໂຮງໝໍເພື່ອລີກລ່ຽງການຊື້ຢານອກ; ຫກປຊ ຈະສົ່ງຂໍ້ມູນຮ້ອງຮຽນໃຫ້ແຕ່ລະໂຮງໝໍເປັນແຕ່ລະໄລຍະ ເພື່ອໃຫ້ໂຮງໝໍມີຂໍ້ມູນໃນການປັບປຸງການບໍລິການ; ໃນໄລຍະຕໍ່ໄປ ຄວນມີການກວດກາ ແລະ ສຶກສາເບິ່ງຄືນດ້ານການເງິນທີ່ໂຮງໝໍຂາດດູນ; ເອກະພາບໃຫ້ຈັດຕັ້ງກອງປະຊຸມວິຊາການ ກັບຄະນະຕີເປີເຊັນເສຍອົງຄະ ແລະ ຕາງໜ້າບັນດາໂຮງໝໍ ເພື່ອເອກະພາບຂອງໃບຢັ້ງຢືນແພດ ແລະ ແບບຟອມຕີເປີເຊັນດັ່ງກ່າວ.