ລາວ-ຫວຽດນາມເພີ່ມທະວີຮ່ວມມືຮັກສາຄວາມສະຫງົບຕາມຊາຍແດນ
September 17, 2018 - 6:33 AM
ກອງປະຊຸມຮ່ວມມືຮັກສາຄວາມສະຫງົບຊາຍແດນລະຫວ່າງລາວ-ຫວຽດນາມຄັ້ງທີ III ໄດ້ຈັດຂຶ້ນໃນທ້າຍອາທິດຜ່ານມານີ້ທີ່ນະຄອນຫລວງວຽງຈັນ, ຝ່າຍລາວນໍາໂດຍທ່ານພົນຈັດຕະວາ ບຸນມີ ແສງຄຳຢອງ ຫົວໜ້າກົມໃຫຍ່ສັນຕິບານ ແລະ ຝ່າຍຫວຽດນາມນໍາໂດຍທ່ານພົນຕີ ຮ່ວງ ຊວນ ຈຽນ ຫົວໜ້າກອງບັນຊາການປ້ອງກັນຊາຍແດນ.
ໃນກອງປະຊຸມ, ສອງຝ່າຍໄດ້ຕີລາຄາການຮ່ວມມືໃນຜ່ານມາ, ພ້ອມທັງຫາລືການຮ່ວມມືໃນຕໍ່ໜ້າ, ໂດຍສະເພາະການແລກປ່ຽນຂໍ້ມູນການເຄື່ອນໄຫວຂອງກຸ່ມຄົນບໍ່ດີ, ເປົ້າໝາຍຄ້າຂາຍເຖື່ອນ, ຄ້າຢາເສບຕິດ, ຄ້າມະນຸດ, ການລັກລອບຂຸດຄົ້ນຊັບພະຍາກອນທຳມະຊາດຕາມຊາຍແດນຂອງສອງປະເທດ, ການເຂົ້າ-ອອກເມືອງຜິດລະບຽບກົດໝາຍ, ການຍົກຍ້າຍຕັ້ງພູມລຳເນົາຜິດກົດໝາຍ ແລະ ວຽກງານອື່ນໆ ເພື່ອສະກັດກັ້ນບັນດາປາກົດການຫຍໍ້ທໍ້ຕ່າງໆຕາມບໍລິເວນຊາຍແດນໃຫ້ຫລຸດລົງເທື່ອລະກ້າວ.
