ອຸຕຸເຕືອນພະຍຸມັງຄຸດຈະມາຮອດລາວໃນວັນທີ 17-18 ກັນຍານີ້
ກົມອຸຕຸນິຍົມ ແລະ ອຸທົກກະສາດ ໄດ້ເຕືອນໃຫ້ປະຊາຊົນສືບຕໍ່ມີສະຕິລະວັງຕົວຕໍ່ສະພາບຝົນຕົກລົມພັດແຮງ, ພາຍຫລັງພະຍຸໃຕ້ຝຸ່ນມັງຄຸດ (MANGKHUT) ຫົວທີ 22 ທີ່ໄດ້ກໍ່ຕົວໃນມະຫາສະມຸດປາຊີຟີກ ຢູ່ເສັ້ນຂະໜານທີ 16,0 ອົງສາເໜືອ ແລະ ເສັ້ນແວງທີ 126,9 ອົງສາຕາເວັນອອກ ກໍາລັງເຄື່ອນທີ່ໄປທາງຕາເວັນຕົກຫາຕາເວັນຕົກສຽງເໜືອດ້ວຍຄວາມໄວ 20 ກິໂລແມັດຕໍ່ຊົ່ວໂມງຄາດວ່າພະຍຸຫົວນີ້ຈະຜ່ານເຂດພາກໃຕ້ ສປ ຈີນ ແລະ ເກາະໄຮໜານ ແລ້ວຜ່ານພາກເໜືອຫວຽດນາມໃນວັນທີ 17-81 ກັນຍາ ແລະ ຜ່ານພາກເໜືອຂອງລາວ, ຊຶ່ງຈະເຮັດໃຫ້ມີຝົນຕົກ ແລະ ລົມແຮງຢູ່ເຂດພາກເໜືອ ແລະ ພາກກາງ ເຊັ່ນ: ຜົ້ງສາລີ, ຊຽງຂວາງ, ຫົວພັນ, ຫລວງນໍ້າທາ, ຫລວງພະບາງ, ອຸດົມໄຊ, ບໍ່ແກ້ວ, ໄຊຍະບູລີ, ໄຊສົມບູນ, ແຂວງວຽງຈັນ, ບໍລິຄໍາໄຊ, ຄໍາມ່ວນ, ສະຫວັນນະເຂດ ແລະ ນະຄອນຫລວງວຽງຈັນ, ອາດເກີດນໍ້າຖ້ວມ, ນໍ້າປ່າໄຫລຊຸ ແລະ ດິນເຈື່ອນ, ດັ່ງນັ້ນ ຈຶ່ງເຕືອນໃຫ້ປະຊາຊົນໃນທົ່ວປະເທດມີຄວາມພ້ອມຮັບມືຕໍ່ສະພາບອາກາດດັ່ງກ່າວ, ພ້ອມເກັບມ້ຽນສິ່ງຂອງມີຄ່າ, ສັດລ້ຽງໄປໄວ້ບ່ອນປອດໄພ ແລະ ໃຫ້ຕິດຕາມສະພາບສະພາບອາກາດ ແລະ ລະດັບນໍ້າຈາກກົມອຸຕຸນິຍົມ ແລະ ອຸທົກກະສາດເປັນປະຈໍາ.
