ທະນາຄານກາງຕວກກີຂຶ້ນດອກເບ້ຍອີກ 6,25% ດັນເງິນລີຣາແຂງຄ່າທັນທີ
ທະນາຄານກາງຕວກກີຂຶ້ນອັດຕາດອກເບ້ຍຊື້ຄືນພັນທະບັດໄລຍະ 1 ອາທິດ ເຊິ່ງເປັນດອກເບ້ນນະໂຍບາຍອີກ 6,25% ເປັນ 24% ສົ່ງຜົນໃຫ້ເງິນລີຣາແຂງຄ່າຂຶ້ນທັນທີ.
ການຕັດສິນໃຈຂອງທະນາຄານກາງຕວກກີຫລຸດຜ່ອນຄວາມກັງວົນຂອງນັກລົງທຶນເລື່ອງປະທານາທິບໍດີ ເຣເຈຟ ທາຍຍິບ ແອໂດອານ ມີອິດທິພົນຕໍ່ຄວາມເປັນອິດສະຫລະຂອງທະນາຄານກາງ ເພາະທ່ານຮຽກຮ້ອງໃຫ້ຫລຸດອັດຕາດອກເບ້ຍມາໂດຍຕະຫລອດ ໂດຍການອ້າງວ່າເປັນສາເຫດທີ່ເຮັດໃຫ້ອັດຕາເງິນເຟີ້ສູງ ໂດຍໃນເດືອນສິງຫາສູງເຖິງ 17,9% ສູງທີ່ສຸດນັບແຕ່ປີ 2003. ຣອຍເຕີສຳຫລວດນັກເສດຖະສາດ 11 ທ່ານ ເຫັນກົງກັນວ່າ: ທະນາຄານກາງຕວກກີຈະເຂັ້ມງວດນະໂຍບາຍການເງິນ ແລະ ອາດຈະຂຶ້ນດອກເບ້ຍນັບແຕ່ 2,25-7,25% ເພາະຕ້ອງສ້າງສົມດູນລະຫວ່າງການຮັກສາຄ່າເງິນກັບການປະຄັບປະຄອງການເຕີບໃຫຍ່ທາງເສດຖະກິດທີ່ສ່ຽງຫລຸດລົງ.
ການປະກາດຂຶ້ນອັດຕາດອກເບ້ຍນະໂຍບາຍເຮັດໃຫ້ເງິນຕວກກີແຂງຄ່າຂຶ້ນຈາກ 6.4176 ລີຣາຕໍ່ໂດລາສະຫະລັດ ເປັນ 6,01 ລີຣາຕໍ່ໂດລາສະຫະລັດທັນທີ. ເງິນລີຣາທຽບໃສ່ໂດລາສະຫະລັດອ່ອນຄ່າແລ້ວ 40% ນັບຈາກຕົ້ນປີ ເພາະນັກລົງທຶນກັງວົນວ່າປະທານາທິບໍດີມີອິດທິພົນຕໍ່ນະໂຍບາຍການເງິນ ແລະ ການທີ່ຕວກກີມີຂໍ້ຂັດແຍ່ງການທູດກັບອາເມລິກາເລື່ອງຄວບຄຸມຕົວບາດຫລວງອາເມລິກາຂໍ້ຫາພົວພັນກໍ່ການຮ້າຍ.
ສ່ວນປະທານາທິບໍດີ ແອໂດອານ ກ່າວຕໍ່ກອງປະຊຸມສະຫະພັນຜູ້ຄ້າໃນວັນດຽວກັນວ່າ: ຕໍ່ໄປນີ້ການຈຳໜ່າຍອະສັງຫາລິມະຊັບ, ການເຮັດສັນຍາເຊົ່າ ແລະ ທຸລະກຳເຊົ່າຊັບຈະຕ້ອງເປັນສະກຸນເງິນລີຣາເທົ່ານັ້ນ, ຄົນໃນຕວກກີທຸກຄົນບໍ່ຄວນໃຊ້ສະກຸນເງິນຕ່າງປະເທດ ຍົກເວັ້ນຜູ້ນຳເຂົ້າ ແລະ ຜູ້ສົ່ງອອກ. ນັກເສດຖະສາດ ແລະ ຜູ້ຄ້າບໍ່ຄິດວ່າມາດຕະການນີ້ຈະຊ່ວຍຮັກສາເງິນລີຣາໄດ້ໃນໄລຍະຍາວ, ແຕ່ຈະເປັນອຸປະສັກຕໍ່ການຄາດຄະເນທາງການຄ້າ ແລະ ເພີ່ມພາລະໃຫ້ທຸລະກິດທີ່ມີໜີ້ສິນເປັນສະກຸນເງິນຕ່າງປະເທດ.
