ຜູ້ຊາຍມັກກິນຜັກ – ໝາກໄມ້ມີກິ່ນໂຕດຶງດູດແມ່ຍິງໄດ້ຫລາຍກວ່າ

ເປັນທີ່ຮູ້ຈັກກັນມາດົນແລ້ວວ່າກິ່ນເຫື່ອ ຫລື ກິ່ນໂຕເປັນສິ່ງທີ່ດຶງດູດໃຈເພດກົງຂ້າມໄດ້, ແຕ່ຜົນການສຶກສາໃໝ່ລ້າສຸດລົງເລິກ ລາຍລະອຽດໄປຫລາຍກ່ວານັ້ນ ເມື່ອພົບວ່າກິ່ນໂຕຂອງຜູ້ຊາຍທີ່ເນັ້ນການກິນຜັກ ແລະ ໝາກໄມ້ຈະສາມາດດຶງດູດໃຈແມ່ຍິງໄດ້ ຫລາຍກ່ວາ.

ໂດຍທີມວິໄຈຈາກມະຫາວິທະຍາໄລແມັກໄກວໃນອົດສະຕຣາລີ ໄດ້ໃຫ້ກຸ່ມໂຕຢ່າງຜູ້ຊາຍສຸຂະພາບດີທີ່ຮ່ວມການວິໄຈຕອບແບບສອບຖາມກ່ຽວກັບອາຫານທີ່ກິນ ຈາກນັ້ນໃຫ້ເຂົ້າຮ່ວມການທົດລອງດ້ວຍກັນ 2 ແບບ ເພື່ອວັດແທກຜົນ ເຊິ່ງການທົດລອງແບບທຳອິດຈະໃຊ້ເຄື່ອງວັດແທກຄ່າການດູດກືນແສງ (spectrophotometer) ເພື່ອຫາຄ່າສານແຄໂຣທີນອຍ (carotenoid) ໃນຜິວໜັງ.

ຜົນປະກົດວ່າ : ຜູ້ຊາຍທີ່ດຶງ ດູດໃຈໄດ້ຫລາຍກ່ວາ ເປັນຄົນທີ່ມີລະດັບແຄໂຣທີນອຍສູງ ເຊິ່ງແຄໂຣທີນອຍເປັນສານເຄມີທີ່ພົບ ຫລາຍໃນຜັກ ແລະ ໝາກໄມ້ທ່ີມີສີແດງ, ສີສົ້ມ ແລະ ສີເຫລືອງ ນັ້ນໝາຍຄວາມວ່າຄົນທີ່ກິນຜັກ ແລະ ໝາກໄມ້ໃນປະລິມານທີ່ຫລາຍພໍຈະມີຄ່າແຄໂຣທີນອຍສູງໄປນຳ.

ໃນຂະນະທີ່ການທົດລອງແບບທີສອງ ຜູ້ຮ່ວມການວິໄຈຈະອອກກຳລັງກາຍໂດຍນຸ່ງເສື້ອຍືດທີ່ທີມງານວິໄຈຈັດໄວ້ໃຫ້ ຈົນກະທັ້ງມີເຫື່ອອອກ ຈາກນັ້ນ ທີມວິໄຈຈະທົດສອບກິ່ນໂຕໂດຍການໃຫ້ແມ່ຍິງດົມເສື້ອທີ່ຜ່ານການອອກກຳລັງກາຍແລ້ວລະບຸວ່າເສື້ອຍືດໂຕໃດມີກິ່ນດີທີ່ສຸດ ເຊິ່ງປະກົດວ່າ : ເສື້ອຍືດທີ່ຖືກເລືອກມາຈາກຜູ້ຊາຍທີ່ເນັ້ນກິນຜັກ ແລະ ໝາກໄມ້ຖືກເລືອກມາຫລາຍທີ່ສຸດ.

ນອກຈາກນີ້, ຍັງພົບຕື່ມວ່າ : ຄົນທີ່ກິນຊີ້ນສັດໃນປະລິມານອ່າວຫລາຍ ຫລື ກິນເປັນປະຈຳ ຈະມີກິ່ນໂຕທີ່ແຮງກ່ວາ, ແຕ່ບໍ່ໄດ້ໝາຍຄວາມວ່າເປັນກິ່ນທີ່ບໍ່ດີ. ສ່ວນຄົນທີ່ເນັ້ນກິນອາຫານທີ່ມີຄາໂບໄຮເດຣດໃນປະລິມານທີ່ຫລາຍ ກິ່ນໂຕທີ່ດຶງດູດໃຈເພດກົງກັນຂ້າມແມ່ນມີໜ້ອຍທີ່ສຸດ.

ອາຫານທີ່ມີແຄໂຣທີນອຍອ່າວຫລາຍແມ່ນຜັກ ແລະ ໝາກໄມ້ທີ່ມີສີສົ້ມ, ສີແດງ, ສີເຫລືອງ ເຊັ່ນ : ຫົວກະຫລົດ, ໝາກອຶ, ໝາກເລັ່ນ, ໝາກສາລີ, ໝາກເຜັດໃຫຍ່, ໝາກມ່ວງ, ໝາກນັດ, ໝາກໂມ, ໝາກຫຸ່ງ, ໝາກຖົ່ວລຽນ, ໝາກແຕງແຄນຕາລູບ ແລະ ໝາກກ້ວຍ…