ນາຍົກລັດຖະມົນຕີເຂົ້າຢ້ຽມຂໍ່ານັບເລຂາທິການໃຫຍ່ພັກຄອມມູນິດຫວຽດນາມ

ໃນໂອກາດເຂົ້າຮ່ວມກອງປະຊຸມເວທີປືກສາຫາລືເສດຖະກິດໂລກກ່ຽວກັບອາຊຽນຄັ້ງທີ 27 ທີ່ຮ່າໂນ້ຍ ໃນຕອນເຊົ້າວັນທີ 13 ກັນຍານີ້, ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ ໄດ້ນໍາພາຄະນະເຂົ້າຢ້ຽມຂໍ່ານັບສະຫາຍ ຫງວຽນ ຟູ ຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມຢູ່ທີ່ນະຄອນຫລວງຮ່າໂນ້ຍ. ໃນໂອກາດດັ່ງກ່າວ, ສະຫາຍ ຫງວຽນ ຟູ ຈ້ອງ ກໍໄດ້ສະແດງຄວາມຍີ່ນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ສະຫາຍນາຍົກລັດຖະມົນຕີ ແຫ່ງ ສປປ ລາວ ແລະ ຄະນະ ທີ່ໄດ້ເດີນທາງມາເຂົ້າຮ່ວມກອງປະຊຸມສໍາຄັນນີ້, ເຊິ່ງເປັນຂີດໝາຍອັນສຳຄັນປະກອບສ່ວນເຂົ້າໃນການຮັດແໜ້ນສາຍພົວພັນພິເສດ ແລະ ການຮ່ວມມືຮອບດ້ານ, ລະຫວ່າງສອງພັກ, ສອງລັດ ແລະ ປະຊາຊົນສອງຊາດຫວຽດນາມ-ລາວ ທີ່ມີມາແຕ່ດົນນານນັ້ນໄດ້ນັບມື້ກ້າວສູ່ລວງເລິກ, ການຊ່ວຍເຫຼືອເຊິ່ງກັນ ແລະ ກັນ ໃນວຽກງານຕ່າງໆໃຫ້ແຕກດອກອອກຜົນຍີ່ງໆຂື້ນ. ໃນໂອກາດນີ້, ສະຫາຍ ທອງລຸນ ສີສຸລິດ ກໍໄດ້ສະແດງຄວາມຂອບໃຈຢ່າງຈິງໃຈມາຍັງສະຫາຍເລຂາທິການໃຫຍ່ ຫງວຽນ ຟູ ຈ້ອງ ທີ່ໄດ້ສະລະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນ, ພ້ອມທັງສະແດງຄວາມຂອບໃຈຢ່າງສູງມາຍັງ ພັກ-ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ປະຊາຊົນລາວຕະຫລອດມາ, ໂດຍສະເພາະແມ່ນການຊ່ວຍເຫລືອປະຊາຊົນເມືອງສະໜາມໄຊ, ແຂວງອັດຕະປື ທີ່ໄດ້ຮັບຜົນກະທົບຈາກຄູກັ້ນນໍ້າເຂື່ອນໄຟຟ້າ ເຊປຽນ-ເຊນໍ້ານ້ອຍ ແຕກໃນທ້າຍເດືອນກໍລະກົດຜ່ານມາ.

ໃນຕອນເຊົ້າຂອງວັນດຽວກັນ, ສະຫາຍ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ກໍໄດ້ນຳພາຄະນະຜູ້ແທນເຂົ້າພົບປະສອງຝ່າຍກັບ ສະຫາຍ ຫງວຽນ ຊວນ ຟຸກ ນາຍົກລັດຖຖະມົນຕີແຫ່ງ ສສ.ຫວຽດນາມ. ສະຫາຍ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ຜົນສຳເລັດອັນຈົບງາມໃນການເປັນເຈົ້າພາບຈັດກອງປະຊຸມເວທີປຶກສາຫາລືເສດຖະກິດໂລກວ່າດ້ວຍອາຊຽນ ທີ່ຮ່າໂນ້ຍ, ຊຶ່ງເປັນການປະກອບສ່ວນຍົກສູງຖານະບົດ ບາດ, ຊື່ສຽງຂອງ ສສ.ຫວຽດນາມ ຢູ່ໃນເວທີສາກົນຂື້ນອີກບາດກ້າວໜື່ງ. ການພົບປະສອງຝ່າຍໃນຄັ້ງນີ້ ເປັນການພົບປະປົກກະຕິໃນທຸກໆກອງປະຊຸມທີ່ສຳຄັນໃນພາກພື້ນ ແລະ ສາກົນ, ເຊີ່ງສະແດງເຖີງມູນເຊື້ອສາຍພົວພັນພິເສດ ແລະ ຮ່ວມມືລະຫວ່າງສອງຊາດລາວ-ຫວຽດນາມ ໃຫ້ນັບມື້ມີປະສິດທິຜົນ ແລະ ໄດ້ຕີລາຄາສູງຕໍ່ຄວາມພະຍາຍາມຂອງສະຫາຍນາຍົກລັດ ຖະມົນຕີ ແລະ ພັກ-ລັດຖະບານຫວຽດນາມ ທີ່ໄດ້ເອົາໃຈໃສ່ສ້າງເງື່ອນໄຂອຳນວຍຄວາມສະດວກ ແລະ ໃຫ້ການຊ່ວຍເຫຼືອເພື່ອການພັດທະນາແກ່ ສປປ ລາວ ມາຕະຫຼອດ, ພ້ອມທັງເຊື່ອໜັ້ນວ່າສອງນາຍົກພວກເຮົາຈະພ້ອມກັນເຮັດວຽກຮ່ວມກັນບົນຈິດໃຈການຕົກລົງຂອງສອງພັກ, ສອງລັດ ແລະ ສັນຍາຕ່າງໆທີ່ສອງຝ່າຍໄດ້ລົງນາມຮ່ວມກັນ.

ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ໄດ້ສະແດງຄວາມຮູ້ບຸນຄຸນ ແລະ ຄວາມຂອບໃຈຢ່າງຈິງໃຈມາຍັງພັກ, ລັດຖະບານ ແລະ ປະຊາຊົນ ຫວຽດນາມ ອ້າຍນ້ອງ ທີ່ໄດ້ສົ່ງຄວາມເຫັນອົກເຫັນໃຈ ແລະ ການຊ່ວຍເຫຼືອເປັນເງີນ, ວັດຖຸສິ່ງຂອງບັນເທົາທຸກ, ທີມກູ້ໄພ, ແພດໝໍ ແລະ ອຸປະກອນຕ່າງໆໄປຊ່ວຍໄປຊ່ວຍເຫຼືອຕໍ່ເຫດການໄພພິບັດຢູ່ແຂວງ ອັດຕະປືໄດ້ທັນການ, ໃນຂະນະທີ່ປະຊາຊົນຫວຽດນາມ ກໍປະສົບໄພທໍາມະຊາດອັນຮ້າຍແຮງ, ມີຝົນຕົກໜັກ ຢູ່ຫຼາຍແຂວງພາກເໜືອຂອງຫວຽດນາມເຊັ່ນດຽວກັນ, ພ້ອມນີ້ສະຫາຍ ທອງລຸນ ສີສຸລິດ ໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມເຫັນອົກເຫັນໃຈມາຍັງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງມານະໂອກາດນີ້ດ້ວຍ.