ເນື່ອງໃນວັນເຮັດຄວາມສະອາດໂລກ (World Cleaning Day)
ວັນທີ 15 ກັນຍາຂອງທຸກໆປີເປັນ “ວັນເຮັດຄວາມສະອາດໂລກ” ເຊິ່ງໃນປີນີ້ຜູ້ຂຽນ ໄດ້ມີໂອກາດສໍາພາດກັບທ່ານ ປັນຍາສະໄຫວ ຣັຖະເສນາ ຜູ້ກໍ່ຕັ້ງ “ກຸ່ມອາສາດ້ວຍໃຈ ຮັກຄວາມສະອາດ” ມີຊື່ຫຍໍ້ວ່າ “ກຈອ” ທີ່ເຄື່ອນໄຫວນັບແຕ່ເດືອນກຸມພານີ້ ເປັນຕົ້ນມາ ແລະ ກໍມີກະແສຕອບຮັບ ແລະ ມີຄວາມຄິດເຫັນທີ່ຫລາກຫລາຍແງ່ມູມຈາກມວນຊົນ, ໃນວຽກງານເຮັດຄວາມສະອາດ (ເກັບຂີ້ເຫຍື້ອ) ຂອງ ກຈອ ນັບມື້ແຜ່ຫລາຍ, ໂດຍຜ່ານການແນະນໍາ, ການອຸປະຖໍາຈາກສັງຄົມ, ເຄື່ອງຮັບໃຊ້ອື່ນໆອີກ ສ່ວນໃຫຍ່ເປັນເລື່ອງຕັ້ງໜ້າທາງດ້ານບວກ.
ທ່ານ ປັນຍາສະໄຫວ ຣັຖະເສນາ ໃຫ້ຮູ້ວ່າ: ກຈອ ບໍ່ແມ່ນອົງກອນ-ບໍ່ຂຶ້ນກັບການຈັດຕັ້ງ ຫລື ພາກສ່ວນໃດ ເປັນ ຄວາມສະໝັກດ້ວຍໃຈຂອງບຸກຄົນ, ກຸ່ມຄົນຈໍານວນໜ້ອຍໜຶ່ງທີ່ມີເປົ້າໝາຍທິດທາງດຽວກັນຄື: ຢາກເຫັນສັງຄົມ, ຊຸມຊົນ, ບ້ານ, ເມືອງ ແລະ ປະເທດ ມີຄວາມສະອາດສວຍງາມ ຄືກັບບັນດາປະເທດທີ່ພັດທະນາແລ້ວ; ການຈັດຕັ້ງ ແລະເຄື່ອນໄຫວຂອງ ກຈອ ບໍ່ແມ່ນບຸກຄົນ ຫລຶ ກຸ່ມຄົນເຮັດຄວາມສະອາດ ຫຼື ຜູ້ອະນາໄມອາຊີບ, ບໍ່ມີຄ່າຈ້າງແຮງງານ ຈາກການເຮັດກິດຈະກໍາເກັບຂີ້ເຫຍື້ອ, ບໍ່ຫວັງຜົນຕອບແທນຈາກສັງຄົມ ຫຼື ພາກສ່ວນໃດໆທັງນັ້ນ, ທຸກຄົນເຮັດດ້ວຍໃຈ ເພື່ອຜົນປະໂຫຍດຂອງສ່ວນລວມ, ສັງຄົມ ແລະ ເປັນການຕອບແທນບຸນຄຸນຂອງແຜ່ນດິນແມ່ຖິ່ນໃຫ້ກໍາເນີດຊີ ວິດຂອງພວກເຮົາ.
ຜ່ານການປະຕິບັດໂຕຈິງເປັນເວລາ 8 ເດືອນກວ່າ (ເດືອນກຸມພາ-ກັນຍາ 2018) ມານີ້; ການຮັກສາຄວາມສະອາດ ເກັບຂີ້ເຫຍື້ອຕາມສະຖານທີ່ສາທາລະນະ ຖືວ່າເປັນເລື່ອງໜ້າຍິນດີ ງົດງາມ ທີ່ທຸກຄົນ, ທຸກເພດທຸກໄວໃນສັງຄົມ ສາມາດເຮັດໄດ້ ຫຼື ກິດຈະກໍາອື່ນໆທີ່ສ້າງສັນເປັນປະໂຫຍດຕໍ່ສ່ວນລວມ, ຕໍ່ຊຸມຊົນ; ແຮງບັນດານໃຈທີສອງ ກໍ່ຄືລັດຖະບານແຫ່ງ ສປປ ລາວ ໄດ້ອອກນະໂຍບາຍສົ່ງເສີມທຸລະກິດການທ່ອງທ່ຽວ ໂດຍໄດ້ກໍານົດເອົາປີ 2018 ເປັນປີທ່ອງທ່ຽວຂອງ ສປປ ລາວ ເຊິ່ງເລັ່ງປັບປຸງສິ່ງອໍານວຍຄວາມສະດວກຕ່າງໆ ເປັນຕົ້ນພື້ນຖານໂຄງລ່າງ, ບັນດາແຫຼ່ງທ່ອງສໍາຄັນ, ຊຸກຍູ້ບັນດາຫົວໜ່ວຍທຸລະກິດທີ່ກ່ຽວຂ້ອງໂດຍກົງ ແລະທາງອ້ອມ ເພື່ອຮອງຮັບນັກທ່ອງທ່ຽວໃນນີ້ວຽກງານເຮັດຄວາມສະອາດ ກໍ່ເປັນປັດໄຈພື້ນຖານຕົ້ນຕໍສໍາຄັນອັນໜຶ່ງ ທີ່ປິ່ນອ້ອມ ໂດຍສະເພາະ ການແກ້ໄຂການຖິ້ມຂີ້ເຫຍື້ອຊະຊາຍ; ແຮງບັນດານໃຈທີສາມຄື: ນະໂຍບາຍ 6 ສໍ (ສະຫວ່າງ, ສີຂຽວ, ສະ ຫງົບ, ສະເໜ່, ສະອາດ, ສີວິໄລ) ແລະສິ່ງທີ່ກ່າວມານີ້ເປັນສາເຫດຕົ້ນຕໍ ທີ່ເຮັດໃຫ້ມີການເຄື່ອນໄຫວຂອງກຸ່ມອາສາດ້ວຍໃຈຮັກຄວາມສະອາດ ຈົນຮອດປັດຈຸບັນ.
ປັດຈຸບັນ ໃນກຸ່ມມີຜູ້ເຂົ້າຮ່ວມທໍາຄວາມສະອາດ ທັງໝົດ 47 ຄົນ, ເປັນຍິງ 16 ຄົນ ທີ່ມາຈາກພາກລັດ ແລະ ພາກເອກະຊົນ ໃນນີ້: ລຸ້ນອາວຸໂສ ກວມ 10,63%, ລຸ້ນກາງ 17,02%, ລຸ້ນໜຸ່ມກວມ 72,34% ໂດຍພາຍໃຕ້ຄໍາຂວັນ: “ຕົວທ່ານສະອາດ ສັງຄົມສະອາດ ແລະ ປະເທດຊາດ ສະອາດ”; ພ້ອມນັ້ນ ຍັງມີຈຸດປະສົງປູກຝັງຈິດສໍານຶກໃຫ້ທຸກເພດໄວ, ທຸກຊັ້ນຄົນ ມີສະຕິບໍ່ຖິ້ມ ຂີ້ເຫຍື້ອຊະຊາຍຕາມສະຖານທີ່ສາທານະລະ ຫຼື ຕາມຖະໜົນຕ່າງໆໃນຕົວເມືອງ ແລະຊົນນະບົດ; ການເຮັດກິດຈະກໍາເກັບຂີ້ເຫຍື້ອ ບາງມື້ກໍ່ມີ 4-5 ຄົນ ຫຼື ຫຼາຍກວ່າ 15 ຄົນສະເລ່ຍ 5-8 ຄົນຕໍ່ວັນ ຈະຜັດປ່ຽນກັນມາໂດຍບໍ່ມີລະບຽບໃຫ້ປະຕິບັດ; ຄາດວ່າໃນຕໍ່ໜ້າ ຈະມີຜູ້ເຂົ້າຮ່ວມກິດຈະກໍາ ຕາມລະດູການ ຕາມຄວາມສະດວກຂອງໃຜລາວ; ຜ່ານໄລຍະ 8 ເດືອນກວ່າມານີ້ ກຈອ ສາ ມາດເກັບຂີ້ເຫຍື້ອໄດ້ທັງໝົດ 457 ຖົງຢ່າງໃຫຍ່ (ຂະໜາດ 36×45 ນິ້ວ ຫຼື 30×40 ນິ້ວ) ສະເລ່ຍ 57,12 ຖົງຕໍ່ເດືອນ, ໃນອະ ນາຄົດ ຈະມີແນວໂນມເພີ່ມຂຶ້ນ ຖ້າພວກເຮົາບໍ່ຮັກສາຄວາມສະອາດການເຄື່ອນໄຫວເຮັດກິດຈະກໍາຮັກສາຄວາມສະອາດ ດ້ວຍການເກັບຂີ້ເຫຍື້ອຕາມສະຖານທີ່ສາທາລະນະ ແລະ ທ້ອງຖະ ໜົນຕ່າງໆ ໂດຍສະເພາະຢູ່ບໍລິເວນແຄມຄັນຄູກັນເຈື່ອນແມ່ນໍ້າຂອງແຕ່ 3 ແຍກ ຫຼັງໂຮງແຮມດອນຈັນພາເລດສ໌ ຈົນຮອດ 3 ແຍກປາກປາສັກ ແລະ ສວນເຈົ້າອານຸວົງ ຊຶ່ງເຮັດເປັນຕົວຢ່າງ ຫຼື ເປັນຕົວແບບໃຫ້ມວນຊົນ, ກຸ່ມຄົນ ແລະ ບຸກຄົນໃນສັງຄົມໄດ້ເຫັນໂຕຈິງ ເພາະສະຖານທີ່ດັ່ງກ່າວເປັນແຫຼ່ງທ່ອງທ່ຽວໜຶ່ງທີ່ສໍາຄັນຂອງນະຄອນຫຼວງວຽງຈັນ; ພ້ອມນີ້ ຍັງມີກິດຈະກໍາສໍາຮອງໄດ້ແກ່ການເຊີນຊວນທໍາຄວາມສະອາດຜ່ານໂທລະໂຄງ, ສ້າງຄຣິບວິດີໂອສັ້ນຜ່ານສື່ສັງຄົມອອນລາຍ ແລະ ໃນຮູບແບບພິມແຜນພັບ (brochure) ຫລື ໂພດສ໌ສະເຕີ້ (posters) ກ່ຽວກັບການຮັກສາຄວາມສະອາດໃຫ້ກັບມວນຊົນ, ກຸ່ມຄົນ ແລະ ບຸກຄົນໃນສັງ ຄົມໃຫ້ມີການຫັນປ່ຽນພຶດຕິກໍາທີ່ເຄີຍຖິ້ມຂີ້ເຫຍື້ອຊະຊາຍໃຫ້ຢຸດເຊົາ ແລະ ເປັນເຈົ້າການຮັກສາຄວາມສະອາດ, ມີຄວາມຮັບຜິດ ຊອບຕໍ່ສັງຄົມຫຼາຍຂຶ້ນ.
ນອກຈາກສະຖານທີ່ດັ່ງກ່າວແລ້ວ ກຈອ ຍັງມີແຜນເຮັດກິດຈະກໍາຢູ່ສະຖານທີ່ສາທາລະນະແຫ່ງອື່ນໆເປັນ ຕົ້ນ ສວນປະຕູໄຊ (ອະນຸສາວະລີ), ຖະໜົນສາຍສໍາຄັນຂອງນະຄອນຫຼວງວຽງຈັນ, ງານບຸນປະເພນີສໍາຄັນຂອງຊາດ (ບຸນຊ່ວງເຮືອວຽງຈັນ ຫຼື ບຸນທາດຫຼວງ) ຕາມເງື່ອນໄຂ ແລະ ຄວາມເໝາະສົມ; ການປະຕິບັດວຽກ ໄດ້ແບ່ງອອກເປັນສອງໄລຍະ ຄື: ຕອນແລງແຕ່ວັນຈັນ-ວັນພະຫັດ ເຊິ່ງເລີ່ມເວລາ 17:30-20:30 ໂມງ; ໃນທຸກວັນອາທິດ ເລີ່ມເວລາ 6:30-8:30 (ແຕ່ 3 ແຍກ ຫຼັງໂຮງແຮມດອນຈັນພາເລດສ໌ ຈົນຮອດ 3 ແຍກສວນເຈົ້າອານຸວົງຕອນລຸ່ມ) ແລະ ເວລາປະຕິບັດວຽກໂຕຈິງ ອາດຈະປັບປ່ຽນໄປຕາມລະດູການໃຫ້ເໝາະສົມ.
ເນື່ອງໃນວັນເຮັດຄວາມສະອາດໂລກ (World Cleaning Day) ໃນປີນີ້, ທ່ານ ປັນຍາສະໄຫວ ຣັຖະເສນາ ຍັງໄດ້ ຮຽກຮ້ອງມາຍັງທຸກຄົນໃນສັງຄົມ ຈົ່ງຢ່າຖິ້ມຂີ້ເຫຍື້ອຊະຊາຍ ໃຫ້ຖິ້ມໃສ່ຖັງຂີ້ເຫຍື້ອ ຫຼື ຖົງຢາງທີ່ພົບເຫັນໃກ້ຕົວທ່ານ ແລະ ຍັງ ສະແດງຄວາມຊົມເຊີຍມາຍັງທຸກທ່ານທີ່ໄດ້ຕັ້ງໜ້າຈັດຕັ້ງປະຕິບັດຄໍາຂັວນ 6 ສໍ ທີ່ເຈົ້າຄອງນະຄອນຫຼວງວຽງຈັນວາງອອກ ໂດຍ ສະເພາະ ສໍ: ສະອາດ ແລະຍັງກ່າວຄໍາຂອບໃຈເປັນຢ່າງສູງມາຍັງບັນດາທ່ານທີ່ໄດ້ປະກອບສ່ວນມອບວັດຖຸສິ່ງຂອງ ເຂົ້າໃນການ ເກັບຂີ້ເຫຍື້ອໃຫ້ແກ່ “ກຸ່ມອາສາດ້ວຍໃຈ ຮັກຄວາມສະອາດ” ດ້ວຍຄວາມເຕັມໃຈ ແລະ ຈະນໍາໃຊ້ສິ່ງຂອງເຫຼົ່ານີ້ເຂົ້າໃນການຮັກສາຄວາມສະອາດໃຫ້ເກີດປະໂຫຍດ, ບ້ານເມືອງສວຍງາມ.
# ໂດຍ: ຣັດສະໝີ ດວງສັດຈະ
