ນະຄອນຫລວງມີ 124 ບ້ານໄດ້ຮັບຜົນກະທົບຈາກໄພນໍ້າຖ້ວມ
ຄະນະກໍາມະການປ້ອງກັນ ແລະ ຄວບຄຸມໄພພິບັດນະຄອນຫລວງວຽງຈັນ ໃຫ້ຮູ້ວ່າ: ພາຍຫລັງເກີດຝົນຕົກໜັກຕິດຕໍ່ຫລາຍວັນນັບແຕ່ຕົ້ນເດືອນສິງຫາເປັນຕົ້ນມາ ສົມທົບກັບການລະບາຍນໍ້າອອກຂອງເຂື່ອນຕ່າງໆ, ໄດ້ເຮັດໃຫ້ລະດັບນໍ້າຂອງ, ແມ່ນໍ້າສາຂາ ແລະ ນໍ້າງື່ມສູງຂຶ້ນໄຫລຖ້ວມເຮືອນຊານບ້ານຊ່ອງ ແລະ ພື້ນທີ່ການຜະລິດຂອງປະຊາຊົນທີ່ຢູ່ລຽບຕາມແຄມນໍ້າ ແລະ ເຂດທີ່ຕໍ່າ, ຊຶ່ງມີ 124 ບ້ານໃນ 6 ເມືອງຄື: ສີໂຄດຕະບອງ, ປາກງື່ມ, ນາຊາຍທອງ, ໄຊທານີ, ຫາດຊາຍຟອງ ແລະ ສັງທອງ, ມີປະຊາຊົນກວ່າ 5.470 ຄອບຄົວໄດ້ຮັບຜົນກະທົບ. ໃນນີ້ໄດ້ຮັບຜົນກະທົບໜັກໜ່ວງກວ່າໝູ່ແມ່ນເມືອງໄຊທານີ, ປາກງື່ມ ແລະ ຫາດຊາຍຟອງ, ເນື້ອທີ່ການຜະລິດຫລາຍກວ່າ 16.280 ເຮັກຕາໄດ້ຮັບຜົນເສຍຫາຍ, ມີໜອງປາ 4.940 ກວ່າເຮັກຕາເສຍຫາຍ, ເສັ້ນທາງ 26 ເສັ້ນ ແລະ ພື້ນຖານໂຄງລ່າງຈໍານວນໜຶ່ງເປ່ເພ. ຕໍ່ສະພາບດັ່ງກ່າວ, ໜ່ວຍງານກ່ຽວຂ້ອງຂັ້ນນະຄອນຫລວງ, ເມືອງ ສົມທົບກັບກໍາລັງທະຫານ, ຕໍາຫລວດ ໄດ້ນໍາເອົາອຸປະກອນກູ້ໄພຕ່າງໆ ເຊັ່ນ: ເຮືອ ພ້ອມດ້ວຍກົນຈັກພາຫະນະຕ່າງໆ ລົງຊ່ວຍເຫລືອປະຊາຊົນຜູ້ທີ່ໄດ້ຮັບຜົນກະທົບ ແລະ ວັດຖຸສິ່ງຂອງມີຄ່າ ພ້ອມສັດລ້ຽງຈໍານວນໜຶ່ງ ຍົກຍ້າຍມາຢູ່ບ່ອນປອດໄພ. ນອກນີ້, ພາກສ່ວນກ່ຽວຂ້ອງໄດ້ຮີບຮ້ອນລົງແກ້ໄຂຈຸດທີ່ມີນໍ້າຮົ່ວຊືມເຂົ້າສູ່ຕົວເມືອງຫລາຍກວ່າ 25 ຈຸດ, ແຈກຢາຍເຄື່ອງຊ່ວຍເຫລືອປະເພດອຸປະໂພກ-ບໍລິໂພກ ແລະ ວັດຖຸສິ່ງຂອງຈໍາເປັນຈໍານວນໜຶ່ງໃຫ້ປະຊາຊົນຜູ້ໄດ້ຮັບຜົນກະທົບ, ພ້ອມທັງສົ່ງພະນັກງານແພດໝໍລົງຕິດຕາມກວດກາສຸຂະພາບຜູ້ປະສົບໄພເປັນປະຈໍາ, ພ້ອມໄດ້ເນັ້ນໃຫ້ຄະນະກໍາມະການຂັ້ນເມືອງເພີ່ມຄວາມເອົາໃຈໃສ່ຕິດຕາມສະພາບອາກາດ ແລະ ລະດັບນໍ້າຢ່າງໃກ້ຊິດ, ໄປຄຽງຄູ່ກັບການເພີ່ມທະວີມາດຕະການປ້ອງກັນຄວາມປອດໄພທາງດ້ານຊີວິດ ແລະ ຊັບສີນຂອງຜູ້ປະສົບໄພບໍ່ໃຫ້ເກີດການຕົກເຮ່ຍເສຍຫາຍເດັດຂາດ, ພ້ອມທັງເລັ່ງເກັບກໍາຜົນເສຍຫາຍຢ່າງລະອຽດ ເພື່ອວາງແຜນໃຫ້ການຊ່ວຍເຫລືອ, ຟື້ນຟູຜົນກະທົບທັງສະເພາະໜ້າ ແລະ ຍາວນານ ເພື່ອຮັບປະກັນໃຫ້ການດໍາລົງຊີວິດຂອງປະຊາຊົນກັບຄືນສູ່ປົກກະຕິໂດຍໄວ.
