ຈີນຫາທາງຄວບຄຸມ ອະຫິວາໝູອາຟຣິກາລະບາດ
ຈີນກຳລັງຫາທາງຄວບຄຸມສະຖານະການອະຫິວາໝູອາຟຣິກາລະບາດ, ພາຍຫລັງພົບການລະບາດ 14 ແຫ່ງພາຍໃນເວລາເດືອນດຽວ. ຂະນະທີ່ມີກະແສກັງວົນວ່າ: ພະຍາດອາດລະບາດມາອາຊີຕາເວັນອອກສຽງໃຕ້ແລ້ວ.
ທາງການຈີນຂໍໃຫ້ຜູ້ລ້ຽງໝູ ແລະ ສັດຕະວະແພດແຈ້ງເຈົ້າໜ້າທີ່ທັນທີທີ່ພົບໝູບໍ່ສະບາຍ ເພື່ອຄວບຄຸມອັດຕາການຕິດເຊື້ອ, ພ້ອມກັບແຈກຢາຍປ້າຍໂຄສະນາຕາມຟາມໝູແນະນຳເລື່ອງການສັງເກດອາການໝູຕິດເຊື້ອ ແລະ ມາດຕະການປ້ອງກັນເຊື້ອແຜ່ລະບາດ. ນອກຈາກນີ້ ຍັງຫ້າມແຂວງທີ່ແຈ້ງພົບການລະບາດເຄື່ອນຍ້າຍໝູມີຊີວິດ. ພໍ່ຄ້າແມ່ຄ້າເປີດເຜີຍວ່າ: ເຖິງວ່າຜູ້ບໍລິໂພກບາງສ່ວນບໍ່ແຕກຕື່ນ, ແຕ່ຍອດຂາຍໝູທີ່ເປັນອາຫານຫລັກຂອງຊາວຈີນຫລຸດລົງ ຫລັງພົບການລະບາດເທື່ອທຳອິດທີ່ແຂວງຫລຽວໜິງ ທາງຕາເວັນອອກສຽງເໜືອໃນວັນທີ 1 ສິງຫາ ແລະ ຂະຫຍາຍໄປເປັນ 14 ແຂວງແລ້ວໃນປັດຈຸບັນ. ບາງພື້ນທີ່ຫ່າງກັນກວ່າ 1.000 ກິໂລແມັດ. ອົງການອາຫານ ແລະ ກະສິກຳ ແຫ່ງສະຫະປະຊາຊາດ (FAO) ແຈ້ງໃນອາທິດກ່ອນວ່າ: ຈີນກຳຈັດໝູໄປແລ້ວປະມານ 40.000 ໂຕ ເພື່ອລະງັບການແຜ່ລະບາດ.
ອົງການສຸຂະພາບສັດໂລກ ລະບຸວ່າ: ອະຫິວາໝູອາຟຣິກາເປັນພະຍາດໝູທີ່ສ້າງຄວາມເສຍຫາຍຫລາຍທີ່ສຸດ ເຮັດໃຫ້ໝູມີໄຂ້, ມີຈຸດຊ້ຳຕາມຜິວໜັງ ແລະ ອະໄວຍະວະພາຍໃນ ແລະ ຕາຍໃນ 2-10 ວັນ, ອັດຕາການຕາຍສູງເຖິງ 100%, ຕິດຕໍ່ໂດຍກົງຈາກສັດສູ່ສັດ ໂດຍມີເຫັບເປັນພາຫະນຳເຊື້ອພະຍາດ ຫລື ຕິດໄປກັບອາຫານສັດ ຫລື ຄົນປົນເປື້ອນເຊື້ອ, ບໍ່ມີວັກແຊງປ້ອງກັນ ແລະ ບໍ່ເປັນອັນຕະລາຍຕໍ່ຄົນ.
