ເອັສຊີຈີ ຄຣີນິກ ຟຸດບອນ ກິດຈະກໍາດີ ທີ່ເຍົາວະຊົນລາວໃຫ້ຄວາມສົນໃຈຫລາຍ
ທ້າຍເດືອນສິງຫາຜ່ານມາ ສະໂມສອນ ເອັສຊີຈີ ເມືອງທອງ ຢູໄນເຕັດ ໄດ້ຈັດກິດກໍາ ເອັສຊີຈີ ຄຣີນິກ ຟຸດບອນ ຂຶ້ນ ທີ່ສະໜາມກິລາ ກຸດໄລ ນະຄອນຫລວງວຽງຈັນ ເຊິ່ງມີເຍົາວະຊົນລາວລຸ້ນອາຍຸ 6-16 ປີໃຫ້ຄວາມສົນໃຈ ແລະ ເຂົ້າຮ່ວມກິດຈະກໍາຈໍານວນ 100 ກວ່າຄົນ ມາຈາກຫລາຍສະໂມສອນໃນນະຄອນຫລວງວຽງຈັນ.
ທ່ານ ອາລ໋ອບ ມະນີບົດ ປະທານອາຄາເດມີ ລ໋ອບສະເຕດ້ຽມ ໄດ້ໃຫ້ສໍາພາດວ່າ: ພາຍຫລັງໄດ້ຮູ້ວ່າທາງສະໂມສອນ ເອັສຊີຈີ ເມືອງທອງ ຢູໄນເຕັດ ຈະມີກິດຈະກໍາ ຄຣີນິກ ຟຸດບອນ ແລ້ວ ພວກເຮົາກໍໄດ້ເລີ່ມສົ່ງລາຍຊື່ນັກກິລາຂອງພວກເຮົາເຂົ້າຮ່ວມກິດຈະກໍາດັ່ງກ່າວ ເຊິ່ງການເຂົ້າຮ່ວມກິດຈະກໍານີ້ພວກເຮົາໄດ້ສົ່ງນັກກິລາທັງໝົດ 15 ຄົນໂດຍມີອາຍຸແຕ່ 6-12 ປີ, ຜ່ານການເຂົ້າຮ່ວມກິດຈະກໍາດັ່ງກ່າວເຫັນວ່ານັກກິລາຂອງຕົນເອງມີຄວາມດີໃຈເປັນພິເສດ ເພາະໄດ້ຮຽນຮູ້ບັນດາທັກສະການຫລິ້ນບານ ແລະ ໄດ້ສໍາຜັດຕົວຈິງກັບນັກກິລາບານເຕະຂອງສະໂມສອນ ເອັສຊີຈີ ເມືອງທອງ ຢູໄນເຕັດ ເຊິ່ງໄດ້ສ້າງແຮງບັນດານໃຈໃຫ້ແກ່ນັກກິລາຈໍານວນຫລາຍຄົນ. ນອກຈາກນັ້ນ, ນັກກິລາຍັງໄດ້ຮຽນຮູ້ທັກສະການຈັບບານຂັ້ນພື້ນຖານ ແລະ ການຫລິ້ນກິດຈະກໍາຮ່ວມໝູ່ຫລາຍໆຄົນ, ແຕ່ໜ້າເສຍດາຍກິດຈະກໍາດັ່ງກ່າວຈັດຂຶ້ນພຽງແຕ່ມື້ດຽວເທົ່ານັ້ນ. ດັ່ງນັ້ນ, ຈຶ່ງເຮັດໃຫ້ຄວາມລື້ງເຄີຍຂອງນັກກິລາຫລາຍຄົນ ແລະ ການຫລິ້ນຍັງບໍ່ທັນເຂົ້າກັນປານໃດ.
ທ່ານ ອຳໄພວັນ ຈັນທະລາວົງ ຄູຝຶກອາຄາເດມີ ລ້ານຊ້າງ ຢູໄນເຕັດ ໃຫ້ສໍາພາດວ່າ: ກິດຈະກໍາຄັ້ງນີ້ພວກເຮົາໄດ້ສົ່ງນັກກິລາເຂົ້າຮ່ວມທັງໝົດ 20 ຄົນ ໂດຍມີອາຍຸແຕ່ 8-13 ປີ ເຊິ່ງກິດຈະກໍາດັ່ງກ່າວໄດ້ສ້າງແຮງບັນດາໃຈໃຫ້ແກ່ນັກກິລາເຍົາວະຊົນຫລາຍຄົນ ຢາກເປັນນັກກິລາອາຊີບໃນອະນາຄົດ ເພາະວ່າໄດ້ຮູ້ໄດ້ເຫັນນັກກິລາໃນຄວາມຝັນຂອງຕົນເອງ ແລະ ໄດ້ຮ່ວມຝຶກຊ້ອມກັບນັກກິລາທີ່ຕົນເອງມັກ. ສໍາລັບກິດຈະກໍາຄັ້ງນີ້ ນັກກິລາອາຄາເດມີ ລ້ານຊ້າງ ຢູໄນເຕັດ ຖືວ່າໃຫ້ຄວາມສົນໃຈຫລາຍພໍສົມຄວນ ເຊິ່ງປີຜ່ານມາພວກເຮົາໄດ້ສົ່ງເຂົ້າຮ່ວມຄືກັນ ແຕ່ບໍ່ຫລາຍຄືປີນີ້. ແນວໃດກໍຕາມ ຖ້າກິດຈະກໍາດັ່ງກ່າວໄດ້ດໍາເນີນເປັນເວລາຫລາຍມື້ ມັນອາດຈະເຮັດໃຫ້ນັກກິລາຂອງພວກເຮົາໄດ້ຮຽນຮູ້ເພີ່ມທັກສະການຫລິ້ນບານຫລາຍກວ່າເກົ່າ.
ກິດຈະກໍາ ເອັສຊີຈີ ຄຣີນິກ ຟຸດບອນ ຄັບ ມີນັກກິລາເຂົ້າຮ່ວມທັງໝົດ 150 ຄົນ ໂດຍມາຈາກ 5 ພາກສ່ວນຄື: ອາຄາເດມີ ລ໋ອບສະເຕດ້ຽມ, ອາຄາເດມີ ລ້ານຊ້າງ ຢູໄນເຕັດ, ອາຄາເດມີ ວຽງຈັນ ຢູໄນເຕັດ, ອາຄາເດມີ ພີວີ ຢູໄນເຕັດ ແລະ ພາກສ່ວນຫລິ້ນກິດຈະກໍາໃນເຟສບຸກ.
