ຢູ 16 ກຽມອອກເດີນທາງເຂົ້າຮ່ວມ ແຂ່ງຂັນບານເຕະຍິງຊີງແຊ້ມອາຊີ
ນັກກິລາທີມຊາດລາວ ຢູ 16 ຍິງ ກຽມອອກເດີນທາງມື້ນີ້ ເພື່ອເຂົ້າຮ່ວມແຂ່ງຂັນບານເຕະຍິງຊີງແຊ້ມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກ 2019 AFC U-16 WOMEN’S CHAMPIONSHIP 2019 ທີ່ປະເທດມົງໂກລີ ໃນລະຫວ່າງວັນທີ 15-23 ກັນຍາ 2018 ໂດຍ ທີມຊາດລາວ ຢູ່ຮ່ວມ ກຸ່ມບີ ປະກອບມີ: ລາວ, ອິນເດຍ, ຮົງກົງ, ປາກິດສະຖານ ແລະ ມົງໂກລີ (ເຈົ້າພາບ).
ທ່ານ ນາງ ພອນທິບ ແສງມະນີ ຫົວໜ້າຄູຝຶກທີມຊາດລາວ ຢູ 16 ຍິງ ໄດ້ເວົ້າວ່າ: ພາຍຫລັງທີ່ໄດ້ເກັບຕົວທີ່ປະເທດຍີ່ປຸ່ນເປັນເວລາ 1 ອາທິດແລ້ວ ເຫັນວ່ານັກກິລາຂອງພວກເຮົາມີຄວາມພ້ອມຢ່າງເຕັມທີ່ ເຊິ່ງການເດີນທາງເຂົ້າຮ່ວມແຂ່ງຂັນບານເຕະຍິງຊີງແຊ້ມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກ 2019 AFC U-16 WOMEN’S CHAMPIONSHIP 2019 ທີ່ປະເທດມົງໂກລີ ກໍານົດເອົາວັນທີ 13 ກັນຍານີ້ ໂດຍນໍາພາຂອງທ່ານ ຈັນທະວົງ ສິຣິມະໂນທຳ ຜູ້ຈັດການທີມ ແລະ ນັກກິລາຈໍານວນ 23 ຄົນທີ່ຜ່ານການຄັດເລືອກໃນທ້າຍເດືອນກໍລະກົດເປັນຕົ້ນມາ.
ສໍາລັບຕາຕະລາງການແຂ່ງຂັນບານເຕະຍິງຊີງແຊ້ມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກ 2019 AFC U-16 WOMEN’S CHAMPIONSHIP 2019 ຂອງທີມຊາດລາວ ຈະລົງສະໜາມ 4 ຄັ້ງຄື: ວັນທີ 17 ກັນຍາ ເວລາ 13:00 ໂມງ ພົບ ປາກິດສະຖານ; ວັນທີ 19 ກັນຍາ ເວລາ 17:00 ໂມງ ພົບ ມົງໂກລີ; ວັນທີ 21 ກັນຍາ ເວລາ 13:00 ໂມງ ພົບ ຮົງກົງ; ວັນທີ 23 ກັນຍາ ເວລາ 17:00 ໂມງ ພົບ ອິນເດຍ ເຊິ່ງການແຂ່ງຂັນແຕ່ລະຄັ້ງຢູ່ສະໜາມ MFF Stadium, Ulaanbaatar.
