ລັດຖະບານລາວປະດັບຫຼຽນກາແຮງງານໃຫ້ສາສະດາຈານມະຫາວິທະຍາໄລໂກເບະ ທີ່ໄດ້ປະກອບສ່ວນຊ່ວຍເຫຼືອການສຶກສາລາວ
ໃນວັນທີ 10 ກັນຍານີ້, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ຕາງໜ້າໃຫ້ລັດຖະບານລາວ ປະດັບຫຼຽນກາແຮງງານໃຫ້ແກ່ ທ່ານ ເຄອິຊິ ໂອກາວາ ສາສະດາຈານມະຫາວິທະຍາໄລ ໂກເບະ ຊຶ່ງເປັນຜູ້ໜຶ່ງທີ່ໄດ້ປະກອບສ່ວນຊ່ວຍເຫຼືອວຽກງານການສຶກສາຂອງລາວ.
ຊຶ່ງໃນໄລຍະຜ່ານມາທ່ານ ເຄອິຊິ ໂອກາວາ ໄດ້ປະກອບສ່ວນສົ່ງເສີມການພັດທະນາຄວາມອາດສາມາດດ້ານການວິໄຈ, ພັດທະນາຊັບພະຍາກອນມະນຸດ ໂດຍຜ່ານກຸ່ມບໍລິສັດ Jo Bounmy ຕັ້ງແຕ່ປີ 2004 ເປັນຕົ້ນມາ. ຕະຫຼອດໄລຍະ 14 ປີ ທ່ານໄດ້ປະສານທຶນການສຶກສາແກ່ນັກສຶກສາລາວ ຈໍານວນ 50 ທຶນ ໃນລະດັບປະລິນຍາໂທ ແລະ ປະລິນຍາເອກຢູ່ 3 ມະຫາວິທະຍາໄລຄື: ມະຫາວິທະຍາໄລແຫ່ງຊາດ, ມະຫາວິທະຍາໄລສຸພານຸວົງ ແລະ ມະຫາວິທະຍາໄລຈໍາປາສັກ. ນອກນີ້, ທ່ານຍັງໄດ້ຈັດສໍາມະນາດ້ານວິຊາການໃຫ້ແກ່ພະນັກງານຄູ, ພະນັກງານວິໄຈຂອງຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ, ເພື່ອພັດທະນາຄວາມສາມາດດ້ານການວິໄຈ. ພ້ອມທັງໄດ້ສົ່ງເສີມໃຫ້ນັກສຶກສາລາວໃນມະຫາວິທະຍາໄລ ແລະ ອົງການຈັດຕັ້ງລັດ ໄດ້ຮັບທຶນການສຶກສາ MEXT, ADB ແລະ JDS ເພື່ອໄປຮຽນທີ່ຕໍ່ຢູ່ປະເທດຍີ່ປຸ່ນ ແລະ ປະເທດອື່ນໆ. ບໍ່ພຽງແຕ່ເທົ່ານັ້ນ, ທ່ານຍັງໄດ້ຮ່າງ MOU ວ່າດ້ວຍການຮ່ວມມືລະຫວ່າງກົມການສຶກສາຊັ້ນສູງ, ກະຊວງສຶກສາທິການ ແລະ ກິລາ ກັບມະຫາວິທະຍາໄລ ໂກເບະ, ເພື່ອຈັດສົ່ງພະນັກງານທີ່ໄດ້ຮັບທຶນການສຶກສາຂອງ ADB ໄປສຶກສາທີ່ມະຫາວິທະຍາໄລ ໂກເບະ ໃນລະດັບປະລິນຍາໂທ ແລະ ປະລິນຍາເອກ. ໄດ້ສະໜອງທຶນເຝິກອົບຮົມ 6 ອາທິດ ກ່ຽວກັບການສຶກສາ ດ້ານການເງິນ ແລະ ການບໍລິຫານຢູ່ ມະຫາວິທະຍາໄລ ໂກເບະ ໃຫ້ພະນັກງານກະຊວງສຶກສາທິການ ແລະ ກິລາ ເພື່ອເພີ່ມຄວາມສາມາດດ້ານການສ້າງນະໂຍບາຍ ແລະ ການວາງແຜນການສຶກສາ, ເຊິ່ງສາມາດຫຼຸດຜ່ອນລາຍຈ່າຍເຖິງ 8 ຕື້ກວ່າກີບ (1ລ້ານໂດລາສະຫະລັດ). ຈາກຜົນງານດັ່ງກ່າວ ໂດຍເຫັນວ່າ ທ່ານ ສຈ. ເຄອິຊິ ໂອກາວາ ໄດ້ເອົາໃຈໃສ່ ທຸ່ມເທແຮງກາຍແຮງໃຈຊ່ວຍເຫຼືອພະນັກງນຄູອາຈານ ເປັນຕົ້ນແມ່ນການຍົກລະດັບຄວາມຮູ້ຄວາມສາມາດໃນລະດັບປະລິນຍາໂທ ແລະ ປະລິນຍາເອກທັງພາຍໃນ ແລະ ຕ່າງປະເທດ, ພັດທະນາຄວາມສາມາດດ້ານການຄົ້ນຄວ້າວິໄຈ ແລະ ດ້ານນະໂຍບາຍຕ່າງໆໃນຂະແໜງການສຶກສາໃຫ້ສອດຄ່ອງກັບພາກພື້ນ ແລະ ສາກົນຕະຫຼອດມາ. ດັ່ງນັ້ນ, ລັດຖະບານລາວ ຈຶ່ງປະດັບຫຼຽນກາແຮງງານນີ້ ໃຫ້ກັບທ່ານ ສສສະດາຈານ ເຄອິຊິ ໂອກາວາ ຢ່າງສົມກຽດ.
