ຮ່ວມແຮງຮ່ວມໃຈສ້າງປະຊາຄົມອາຊຽນ ໃນສະໄໝການປະຕິວັດອຸດສາຫະກຳ 4.0
ໃນສະພາບການນັ້ນ, ບັນດາປະເທດອາຊຽນພວມຕັ້ງໜ້າເຄື່ອນໄຫວ, ຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ຍາດແຍ່ງກາລະໂອກາດເພື່ອພັດທະນາ.
ຮ່ວມແຮງຮ່ວມໃຈສ້າງປະຊາຄົມອາຊຽນໃນສະໄໝການປະຕິວັດອຸດສາຫະກຳ 4.0 ແມ່ນຫົວຂໍ້ບົດຂຽນຂອງທ່ານນາຍົກລັດຖະມົນຕີ ຫງວຽນຊວນຟຸກ ເນື່ອງໃນໂອກາດກອງປະຊຸມເວທີປາໄສເສດຖະກິດໂລກ ກ່ຽວກັບອາຊຽນ (WEF SAEAN 2018) ເຊິ່ງໄຂຂຶ້ນໃນວັນທີ 11 ກັນຍານີ້ ຢູ່ນະຄອນຫລວງຮ່າໂນ້ຍ ສສ ຫວຽດນາມ.
ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນວ່າ: ໂລກປັດຈຸບັນພວມມີການຫັນປ່ຽນຢ່າງວ່ອງໄວ ພາຍໃຕ້ຜົນກະທົບຈາກການຫັນເປັນໂລກາພິວັດ, ການພັດທະນາກະໂດດຂັ້ນຂອງວິທະຍາສາດເຕັກໂນໂລຊີ, ການປະຕິວັດອຸດສາຫະກຳ 4.0. ໃນສະພາບການນັ້ນ, ບັນດາປະເທດອາຊຽນພວມຕັ້ງໜ້າເຄື່ອນໄຫວ, ຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ຍາດແຍ່ງກາລະໂອກາດເພື່ອພັດທະນາ, ຫັນວິໄສທັດປະຊາຄົມອາຊຽນ 2025 ໃຫ້ປາກົດຜົນເປັນຈິງ, ມຸ່ງໄປເຖິງການສ້າງປະຊາຄົມອາຊຽນໝັ້ນຄົງເຂັ້ມແຂງ ແລະ ເສີມຂະຫຍາຍບົດບາດໃຈກາງໃນບັນດາກົນໄກພາກພື້ນ ແລະ ສາກົນກວ່າອີກ.
ທ່ານນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າ: ໃນຖານະເປັນປະເທດເຈົ້າພາບເວທີປາໄສເສດຖະກິດໂລກ ກ່ຽວກັບອາຊຽນ ປີ 2018 (WEF ASEAN 2018), ຫວຽດນາມ ມີຄວາມຮັບຜິດຊອບພ້ອມກັບເວທີປາໄສເສດຖະກິດໂລກ (WEF) ແລະ ບັນດາປະເທດອາຊຽນສຸມໃສ່ປຶກສາຫາລືບັນດາບັນຫາສຳຄັນ ແລະ ການສ້າງຕັ້ງບັນດາແນວຄິດ, ການກຳນົດທິດໃຫຍ່ກ່ຽວກັບການພັດທະນາຂອງບັນດາປະເທດອາຊຽນໃນການປະຕິວັດອຸດສາຫະກຳ 4.0 ເພື່ອແນໃສ່ປະກອບສ່ວນປະຕິບັດສຳເລັດວິໄສທັດອາຊຽນ 2025 ເພື່ອຜົນປະໂຫຍດ ແລະ ການພັດທະນາຂອງທົ່ວພາກພື້ນ ແລະ ຂອງແຕ່ລະປະເທດ ອັນໄດ້ປະກອບສ່ວນໃຫ້ແກ່ຄວາມວັດທະນາຖາວອນລວມຂອງພາກພື້ນ ແລະ ຢູ່ໃນໂລກ.
ຕາມທ່ານນາຍົກລັດຖະມົນຕີ ຫງວຽນຊວນຟຸກ ແລ້ວ, ກອງປະຊຸມ WEF ASEAN 2018 ບໍ່ພຽງແຕ່ສະແດງບົດບາດເປັນເຈົ້າການ ແລະ ການປະກອບສ່ວນທີ່ມີຄວາມຮັບຜິດຊອບຂອງຫວຽດນາມສຳລັບອາຊຽນເທົ່ານັ້ນ, ຫາກຍັງຢັ້ງຢືນວິໄສທັດຍຸດທະສາດກ່ຽວກັບການພົວພັນຕ່າງປະເທດ ແລະ ການພັດທະນາຂອງພັກ ແລະ ລັດຫວຽດນາມນຳອີກ.
