ໂກນບານພິການຕາລາວຝຶກຊ້ອມທີ່ປະເທດໄທ

ນັກກິລາໂກນບານພິການຕາຍິງ-ຊາຍທີມຊາດລາວ ຝຶກຊ້ອມຢູ່ປະເທດໄທ ລະຫວ່າງວັນທີ 7-15 ກັນຍາ ເພື່ອກຽມຄວາມພ້ອມເຂົ້າຮ່ວມແຂ່ງຂັນເອຊຽນ ພາລາເກມ ທີ່ປະເທດອິນໂດເນເຊຍເປັນເຈົ້າພາບ ເຊິ່ງຈະຈັດຂຶ້ນໃນຕົ້ນເດືອນຕຸລານີ້.

ທ່ານ ລອນຄໍາ ອິນທອງໄຊ ຄູຝຶກນັກກິລາໂກນບານພິການຕາທີມຊາດລາວ ໃຫ້ສໍາພາດວ່າ: ການເຂົ້າສູນຝຶກຊ້ອມທີ່ປະເທດໄທຄັ້ງນີ້ ເພື່ອກຽມຄວາມພ້ອມນັກກິລາຂອງພວກເຮົາໃນທຸກໆດ້ານ ພ້ອມທັງຝຶກຊ້ອມທັກສະການຫລິ້ນບານໃຫ້ດີຂຶ້ນກວ່າເກົ່າ, ນອກຈາກນັ້ນ, ຍັງເປັນການກຽມຄວາມພ້ອມເຂົ້າຮ່ວມການແຂ່ງຂັນເອຊຽນ ພາລາເກມ ທີ່ປະເທດອິນໂດເນເຊຍເປັນເຈົ້າພາບ ໂດຍຈະຈັດຂຶ້ນລະຫວ່າງວັນທີ 1-14 ຕຸລານີ້. ສໍາລັບການເຂົ້າສູນຝຶກຊ້ອມທີ່ປະເທດໄທຄັ້ງນີ້ ມີນັກກິລາຊາຍ 6 ຄົນປະກອບມີ: ທ້າວ ແກ້ວລໍາມອນ ວົງດາລາ, ທ້າວ ຄໍາຕາ ແສງມະນີ, ທ້າວ ຕ່ອງ ທອງຄຳ, ທ້າວ ແສງ ໄຊສະຫວັນ, ທ້າວ ຄຳສະໄໝ ພົມຫລວງວິຊາ ແລະ ທ້າວ ພັນທະວີ ສີສຸດອນ. ສ່ວນນັກກິລາຍຍິງ 6 ຄົນປະກອບມີ: ນາງ ຫລ້າ ດາລາວົງ, ນາງ ຈັນພອນ ໄຊສົມພູ, ນາງ ສຸກດາວີ ໄຊສົມພູ, ນາງ ສອນມາລີ ໄຊສົມພູ, ນາງລັດສະໝີ ວົງສາເກດທິບ ແລະ ນາງ ເຄືອ ຈັນທິວົງ.

ທ່ານ ລອນຄໍາ ອິນທອງໄຊ ຍັງກ່າວອີກວ່າ: ພາຍຫລັງສໍາເລັດການເຂົ້າສູນຝຶກຊ້ອມທີ່ປະເທດໄທແລ້ວ ພວກເຮົາຈະກັບມາຊ້ອມຢູ່ລາວອີກປະມານ 2 ອາທິດ ແລ້ວຈຶ່ງຈະອອກເດີນທາງເຂົ້າຮ່ວມເອຊຽນ ພາລາເກມ. ການເຂົ້າຮ່ວມແຂ່ງຂັນເອຊຽນ ພາລາເກມຄັ້ງນີ້ ພວກເຮົາໄດ້ຕັ້ງຄວາມຫວັງໄວ້ວ່າຕ້ອງຍາດໃຫ້ໄດ້ຫລຽນໃດຫລຽນໜຶ່ງມາສູ່ ສປປ ລາວ ອີກຄັ້ງ.