ນະຄອນຫລວງພະບາງຈັດງານ ຊ່ວງເຮືອບຸນຫໍ່ເຂົ້າປະດັບດິນ
ງານຊ່ວງເຮືອປະເພນີ ເດືອນ 9 ຫໍ່ເຂົ້າປະດັບດິນ ອັນເປັນເອກະລັກສະເພາະຂອງຊາວຫລວງພະບາງ ເມືອງມໍລະດົກໂລກ ໄດ້ຈັດຂຶ້ນທຸກປີໃນມື້ແຮມ 14 ຄໍ່າຂອງເດືອນ 9 ລາວ. ສຳລັບປີນີ້ ກົງກັບວັນທີ 9 ກັນຍາ ເຊິ່ງເປັນໜຶ່ງໃນກິດຈະກຳຫລັກຂອງການສະເຫລີມສະຫລອງປີທ່ອງທ່ຽວລາວ 2018 ຢູ່ແຂວງຫລວງພະບາງ ໂດຍມີເຮືອຊ່ວງມາຈາກບັນດາບ້ານ, ສຳນັກງານອ້ອມຂ້າງແຂວງ ແລະ ແຂວງໃກ້ຄຽງຈຳນວນໜ່ຶງເຂົ້າຮ່ວມແຂ່ງຂັນ 29 ລຳ. ຜ່ານການແຂ່ງຂັນຜົນປາກົດວ່າ: ອັນດັບທີ 1 ໄດ້ແກ່ເຮືອຊ່ວງຮ້ານຂາຍລົດດອນແຊ້ມ ໄດ້ຮັບຂັນເງິນຄອງແຊ້ມ 3 ປີຊ້ອນ ພ້ອມດ້ວຍເງິນສົດ 15 ລ້ານກີບ, ອັນດັບທີ 2 ໄດ້ແກ່ເຮືອຊ່ວງບໍລິສັດພັນທະມິດກໍ່ສ້າງຂົວທາງຈຳກັດ ແຂວງໄຊຍະບູລີ ໄດ້ຮັບຂັນເງິນ ພ້ອມເງິນສົດ 14 ລ້ານກີບ, ອັນດັບທີ 3 ໄດ້ແກ່ເຮືອຊ່ວງສວນລີສອດປາກຄານ ແຂວງບໍ່ແກ້ວ ໄດ້ຮັບຂັນເງິນ ພ້ອມດ້ວຍເງິນສົດ 13 ລ້ານກີບ, ອັນດັບທີ 4 ເຮືອຊ່ວງເມືອງປາກອູ ອຸປະຖຳໂດຍທະນາຄານການຄ້າຕ່າງປະເທດລາວມະຫາຊົນ ໄດ້ຮັບເງິນສົດ 12 ລ້ານກີບ, ອັນດັບທີ 5 ເຮືອຊ່ວງອົງການໄອຍະການປະຊາຊົນແຂວງ ອຸປະຖຳໂດຍບໍລິສັດລາວໂຕໂຢຕາ ໄດ້ຮັບເງິນສົດ 11 ລ້ານກີບ, ອັນດັບທີ 6 ເຮືອຊ່ວງບ້ານຫາດຮ່ຽນ 2 ໄດ້ຮັບເງິນສົດ 10 ລ້ານກີບ, ອັນດັບທີ 7 ເຮືອຊ່ວງວັດຊຽງທອງ 2 ໄດ້ຮັບເງິນສົດ 9 ລ້ານກີບ, ອັນດັບທີ 8 ເຮືອຊ່ວງນະຄອນຫລວງວຽງຈັນ ໄດ້ຮັບເງິນສົດ 8 ລ້ານ 5 ແສນກີບ. ນອກນັ້ນ ແມ່ນໄດ້ຮັບລາງວັນຊົມເຊີຍຕ່າງໆ, ສ່ວນເຮືອນາງດຳນາງດ່ອນ ແມ່ນໄດ້ຮັບລາງວັນເງິນສົດລຳລະ 3 ລ້ານກີບ ແລະ ລາງວັນເຮືອງາມທີ 1 ໄດ້ແກ່ເຮືອຊ່ວງບ້ານຫາດຮ່ຽນ 2 ໄດ້ຮັບເງິນສົດ 3 ລ້ານກີບ, ທີ 2 ເຮືອຊ່ວງວັດໃໝ່ສຸວັນນະພູມມາຣາມ ໄດ້ຮັບເງິນສົດ 2 ລ້ານກີບ, ທີ 3 ເຮືອຊ່ວງວັດຊຽງທອງ 1 ໄດ້ຮັບເງິນສົດ 1 ລ້ານກີບ, ໃຫ້ກຽດມອບໂດຍທ່ານ ສຸກັນ ບຸນຍົງ ເຈົ້ານະຄອນຫລວງພະບາງ, ຮອງປະທານຈັດງານບຸນເດືອນ 9 ຫໍ່ເຂົ້າປະດັບດິນ ປະຈຳປີ ພສ 2561. ການຈັດງານຊ່ວງເຮືອດັ່ງກ່າວເປັນວັດທະນະທຳ ແລະ ຮີດຄອງປະເພນີອັນດີງາມທີ່ຊາວເມືອງຫລວງພະບາງໄດ້ຈັດຕັ້ງມາແຕ່ດຶກດຳບັນ ທັງເປັນການຜູກແໜ້ນຄວາມສາມັກຄີລະຫວ່າງທ້ອງຖິ່ນດ້ວຍກັນອີກດ້ວຍ.
