IFC ສືບຕໍ່ຊ່ວຍປັບປຸງສະພາບແວດລ້ອມການລົງທຶນ ແລະ ດຳເນີນທຸລະກິດຢູ່ລາວ
ອົງການການເງິນສາກົນ (IFC) ສືບຕໍ່ໃຫ້ການສະຫນັບສະຫນູນລັດຖະບານລາວເຮົາໃນການປັບປຸງສະພາບແວດລ້ອມການລົງທຶນ ແລະ ການດໍາເນີນທຸລະກິດຢູ່ພາຍໃນປະເທດ ເພື່ອໃຫ້ສາມາດຄາດຄະເນໄດ້ ແລະ ມີຄວາມໂປ່ງໃສຫລາຍຂຶ້ນ, ພ້ອມຊ່ວຍດຶງດູດໃຫ້ມີການລົງທຶນໂດຍກົງຈາກຕ່າງປະເທດຫລາຍຂຶ້ນ, ສ້າງວຽກເຮັດງານທໍາຫລາຍຂຶ້ນ ແລະ ສົ່ງເສີມໃຫ້ມີການເຕີບໂຕຢ່າງທົ່ວເຖິງ.
ພິທີລົງນາມໃນສັນຍາດັ່ງກ່າວ, ໄດ້ມີຂຶ້ນໃນວັນທີ 7 ກັນຍານີ້ທີ່ນະຄອນຫລວງວຽງຈັນ ລະຫວ່າງ ທ່ານນາງ ດາເລຍ ຄາລີຟາ ຫົວຫນ້າອາວຸໂສດ້ານວຽກງານການປັບປຸງສະພາບແວດລ້ອມການລົງທຶນ IFC ແລະ ທ່ານ ມະໂນ ທອງ ວົງໄຊ ຫົວຫນ້າກົມສົ່ງເສີມການລົງທຶນກະຊວງແຜນການ ແລະ ການລົງທຶນ ແລະ ທ່ານ ບຸນປະເສີດ ສີກຸນລະບຸດ ຮັກສາການຫົວຫນ້າກົມພາສີກະຊວງການເງິນ, ໂດຍມີທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການງທຶນເຂົ້າຮ່ວມເປັນສັກຂີພະຍານນໍາດ້ວຍ ເພື່ອແນໃສ່ສ້າງຄວາມເຂັ້ມແຂງແກ່ຂອບນະໂຍບາຍການລົງທຶນ, ລວມທັງການຈັດຕັ້ງປະຕິບັດຂອບນະໂຍບາຍດັ່ງກ່າວ ແລະ ປັບປຸງລະບຽບການທາງດ້ານທຸລະກິດເພື່ອອໍານວຍຄວາມສະດວກໃຫ້ແກ່ການດໍາເນີນທຸລະກິດຢູ່ ສປປ ລາວ ດີຂຶ້ນ.
ໂອກາດນີ້, ທ່ານ ມະໂນ ທອງວົງໄຊ ກ່າວວ່າ: ພວກເຮົາເຊື່ອຫມັ້ນວ່າ ກຸ່ມທະນາຄານໂລກຜູ້ທີ່ມີປະສົບການໃນລະບົບສາກົນທາງດ້ານການປະຕິຮູບ,ການດໍາເນີນທຸລະກິດຈະຊ່ວຍໃຫ້ລາວສາມາດຈັດຕັ້ງປະຕິບັດເປົ້າຫມາຍການລົງທຶນຂອງຕົນ ແລະ ຮັບປະກັນໃຫ້ສະພາບແວດລ້ອມທາງດ້ານລະບຽບການເອື້ອອໍານວຍໃຫ້ແກ່ການລົງທຶນເຂົ້າມາປະເທດຫລາຍຂຶ້ນ.
ທ່ານນາງ ດາເລຍ ຄາລີຟາກ່າວວ່າ: IFC ພ້ອມແລ້ວທີ່ຈະໃຫ້ການສະຫນັບສະຫນູນແກ່ລັດຖະບານລາວ ໃນການບັນລຸບັນດາພັນທະທາງດ້ານການປັບປຸງສະພາບແວດລ້ອມການລົງທຶນທີ່ເອື້ອອໍານວຍ ແລະ ການດໍາເນີນທຸລະກິດ, ສປປ ລາວ ຈະສາມາດເພີ່ມຈໍານວນຜູ້ປະກອບການທຸລະກິດໄດ້ຫລາຍຂຶ້ນ, ຊຶ່ງຈະເປັນພື້ນຖານອັນແຂງແກ່ນໃຫ້ແກ່ພາກເອກະຊົນມີການຂະຫຍາຍຕົວ.
