ຍີ່ປຸ່ນພົບການລະບາດຂອງໄຂ້ຫວັດໃຫຍ່ໝູ ເທື່ອທຳອິດໃນຮອບ 26 ປີ
ທາງການຍີ່ປຸ່ນກວດພົບການແຜ່ລະບາດຂອງໄວຣັສໄຂ້ຫວັດໃຫຍ່ໝູເປັນເທື່ອທຳອິດນັບແຕ່ປີ 1992, ແຕ່ຢືນຢັນບໍ່ແມ່ນພະຍາດອະຫິວາໝູອາຟຣິກາ.
Japan finds first swine fever case in 26 years, but not African fever https://t.co/x2gcXlNbjV
— Reuters Health (@Reuters_Health) September 9, 2018
ສຳນັກຂ່າວຕ່າງປະເທດລາຍງານວ່າ: ກະຊວງກະສິກຳຂອງຍີ່ປຸ່ນອອກຖະແຫລງການໃນວັນທີ 9 ກັນຍາ ພົບການແຜ່ລະບາດຂອງເຊື້ອໄວຣັສໄຂ້ຫວັດໃຫຍ່ໝູ ຢູ່ຟາມໝູແຫ່ງໜຶ່ງ ໃນເມືອງກິຟຸ ເຊິ່ງເປັນເມືອງເອກຂອງແຂວງກິຟຸ ຕັ້ງຢູ່ທາງຕອນກາງຂອງປະເທດ ຖືເປັນເທື່ອທຳອິດໃນຮອບ 26 ປີ ທີ່ມີການພົບເຊື້ອໄວຣັສຊະນິດດັ່ງກ່າວໃນປະເທດ.
ເຖິງຢ່າງໃດກໍຕາມ, ລັດຖະບານຍີ່ປຸ່ນຢືນຢັນວ່າ: ເຊື້ອພະຍາດເຊິ່ງພົບຢູ່ຟາມໃນແຂວງກິຟຸເປັນຄົນລະສາຍພັນກັບທີ່ເຮັດໃຫ້ເກີດການແຜ່ລະບາດຂອງພະຍາດອະຫິວາໝູອາຟຣິກາ (ASF) ໃນຢ່າງໜ້ອຍ 6 ແຂວງຂອງຈີນ ນັບແຕ່ເດືອນຜ່ານມາ ຈົນຕ້ອງມີການຂ້າໝູຈາກຟາມ 18 ແຫ່ງ ລວມຫລາຍກວ່າ 38.000 ໂຕ ເພື່ອຈຳກັດການແຜ່ລະບາດຂອງພະຍາດໃນຈີນ. ຂະນະທີ່ ອົງການອາຫານ ແລະ ກະສິກຳແຫ່ງສະຫະປະຊາຊາດ (FAO) ອອກລາຍງານໃນທ້າຍເດືອນຜ່ານມາ ເຕືອນວ່າ: ສະຖານະການການແຜ່ລະບາດຂອງພະຍາດ ASF ໃນຈີນອາດຂ້າມຊາຍແດນສູ່ອີກຫລາຍປະເທດໃນອາຊີຕາເວັນອອກ ແລະ ອາຊີຕາເວັນອອກສຽງໃຕ້.
