ຜູ້ນຳສູງສຸດອີຣານຂໍກອງທັບເພີ່ມຂີດ ຄວາມສາມາດເພື່ອຂົ່ມຂວັນສັດຕູ
ທ່ານ ຢາຕໍເລາະ ອາລີ ຄາເມນີ ຜູ້ນຳສູງສຸດຂອງອີຣານ ກ່າວໃນວັນທີ 9 ກັນຍານີ້ ຮຽກຮ້ອງໃຫ້ກອງທັບພັດທະນາຂີດຄວາມສາມາດໃນການຂົ່ມຂວັນຝ່າຍກົງກັນຂ້າມ. ຂະນະທີ່ ອີຣານກຳລັງຜະເຊີນມາດຕະການຂວ້ຳບາດຈາກອາເມລິກາເພີ່ມຂຶ້ນ.
ເວັບໄຊທາງການຂອງຜູ້ນຳສູງສຸດອີຣານ ລາຍງານອ້າງຄຳຖະແຫລງຂອງທ່ານ ທີ່ກ່າວໃນພິທີປິດການສຶກສາຂອງໂຮງຮຽນທະຫານອີຣານວ່າ: ຂໍໃຫ້ກອງທັບເພີ່ມແສນຍານຸພາບໃຫ້ຫລາຍທີ່ສຸດເທົ່າທີ່ເຮັດໄດ້ ເພື່ອຂົ່ມຂວັນສັດຕູໃຫ້ລ່າຖອຍໄປ. ທ່ານ ຢາຕໍເລາະ ຄາເມນີ ກ່າວວ່າ: ອີຣານຕໍ່ຕ້ານອາເມລິກາມາໂດຍຕະຫລອດ ເຊິ່ງມີຂໍ້ພິສູດໄດ້ວ່າ: ຖ້າປະເທດບໍ່ຍອມຕົກຢູ່ພາຍໃຕ້ການກົດຂີ່ ແລະ ສາມາດຢູ່ໄດ້ດ້ວຍຂີດຄວາມສາມາດຂອງຕົນເອງ ຈະສາມາດເຮັດໃຫ້ປະເທດມະຫາອຳນາດລ່າຖອຍ ແລະ ເອົາຊະນະໄດ້ໃນທີ່ສຸດ. ກ່ອນໜ້ານີ້ ປະທານາທິບໍດີ ໂດນັລ ທຣຳ ຂອງອາເມລິກາ ປະກາດໃນເດືອນພຶດສະພາວ່າ: ອາເມລິກາຖອນຕົວຈາກຂໍ້ຕົກລົງນິວເຄຼຍອີຣານທີ່ລົງນາມຮ່ວມກັບກຸ່ມປະເທດມະຫາອຳນາດໃນປີ 2015 ລວມທັງຍັງຮື້ຟື້ນມາດຕະການຂວ້ຳບາດອີຣານອີກຄັ້ງ.
