ທິດທາງກ້າວເດີນຂອງລັດຖະບານໃນຕໍ່ໜ້າ
ໂດຍ: ກ້ອງສ່ອງ ອິດສະຫລະ
ຕາມທີ່ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ລາຍງານຕໍ່ກອງປະຊຸມສະພາໃນມື້ ວັນທີ 25 ເມສາຜ່ານມາວ່າ: ຍັງຈະສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ 10 ຂອງພັກ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 8 ທີ່ສະພາແຫ່ງຊາດຮັບຮອງ, ສະເພາະກໍແມ່ນການຈັດຕັ້ງປະຕິບັດມະຕິສະບັບເລກທີ 014, 015 ແລະ 016 ສພຊ ເພື່ອບັນລຸເປົ້າໝາຍ ຄືເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເພື່ອສືບຕໍ່ເຮັດໃຫ້ປະເທດຊາດມີສະຖຽນລະພາບທາງການເມືອງ, ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມ, ປະຊາຊົນມີເງື່ອນໄຂດໍາລົງຊີວິດ ແລະ ສ້າງສາພັດທະນາ, ມີຄວາມສະຫງົບປອດໄພ, ຕ້ານ ແລະ ສະກັດກັ້ນປາກົດການທີ່ກົດໜ່ວງກີດຂວາງການພັດທະນາ, ສືບຕໍ່ແກ້ໄຂບັນຫາການຄ້າຂາຍຢາເສບຕິດ, ການຄ້າຂາຍເຖື່ອນ, ການກະທໍາຜິດກົດໝາຍ ແລະ ປາກົດການຫຍໍ້ທໍ້ທາງສັງຄົມ ແລະ ອື່ນໆ. ຄຸ້ມຄອງເສດຖະກິດມະຫາພາກໃຫ້ມີສະຖຽນລະພາບ ແລະ ໝັ້ນທ່ຽງ ເພື່ອຮັບປະກັນໃຫ້ເສດຖະກິດຂະຫຍາຍຕົວໃນລະດັບບໍ່ໃຫ້ຫລຸດ 7% ໂດຍຍູ້ແຮງການຜະລິດສິນຄ້າ ແລະ ການບໍລິການ, ສົ່ງເສີມການລົງທຶນ, ຍົກສະມັດຖະພາບຂອງງານ ແລະ ຄຸ້ມຄອງລັດໃຫ້ມີປະສິດທິພາບສູງຂຶ້ນ. ສືບຕໍ່ປັບປຸງການຄຸ້ມຄອງລະບົບການເງິນ-ງົບປະມານຢ່າງແຂງແຮງດ້ວຍການປະຕິຮູບກົນໄກເກັບລາຍຮັບໃຫ້ເຂົ້າສູ່ລະບົບທັນສະໄໝ, ໂປ່ງໃສ, ເສີມສ້າງຖານລາຍຮັບໃຫ້ໝັ້ນຄົງກວ້າງຂວາງ, ພ້ອມທັງຕິດຕາມ-ກວດກາ ແລະ ປັບປຸງກົນໄກການປະຕິບັດແຜນງົບປະມານ ແລະ ແຜນລາຍຈ່າຍໃຫ້ມີປະສິດທິຜົນ, ເອົາໃຈໃສ່ວຽກງານກວດສອບ ແລະ ອີງໃສ່ຜົນການກວດສອບເພື່ອກໍານົດທິດທາງ ແລະ ປະຕິບັດມາດຕະການເກັບກູ້ງົບປະມານທີ່ຕົກເຮ່ຍໃຫ້ເຂົ້າສູ່ລະບົບ ແລະ ສືບຕໍ່ປະຕິບັດນະໂຍບາຍປະຢັດແຫ່ງຊາດ ແລະ ຕ້ານການຟຸມເຟືອຍ. ຄຸ້ມຄອງເງິນຕາໃຫ້ມີສະຖຽນລະພາບ, ປະຕິບັດນະໂຍບາຍດອກເບ້ຍທີ່ສົມເຫດສົມຜົນຕາມກົນໄກຕະຫລາດ, ກໍານົດອັດຕາດອກເບ້ຍເງິນຝາກ ແລະ ເງິນກູ້ຂອງທະນະຄານທຸລະກິດໃຫ້ເໝາະສົມ. ຊຸກຍູ້ໃຫ້ຕະຫລາດລະຫວ່າງທະນາຄານ, ຕະຫລາດເປີດ ແລະ ຕະຫລາດພັນທະບັດເຄື່ອນໄຫວຢ່າງແຂງແຮງ ແລະ ມີປະສິດທິພາບ, ຄຸ້ມຄອງອັດຕາແລກປ່ຽນໃຫ້ຢູ່ໃນເກນທີ່ກໍານົດໄວ້. ປັບປຸງສະພາບແວດລ້ອມໃນການດໍາເນີນທຸລະກິດ ໂດຍແກ້ໄຂຂັ້ນຕອນ ແລະ ຂອດຕ່າງໆທີ່ບໍ່ສະດວກ, ກົດໜ່ວງສ້າງຄວາມຫຍຸ້ງຍາກ ທັງເປັນການເພີ່ມຕົ້ນທຶນໃຫ້ແກ່ການດໍາເນີນທຸລະກິດດ້ວຍການປະຕິບັດກົດໝາຍວ່າດ້ວຍການສົ່ງເສີມການລົງທຶນ ແລະ ສຸມໃສ່ຜັນຂະຫຍາຍກົດໝາຍດັ່ງກ່າວ ໃຫ້ເປັນກົນໄກ ແລະ ລະບຽບການບໍລິການລົງທຶນຜ່ານປະຕູດຽວຢູ່ຂັ້ນສູນກາງ ແລະ ທ້ອງຖິ່ນໃຫ້ໄວ ເພື່ອອໍານວຍຄວາມສະດວກໃຫ້ແກການລົງທຶນ. ກວດກາຄືນດໍາລັດວ່າດ້ວຍການຄຸ້ມຄອງລາຄາສິນຄ້າ ແລະ ການບໍລິການ ແລະ ຄົ້ນຄວ້າອອກລະບຽບການເພີ່ມຕື່ມ ຫລື ບົດແນະນໍາການຈັດຕັ້ງປະຕິບັດ, ຮີບຮ້ອນສຶກສາຄົ້ນຄວ້າກໍານົດໂຄງສ້າງລາຄາສິນຄ້າ ແລະ ການບໍລິການ, ສຶກສາຄົ້ນຄວ້າສະພາບຄວາມຕ້ອງການ ແລະ ຄວາມສາມາດສະໜອງຕົວຈິງໃນປັດຈຸບັນ ເພື່ອເປັນບ່ອນອີງໃຫ້ແກ່ການກໍານົດນະໂຍບາຍ, ມາດຕະການສົ່ງເສີມການຜະລິດ ແລະ ການບໍລິການຢູ່ພາຍໃນທີ່ພວກເຮົາມີທ່າແຮງ ເປັນຕົ້ນແມ່ນການຜະລິດສິນຄ້າກະສິກໍາ, ຍູ້ແຮງເສດຖະກິດຂະໜາດນ້ອຍ ແລະ ກາງ, ພັດທະນາແຫລ່ງທ່ອງທ່ຽວ, ການບໍລິການການຄ້າ, ການຂົນສົ່ງ-ໂລຈິສຕິກ ແລະ ອື່ນໆໃຫ້ແຂງແຮງກວ່າເກົ່າ. ຊຸກຍູ້ສົ່ງເສີມການຮຽນຮູ້ ແລະ ນໍາໃຊ້ຄວາມຮູ້ເຕັກນິກ ແລະ ເຕັກໂນໂລຊີທີ່ທັນສະໄໝ, ຍົກລະດັບຄວາມອາດສາມາດຂອງທຸລະກິດພາຍໃນໃນການຄຸ້ມຄອງ ແລະ ບໍລິການທຸລະກິດໃຫ້ສາມາດແຂ່ງຂັນໃນເງື່ອນໄຂແຫ່ງການເປັນປະຊາຄົມອາຊຽນ, ຄຸ້ມຄອງການເຄື່ອນໄຫວຂອງຜູ້ປະກອບການໃຫ້ເຂົ້າສູ່ກົດໝາຍ ແລະ ລະບຽບການຢ່າງເຄັ່ງຄັດ ແລະ ເປັນເອກະພາບ. ຊຸກຍູ້ການຈັດຕັ້ງປະຕິບັດໂຄງການໃຫຍ່ລະດັບຊາດທີ່ລັດຖະບານໄດ້ຕົກລົງ ແລະ ບັນຈຸໃນແຜນແລ້ວໃຫ້ໄດ້ຮັບການຈັດຕັ້ງປະຕິບັດ ເພື່ອເປັນກໍາລັງແຮງໃນການກະຕຸ້ນເສດຖະກິດໃຫ້ມີການເຕີບໃຫຍ່ຢ່າງຕໍ່ເນື່ອງ ເປັນຕົ້ນໂຄງການທາງລົດໄຟ ລາວ-ຈີນ,ໂຄງການທາງລົດໄຟ ລາວ-ໄທ, ໂຄງການທາງດ່ວນວຽງຈັນ-ຮ່າໂນ້ຍ, ໂຄງການກໍ່ສ້າງສະໜາມບິນ ແລະ ໂຄງການທາງດ່ວນ, ໂຄງການສ້າງລະບົບໂລຈິສຕິກ ແລະ ທ່າເຮືອເທິງບົກ (Dry Port ), ໂຄງການພັດທະນາທ່າເຮືອວຸ່ງອ່າງໃຫ້ເປັນທ່າເຮືອປະສົມລາວ-ຫວຽດນາມ ແລະ ບັນດາໂຄງການລົງທຶນຂະໜາດໃຫຍ່ທີ່ໄດ້ຮັບການອະນຸມັດໃນຂົງເຂດພະລັງງານ-ບໍ່ແຮ່, ອຸດສາຫະກໍາ, ການບໍລິການ, ການຄົມມະນາຄົມ ແລະ ອື່ນໆ ໃຫ້ເຂົ້າສູ່ວຽກງານຕົວຈິງ. ສືບຕໍ່ສຸມໃສ່ການພັດທະນາດ້ານວັດທະນະທໍາ-ສັງຄົມ ແລະ ແກ້ໄຂຄວາມທຸກຍາກ ໂດຍເອົາໃຈໃສ່ຊຸກຍູ້ຂະບວນການຜະລິດຂອງປະຊາຊົນ ແລະ ຜູ້ປະກອບການ, ຜັນຂະຫຍາຍມະຕິຄໍາສັ່ງວ່າດ້ວຍວຽກງານສາມສ້າງໃຫ້ແທດເຖິງຕົວຈິງ, ໂດຍສືບຕໍ່ປະຕິບັດໂຄງການພັດທະນາຊົນນະບົດ ໂດຍສະເພາະບັນດາໂຄງການກໍ່ສ້າງພື້ນຖານໂຄງລ່າງທີ່ກໍານົດໃນແຜນຂອງບັນດາເມືອງທຸກຍາກ ແລະ ເຂດທຸກຍາກຂອງ 91 ຈຸດສຸມພັດທະນາ ແລະ 145 ຈຸດສຸມໃນການຈັດສັນພູມລໍາເນົາ ແລະ ບ່ອນທໍາມາຫາກິນຂອງປະຊາຊົນ, ຍົກຄຸນນະພາບການສຶກສາ ແລະ ສາທາລະນະສຸກໃຫ້ທົ່ວເຖິງຮອດເຂດຊົນນະບົດຫ່າງໄກສອກຫລີກ, ສຸມທຶນຮອນເຂົ້າໃສ່ການກໍ່ສ້າງພື້ນຖານໂຄງລ່າງທີ່ຈໍາເປັນ, ຍົກລະດັບຄຸນນະພາບຄູ ແລະ ຫລັກສູດການຮຽນ-ການສອນໃນທຸກຊັ້ນໃຫ້ຂຶ້ນສູ່ລະດັບໃໝ່, ຍົກລະດັບການບໍລິການທາງດ້ານສາທາລະນະສຸກ ເປັນຕົ້ນການປິ່ນປົວ, ຈັນຍາບັນຂອງພະນັກງານແພດໝໍ ແລະ ສະໜອງຢາປິ່ນປົວທີ່ມີຄຸນນະພາບກ່ວາເກົ່າ, ແກ້ໄຂບັນຫາການຂາດແຄນແຮງງານ, ຄຸນນະພາບຂອງແຮງງານ ແລະ ສືບຕໍ່ປະຕິບັດນະໂຍບາຍສະຫວັດດີການສັງຄົມໃຫ້ດີຂຶ້ນ ແລະ ອື່ນໆ. ຄົ້ນຄວ້າຜັນຂະຫຍາຍ ແລະ ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDGs) ໃຫ້ເປັນຄາດໝາຍ, ເປັນແຜນງານ ແລະ ເປັນໂຄງການລະອຽດຂອງແຕ່ລະຂະແໜງການ ເພື່ອຮັບປະກັນການຈັດຕັ້ງປະຕິບັດໃຫ້ມີປະສິດທິຜົນ. ເອົາໃຈໃສ່ຕິດຕາມກວດກາການຄຸ້ມຄອງ, ການນໍາໃຊ້, ການເຊົ່າສໍາປະທານທີ່ດິນ ແລະ ການບຸກລຸກທີ່ດິນປ່າສະຫງວນ, ປ່າຕົ້ນນໍ້າ, ເຂດວັດຖຸບູຮານ ແລະ ອື່ນໆ ລວມທັງການຫັນປ່ຽນຮູບແບບການນໍາໃຊ້ທີ່ດິນ, ສືບຕໍ່ປັບປຸງນະໂຍບາຍການຄຸ້ມຄອງ ແລະ ພັດທະນາທີ່ດິນໃນໄລຍະໃໝ່ຕາມຈິດໃຈຊີ້ນໍາຂອງກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 4 ສະໄໝທີ x. ຍົກປະສິດທິພາບ ແລະ ປະສິດທິຜົນຂອງການບໍລິຫານລັດ ໂດຍສືບຕໍ່ປັບປຸງກົງຈັກການຈັດຕັ້ງບຸກຄະລາກອນ, ແບບແຜນວິທີເຮັດວຽກ ແລະ ລະບອບກົນໄກການເຄື່ອນໄຫວວຽກງານຂອງບັນດາກະຊວງ ແລະ ອົງການທຽບເທົ່າທີ່ຂຶ້ນກັບລັດຖະບານໃຫ້ສໍາເລັດໂດຍໄວຕາມທິດກະທັດຮັດ, ສົມເຫດສົມຜົນ, ແທດຕົວຈິງ ແລະ ຍົກສູງປະສິດທິພາບ-ປະສິດທິຜົນໃນການເຄື່ອນໄຫວ ແລະ ປະຕິບັດພາລະບົດບາດທີ່ໄດ້ຮັບມອບໝາຍ. ເອົາໃຈໃສ່ຊີ້ນໍາອົງການກວດກາລັດຖະບານໃຫ້ປະສານສົມທົບແໜ້ນກັບອົງການກວດສອບແຫ່ງລັດສືບຕໍ່ກວດກາ ແລະ ກວດສອບການປະຕິບັດພາລະບົດບາດ, ການປະຕິບັດວິໄນແຜນການການເງິນ, ການຫັນຊັບສິນ ແລະ ທີ່ດິນເປັນທຶນ ແລະ ການເຄື່ອນໄຫວເສດຖະກິດ-ສັງຄົມອື່ນໆທີ່ບໍ່ຖືກຕ້ອງ, ບໍ່ສອດຄ່ອງກັບກົດໝາຍ ແລະ ລະບຽບການ ແລະ ຄວາມບໍ່ໂປ່ງໃສໃນການປະຕິບັດໜ້າທີ່ ແລະ ສິດຂອງບັນດາອົງການຈັດຕັ້ງຂັ້ນສູນກາງ ແລະ ອົງການປົກຄອງທ້ອງຖິ່ນ ເພື່ອສະກັດກັ້ນ ແລະ ຕ້ານການສໍ້ລາດບັງຫລວງທຸກຮູບແບບ, ຕ້ານປາກົດການຫຍໍ້ທໍ້, ພະຍາດອາດຍາສິດໃຫ້ເປັນຮູບປະທໍາ. ເປັນເຈົ້າການຄົ້ນຄວ້າສ້າງ ແລະ ນໍາສະເໝີປັບປຸງບັນດາກົດໝາຍ ແລະ ນິຕິກໍາທີ່ບໍ່ສອດຄ່ອງ ຫລື ກົດໜ່ວງຖ່ວງດຶງການພັດທະນາໃຫ້ທັນກັບສະພາບການ ແນໃສ່ຄຸ້ມຄອງລັດ, ຄຸ້ມຄອງສັງຄົມ ແລະ ຊຸກຍູ້ການພັດທະນາ ເຊິ່ງລັດຖະບານໄດ້ສະເໜີ 9 ກົດໝາຍໃນກອງປະຊຸມສະພາແຫ່ງຊາດໃນເທື່ອນີ້.ຄຽງຄູ່ກັນນີ້ກໍຈະສືບຕໍ່ຄົ້ນຄວ້າ ແລະ ອອກນິຕິກໍາລຸ່ມກົດໝາຍຈໍານວນໜຶ່ງ ເປັນຕົ້ນດໍາລັດວ່າດ້ວຍຖານຂໍ້ມູນຂອງລັດຖະກອນ, ດໍາລັດວ່າດ້ວຍຈັນຍາບັນຂອງພະນັກງານລັດຖະກອນແຫ່ງ ສປປ ລາວ ແລະ ອື່ນໆ. ພ້ອມນີ້ກໍຈະເພີ່ມທະວີການຕິດຕາມ, ຊຸກຍູ້, ກວດກາ ແລະ ປະເມີນການປະຕິບັດກົດໝາຍ ແລະ ນິຕິກໍາລຸ່ມກົດໝາຍແນໃສ່ເຮັດໃຫ້ການປະຕິບັດ ມີຄວາມສັກສິດ ແລະ ເຂັ້ມງວດ ແລະ ສ້າງສະພາບແວດລ້ອມໃຫ້ແກ່ການພັດທະນາໂດຍແກ້ໄຂບັນຫາຫຍຸ້ງຍາກທາງດ້ານເສດຖະກິດ, ຮັບປະກັນສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍຂອງສັງຄົມໄປພ້ອມໆກັບການສ້າງສະພາບແວດລ້ອມທີ່ດີ ແລະ ສະເໝີຕົ້ນສະເໝີປາຍກັບເພື່ອນມິດສາກົນ, ປະຕິບັດນະໂຍບາຍເພີ່ມມິດຫລຸດ ຜ່ອນສັດຕູ, ນະໂຍບາຍການທູດປ້ອງກັນເຫດ, ເສີມຂະຫຍາຍຄວາມເປັນເຈົ້າການໃນການຍາດແຍ່ງ ແລະ ນໍາໃຊ້ການຮ່ວມມືສາກົນທັງໃນຂອບສອງຝ່າຍ ແລະ ຫລາຍຝ່າຍເພື່ອການພັດທະນາ ນໍາພາປະເທດຊາດອອກຈາກຄວາມດ້ອຍພັດທະນາຕາມເປົ້າໝາຍທີ່ວາງໄວ້.
ນີ້ຄືບັນດາແຜນວຽກຂອງລັດຖະບານທີ່ຈະນໍາພາປະເທດຊາດກ້າວເດີນໄປໃນປີ 2017 ແລະ ຕໍ່ໜ້າ ກໍຂໍໃຫ້ພວກເຮົາທັງໝົດພາກັນເຊື່ອມຊຶມແລ້ວອອກແຮງດ້ວຍກາຍ ແລະ ສະຕິປັນຍາຢູ່ອ້ອມຂ້າງພັກ ແລະ ລັດຖະບານ, ພ້ອມກັນເຮັດໂຮມກັນສ້າງໃຫ້ບ້ານເມືອງເຮົາຫລຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາໃນປີ 2020 ຢ່າງແທ້ຈິງ.
