ປະຊາຊົນຢູ່ເກາະຮອກໄກໂດ ກວ່າເຄິ່ງຍັງບໍ່ມີໄຟຟ້າໃຊ້
ຍອດຜູ້ເສຍຊີວິດຈາກແຜ່ນດິນໄຫວຢູ່ເກາະຮອກໄກໂດ ເພີ່ມຂຶ້ນເປັນ 16 ຄົນ. ຂະນະທີ່ປະຊາຊົນກວ່າເຄິ່ງໜຶ່ງຢູ່ເກາະດັ່ງກ່າວຍັງບໍ່ມີໄຟຟ້າໃຊ້.
ຍອດຜູ້ເສຍຊີວິດຫລ້າສຸດເພີ່ມຈາກທີ່ມີລາຍງານໃນວັນທີ 6 ກັນຍາວ່າ 8 ຄົນເປັນ 16 ຄົນ ແລະ ຍັງສູນຫາຍອີກ 26 ຄົນ, ຫລັງເກີດແຜ່ນດິນໄຫວຂະໜາດ 6,7 ເມັກນິຈູດ ຢູ່ເກາະຮອກໄກໂດ ເມື່ອເວລາ 03:00 ໂມງຂອງທີ 6 ກັນຍາ ແຮງສັ່ນສະເທືອນເຮັດໃຫ້ເກີດດິນເຈື່ອນຖົມເຮືອນ ແລະ ໄຟຟ້າດັບເປັນບໍລິເວນກວ້າງ. ເຈົ້າໜ້າທີ່ກູ້ໄພຍີ່ປຸ່ນ ພ້ອມໝາດົມກິ່ນຍັງເດີນໜ້າຄົ້ນຫາຜູ້ອາດລອດຊີວິດ ໃນເມືອງອັດສິມະ. ນອກຈາກນີ້ ຍັງມີອາບເຕີຊ໊ອກເກີດຂຶ້ນຕາມມາອີກເກືອບໜຶ່ງຮ້ອຍຄັ້ງ. ຂະນະທີ່ມີຄຳເຕືອນຈາກສຳນັກອຸຕຸນິຍົມວິທະຍາໃຫ້ລະວັງຝົນຕົກໜັກໃນໄລຍະນີ້ ເຊິ່ງອາດເຮັດໃຫ້ເກີດດິນເຈື່ອນຕາມມາອີກ.
ຮອກໄກໂດ ເອເລັກຕຣິກ ພາວເວີ ຜູ້ໃຫ້ບໍລິການກະແສໄຟຟ້າສາມາດເຊື່ອມຕໍ່ໄຟຟ້າໃຫ້ຜູ້ໃຊ້ບໍລິການໄດ້ແລ້ວ 1,3 ລ້ານຄົນ ຈາກທັງໝົດເກືອບ 3 ລ້ານຄົນ. ເຈົ້າຂອງຮ້ານບາບີຄິວ ລາຍໜຶ່ງໃນເມືອງຊັບໂປໂຣ ຕັດສິນໃຈນຳສິ່ງຂອງໃນຕູ້ເຢັນມາເຮັດອາຫານແຈກໃຫ້ນັກທ່ອງທ່ຽວທີ່ຕິດຄ້າງຢູ່ເກາະດັ່ງກ່າວ ດີກວ່າໃຫ້ເໜົ່າເພາະຕູ້ເຢັນໃຊ້ງານບໍ່ໄດ້.
ສ່ວນສາຍການບິນເຈແປນ ແອລາຍ ໄດ້ເລີ່ມໃຫ້ບໍລິການຖ້ຽວບິນ ທີ່ສະໜາມບິນນິວ ຊິໂຕເຊະ ນັບແຕ່ວັນທີ 7 ກັນຍາ, ສ່ວນບໍລິສັດເຈອາຣ ຮອກໄກໂດ ໄດ້ເລີ່ມໃຫ້ບໍລິການລົດໄຟຫົວກະສຸນໃນວັນດຽວກັນ. ເຖິງຢ່າງໃດກໍດີ, ບໍລິສັດຕ່າງໆ ເຊັ່ນ: ໂຕໂຢຕ້າ ມໍເຕີ ຍັງບໍ່ສາມາດເດີນເຄື່ອງເຮັດການຜະລິດໄດ້ ເພາະບໍ່ມີໄຟຟ້າໃຊ້.
