ທ່ານ ຮຸນເຊນ ເປີດປະຊຸມຄະນະລັດຖະບານຄັ້ງທຳອິດ
ນາຍົກລັດຖະມົນຕີ ຮຸນເຊນ ຂອງກຳປູເຈຍ ເປີດປະຊຸມຄະນະລັດຖະບານຄັ້ງທຳອິດໃນວັນທີ 7 ກັນຍານີ້, ຫລັງການລົງມະຕິແຕ່ງຕັ້ງຜູ້ນຳລັດຖະສະພາ ແລະ ລັດຖະບານໃໝ່ ພາຍຫລັງການເລືອກຕັ້ງທົ່ວໄປໃນເດືອນກໍລະກົດຜ່ານມາ.
ນາຍົກລັດຖະມົນຕີ ຮຸນເຊນ ກ່າວໃນລະຫວ່າງກອງປະຊຸມ ຫລັງການລົງມະຕິເຊິ່ງຂະຫຍາຍອຳນາດການບໍລິຫານປະເທດຂອງທ່ານອອກໄປອີກ 5 ປີ ຈາກດຳລົງຕຳແໜ່ງມາແລ້ວ 33 ປີວ່າ: ລັດຖະບານຈະປະຕິບັດໜ້າທີ່ຮັບໃຊ້ປະເທດ ແລະ ປະຊາຊົນ. ທັງນີ້ ຄະນະລັດຖະບານຊຸດໃໝ່ນີ້ມີການປ່ຽນແປງເລັກໜ້ອຍ ໂດຍມີການເພີ່ມອຳນາດທາງການເມືອງໃຫ້ຄອບຄົວຂອງທ່ານ ໂດຍມີລູກຊາຍ 2 ຄົນ ຄື ນາຍພົນ ຮຸນ ມາເນດ ເຂົ້າຮ່ວມໃນຄະນະເສນາທິການທະຫານຮ່ວມ. ຂະນະທີ່ທ່ານ ຮຸນ ມານີ ລູກຊາຍຫລ້າດຳລົງຕຳແໜ່ງປະທານຄະນະກຳມາທິການລັດຖະສະພາກິດຈະການເຍົາວະຊົນ ແລະ ກິລາ, ສ່ວນປະທານສະມັດຊາແຫ່ງຊາດຍັງຄົງເປັນທ່ານ ເຮງ ສຳຣິນ.
ທ່ານ ຮຸນເຊນ ກ່າວວ່າ: ລັດຖະບານໃໝ່ຈະຍັງເດີນໜ້າຕາມແຜນຍຸດທະສາດສີ່ຫລ່ຽມ ເຊິ່ງເນັ້ນ 4 ພາກຕົ້ນຕໍ ໄດ້ແກ່ຊັບພະຍາກອນມະນຸດ, ຖະໜົນ, ນ້ຳ ແລະ ພະລັງງານ ໂດຍສະເພາະການພັດທະນາຊັບພະຍາກອນມະນຸດຖືເປັນພາລະກິດສຳຄັນອັນດັບທຳອິດ. ນອກຈາກນີ້ ຍັງຈະເນັ້ນການກະຈາຍເສດຖະກິດ, ການພັດທະນາພາກເອກະຊົນ, ນະວັດຕະກຳ, ເຕັກໂນໂລຊີສະໄໝໃໝ່, ກະສິກຳ ແລະ ຊົນນະບົດ, ການປົກປ້ອງສິ່ງແວດລ້ອມ ເປັນຕົ້ນ. ຍຸດທະສາດດັ່ງກ່າວລ້ວນມີເປົ້າໝາຍເພື່ອຍົກມາດຕະຖານການຄອງຊີບ ແລະ ການເປັນຢູ່ຂອງປະຊາຊົນ.
