ໂຄງການຮ່ວມມື 3 ຝ່າຍລາວ-ໄທ-ເຢຍລະມັນ ມີຜົນສຳເລັດຫລາຍດ້ານ
ອົງການກວດສອບແຫ່ງລັດໄດ້ຈັດກອງປະຊຸມຄະນະຊີ້ນຳໂຄງການຮ່ວມມື 3 ຝ່າຍລາວ-ໄທ-ເຢຍລະມັນເປັນຄັ້ງທີ 3 ຂຶ້ນໃນວັນທີ 5 ກັນຍານີ້, ໂດຍການເຂົ້າຮ່ວມຂອງທ່ານ ບຸນປອນ ວັນນະຈິດ ຮອງປະທານອົງການກວດສອບແຫ່ງລັດ, ທ່ານນາງ ຊິຣິນ ພັນກະເສີມ ຮອງຜູ້ວ່າການສຳນັກງານການກວດເງິນແຜ່ນດິນປະເທດໄທ, ທ່ານ ວັນທະນາວິດ ກະຈະເສນີ ຮອງຫົວອົງການຮ່ວມມືສາກົນປະເທດໄທ ແລະ ທ່ານນາງ ເບຍເທີ້ ເມເຢີ້ ຫົວໜ້າອົງ ການຮ່ວມມືສາກົນປະເທດເຢຍລະມັນເຂົ້າຮ່ວມນໍາດ້ວຍ.
ກອງປະຊຸມໄດ້ປຶກສາຫາລື ແລະ ປະກອບຄຳຄິດເຫັນຮ່ວມກັນຕໍ່ກັບຜົນສຳເລັດ ທີ່ໄດ້ຮັບຈາກການຈັດຕັ້ງປະຕິບັດໂຄງການຮ່ວມມື 3 ຝ່າຍ ລາວ-ໄທ-ເຢຍລະມັນ ໃນໄລຍະເລີ່ມຕົ້ນມາເຖິງປັດຈຸບັນ ເຫັນວ່າໄດ້ຮັບຜົນສຳເລັດໃນຫລາຍດ້ານເປັນຕົ້ນການສ້າງຫລັກສູດຝຶກອົບຮົມສຳລັບນັກກວດສອບຂັ້ນຕົ້ນ ຈຳນວນ 5 ຫລັກສູດ ທີ່ໄດ້ມາດຕະຖານສາກົນ (ISSAI), ສ້າງໄດ້ຄູຝຶກອົບຮົມ ກ່ຽວກັບການກວດສອບການເງິນ 9 ທ່ານ, ຄູມືໃນການບໍລິ ຫານການຝຶກອົບຮົມ 1 ເຫລັ້ມ ແລະ ໄດ້ນັກຄຸ້ມຄອງ-ບໍລິຫານສະຖາບັນຝຶກອົບຮົມ 4 ທ່ານ.
ໃນໂອກາດດຽວກັນນີ້, ກໍໄດ້ມອບໃບຍ້ອງຍໍ ໃຫ້ກັບບັນດາພາກສ່ວນທີ່ໃຫ້ການສະໜັບສະໜູນໃນການຈັດຕັ້ງປະຕິບັດໂຄງການດັ່ງກ່າວຄື: ໄດ້ມອບໃບຍ້ອງຍໍໃຫ້ຄະນະຊ່ຽວຊານຈາກສຳນັກງານການກວດເງິນແຜນດິນປະເທດໄທ 5 ທ່ານ, ມອບໃບຢັ້ງຢືນໃຫ້ບັນດາຄູຝຶກ 9 ທ່ານ, ທີ່ໄດ້ສຳເລັດການອອກແບບຫລັກສູດການຮຽນ-ການສອນ ສຳລັບການຝຶກອົບຮົມ ແລະ ມອບໃບຢັ້ງຢືນ ໃຫ້ນັກກວດສອບຂັ້ນຕົ້ນຂອງອົງການກວດສອບແຫ່ງລັດແຫ່ງ ສປປ ລາວ ທີ່ຜ່ານການຝຶກອົບຮົມໃນ 5 ຫລັກສູດຈຳນວນ 30 ທ່ານ.
