ລາວ-ໄທ ເພີ່ມທະວີການຮ່ວມມືດ້ານການຄ້າ-ການລົງທຶນ
ກອງປະຊຸມຮ່ວມມືດ້ານການຄ້າ ແລະ ການລົງທຶນຄັ້ງທີ 7 ລະຫວ່າງກະຊວງອຸດສາຫະກຳ ແລະ ການຄ້າແຫ່ງ ສປປ ລາວ ແລະ ກະຊວງພານິດ ແຫ່ງຣາຊະອານາຈັກໄທ ໄດ້ຈັດຂຶ້ນໃນວັນທີ 6 ກັນຍານີ້ຢູ່ນະຄອນຫລວງວຽງຈັນ, ໂດຍການເປັນປະທານຂອງທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າລາວ ແລະ ທ່ານ ສົມທິຣັດ ສົນທິຈິຣາວົງ ລັດຖະມົນຕີວ່າການກະຊວງພານິດໄທ. ເພື່ອທົບທວນການຮ່ວມມືດ້ານການຄ້າ-ການລົງທຶນໃນໄລຍະຜ່ານມາ ແລະ ປຶກສາຫາລືການສົ່ງເສີມການຄ້າ, ການລົງທຶນ ແລະ ອຳນວຍຄວາມສະດວກດ້ານສິນຄ້າຜ່ານແດນ ລວມໄປເຖິງສ້າງກາລະໂອກາດໃນການຈັບຄູ່ທຸລະກິດຂອງສອງຝ່າຍ. ນອກນີ້, ກອງປະຊຸມຍັງເຫັນດີເປັນເອກະພາບຕໍ່ຮ່າງບົດບັນທຶກກອງປະຊຸມແຜນການຮ່ວມມືລະຫວ່າງກະຊວງອຸດສາຫະກຳ ແລະ ການຄ້າແຫ່ງ ສປປ ລາວ ແລະ ກະຊວງພານິດ ແຫ່ງຣາຊະອານາຈັກໄທຄັ້ງທີ 7 ບົນພື້ນຖານການຜັນຂະຫຍາຍເນື້ອໃນຈິດໃຈ ຂອງສອງຮອງນາຍົກລັດຖະມົນຕີ ກໍຄືສອງລັດຖະບານທີ່ໄດ້ພົບປະກັນໃນເດືອນພຶດສະພາ 2017 ຜ່ານມາທີ່ນະຄອນຫລວງວຽງຈັນ, ໂດຍຕັ້ງເປົ້າໃຫ້ມູນຄ່າການຄ້າຂອງສອງປະເທດບັນລຸກວ່າ 11 ພັນລ້ານໂດລາສະຫະລັດໃນປີ 2021.
ໂອກາດນີ້, ທ່ານນາງ ເຂັມມະນີ ພົນເສນາ ໄດ້ກ່າວມີຄໍາເຫັນວ່າ: ໄທເປັນອັນດັບ 2 ຂອງການລົງທຶນຕ່າງປະເທດຢູ່ລາວ, ເຊິ່ງໃນປີ 2017 ມູນຄ່າການຄ້າສອງຝ່າຍບັນລຸໄດ້ 6,1 ຕື້ໂດລາສະຫະລັດ, ເພີ່ມຂຶ້ນ 5,08% ເມື່ອທຽບໃສ່ປີ 2016. ນັບແຕ່ປີ 2015 ການຄ້າສອງຝ່າຍເພີ່ມຂຶ້ນສະເລ່ຍປະມານ 4% ຕໍ່ປີ. ສຳລັບ 6 ເດືອນຕົ້ນປີ 2018 ມູນຄ່າການຄ້າລະຫວ່າງລາວ-ໄທ ເພີ່ມຂຶ້ນ 17% ແຕ່ເຖິງແນວໃດກໍຕາມ ສອງຝ່າຍຍັງຕ້ອງໄດ້ຊຸກຍູ້ສົ່ງເສີມຮ່ວມກັນຫລາຍຂຶ້ນຕື່ມ ເພື່ອໃຫ້ບັນລຸມູນຄ່າການຄ້າຕາມເປົ້າໝາຍວາງໄວ້.
