ມາເລເຊຍຂຶ້ນຄ່າແຮງຂັ້ນຕໍ່າທົ່ວປະເທດ
ລັດຖະບານມາເລເຊຍປະກາດຂຶ້ນຄ່າແຮງຂັ້ນຕໍ່າທົ່ວປະເທດສູ່ລະດັບ 1.050 ຣິງກິດ (253 ໂດລາ) ຕໍ່ເດືອນ ໂດຍມີຜົນບັງຄັບໃຊ້ໃນປີໜ້າ.
ສຳນັກນາຍົກລັດຖະມົນຕີ ຖະແຫລງວ່າ: ຫລັງຈາກໄດ້ພິຈາລະນາຂໍ້ສະເໜີຈາກຄະນະກຳມະການທີ່ປຶກສາຄ່າແຮງງານແຫ່ງຊາດ, ລັດຖະບານໄດ້ເຫັນພ້ອມຈະປັບເພີ່ມຄ່າແຮງຂັ້ນຕໍ່າສູ່ລະດັບ 1.050 ຣິງກິດຕໍ່ເດືອນ ຫລື 5,05 ຣິງກິດຕໍ່ຊົ່ວໂມງທົ່ວປະເທດ ເຊິ່ງລວມທັງລັດຊາບາ ແລະ ຊາຣາວັກ.
ປັດຈຸບັນ ຄ່າແຮງງານໃນມາເລເຊຍຢູ່ລະດັບ 1.000 ຣິງກິດຕໍ່ເດືອນ, ຂະນະທີ່ລັດຊາບາ ແລະ ຊາຣາວັກຢູ່ລະດັບ 920 ຣິງກິດ.
ຖະແຫລງການລະບຸວ່າ: ຄ່າແຮງຂັ້ນຕໍ່າສອດຄ່ອງຕໍ່ສະພາບເສດຖະກິດຂອງປະເທດໃນປັດຈຸບັນ, ການປັບຂຶ້ນຄ່າແຮງຂະໜາດໃຫຍ່ຈະສ້າງບັນຫາຕໍ່ຂະແໜງອຸດສາຫະກຳ ເຊິ່ງຈະກະທົບຕໍ່ຄວາມສາມາດໃນການແຂ່ງຂັນຂອງປະເທດ ແລະ ເນື່ອງຈາກຂໍ້ຈຳກັດທາງດ້ານການເງິນຂອງປະເທດ, ລັດຖະບານໄດ້ຕັດສິນໃຈຈະບໍ່ໃຫ້ການຊົດເຊີຍຕໍ່ຝ່າຍນາຍຈ້າງ.
