ການບິນລາວ ແລະ ອົງການອາຫານໂລກ ສົ່ງເສີມການຮ່ວມມືດ້ານໂພຊະນາການ
ພິທີຖະແຫລງຂ່າວເພື່ອຊີ້ແຈງການຮ່ວມມືລະຫວ່າງລັດວິສາຫະກິດການບິນລາວ ແລະ ອົງການອາຫານໂລກ (WFP) ໄດ້ມີຂຶ້ນໃນວັນທີ 5 ກັນຍານີ້ ທນະຄອນຫລວງວຽງຈັນ ເພື່ອຮ່ວມກັນໂຄສະນາປະຊາສຳພັນກ່ຽວກັບວຽກງານໂພຊະນາການ ແລະ ອາຫານ ແນ່ໃສ່ປັປປຸງຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ສົ່ງເສີມການບໍລິໂພກທີ່ຖືກສຸຂະອະນາໄມຢ່າງຮອບດ້ານ.
ຮອງຜູ້ອຳນວຍການອົງການອາຫານໂລກປະຈຳລາວ ກ່າວວ່າ: ໃນໄລຍະຜ່ານມາເຫັນວ່າອັດຕາການຂາດສານອາຫານຂອງເດັກນ້ອຍໄດ້ມີຈຳນວນຫລຸດລົງຢ່າງຕໍ່ເນື່ອງ, ແຕ່ເຖິງຢ່າງໃດກໍຕາມ 1 ໃນ 5 ຂອງປະຊາກອນຍັງບໍລິໂພກອາຫານຕໍ່າກວ່າທີ່ຮ່າງກາຍຕ້ອງການ, ເຊິ່ງປັດຈຸບັນ, ອົງການອາຫານໂລກໄດ້ສະໜັບສະໜູນໂຄງການອາຫານກາງວັນ, ເຊິ່ງເປັນໂຄງການຊ່ວຍຫລຸດຜ່ອນຄວາມທຸກຍາກໃຫ້ໂຮງຮຽນຕ່າງໆໃນເຂດຫ່າງໄກໃຫ້ນັກຮຽນໄດ້ກິນອາຫານຖືກຕ້ອງຕາມໂພຊະນາການ, ໂດຍມີເປົ້າໝາຍ 1.000 ກວ່າແຫ່ງໃນ 32 ເມືອງ. ໃນນັ້ນ, ມີແຂວງຜົ້ງສາລີ, ອຸດົມໄຊ, ຫລວງນໍ້າທາ, ຫລວງພະບາງ, ສາລະວັນ, ເຊກອງ ແລະ ແຂວງອັດຕະປື ຈົນເຖິງປີ 2021.
ຮອງປະທານລັດວິສາຫະກິດການບິນລາວ ໃຫ້ຮູ້ວ່າ: ການຮ່ວມມືກັນໃນຄັ້ງນີ້, ການບິນລາວ ຈະເປັນອີກຊ່ອງທາງໜຶ່ງໃນການເຜີຍແຜ່ໂຄສະນາປະຊາສຳພັນໃຫ້ສັງຄົມລາວກໍຄືທົ່ວໂລກ, ໄດ້ຮັບຮູ້ຂໍ້ມູນຢ່າງກວ້າງຂວາງກ່ຽວກັບວຽກງານດັ່ງກ່າວຜ່ານສື່ຕ່າງໆຂອງການບິນລາວ ເປັນຕົ້ນ ແມ່ນວາລະສານ ປະຈຳສາຍການບິນຕ່າງໆ, ເວັບໄຊ, ເຟດບຸກ ແລະ ອື່ນໆ ໃຫ້ເກີດປະໂຫຍດສູງສຸດ. ທັງນີ້ ກໍເພື່ອໃຫ້ປະຊາຊົນ ໄດ້ມີສ່ວນຮ່ວມ ໃນການປະຕິບັດ ໂຄງ ການດັ່ງກ່າວ ໃຫ້ບັນລຸຕາມເປົ້າໝາຍ ແລະ ຫວັງວ່າການຮ່ວມມືກັນ ໃນໄລຍະ 2 ປີນີ້ ຈະຊ່ວຍສົ່ງເສີມ ວຽກງານທີ່ອົງການອາຫານໂລກ ລວມໄປເຖິງຄູ່ຮ່ວມງານ ທີ່ກຳລັງດຳເນີນງານຢູ່ ໃນການສະໜັບສະໜູນ ຄວາມພະຍາຍາມຂອງລັດຖະບານລາວ ທີ່ກຳລັງສຸມໃສ່ວຽກງານດັ່ງກ່າວ ໃຫ້ປະກົດຜົນເປັນຈິງ.
