ກິນຕອນເດິກສ່ຽງເປັນເບົາຫວານ ແລະ ພະຍາດຫົວໃຈ

ນັກວິໄຈຈາກມະຫາວິທະຍາໄລເພນຊິລເວເນີຍ ໃນສະຫະລັດອາເມລິກາ ພົບວ່າ : ການກິນອາຫານຕອນກາງຄືນ ສົ່ງຜົນໃຫ້ລະດັບອິນຊູລິນ ແລະ ຄໍຕິໂຊນສູງຂຶ້ນ ທັງຍັງສ່ຽງຕໍ່ການເປັນພະຍາດເບົາຫວານ ແລະ  ພະຍາດຫົວໃຈ.

ຜົນການທົດລອງກັບ 2 ກຸ່ມໂຕຢ່າງ ໂດຍກຸ່ມທຳອິດໃຫ້ກິນເຂົ້າ 3 ຄາບ ແລະ ອາຫານວ່າງ 2 ຄາບ ໃນເວລາ 8.00 – 19.00 ໂມງ. ສ່ວນອີກກຸ່ມໜຶ່ງໃຫ້ກິນອາຫານ ແລະ ຂອງວ່າງໃນປະລິມານເທົ່າກັນ ພຽງແຕ່ໃຫ້ກິນໃນເວລາ 12.00 – 23.00 ໂມງ ແລະ ໃຫ້ເຂົ້ານອນເວລາດຽວກັນຄື 23.00 – 9.00 ໂມງ ໂດຍທົດລອງດົນ 8 ອາທິດ.

ຜົນປະກົດວ່າ ກຸ່ມທີ 2 ເຊິ່ງກິນເຂົ້າແລງເດິກເກີນໄປ ມີນຳ້ໜັກໂຕເພີ່ມຂຶ້ນ, ລະບົບການເຜົາຜານອາຫານຫລຸດປະສິດທິພາບລົງ. ຂະນະທີ່ລະດັບອິນຊູລິນ, ຄໍຕິໂຊນ ແລະ ໄຂມັນໄຕຣກລີເຊີໄຣສູງຂຶ້ນສ່ຽງຕໍ່ການເປັນເບົາຫວານ ແລະ ພະຍາດຫົວໃຈ ລວມເຖິງບັນຫາສຸຂະພາບອື່ນໆທີ່ຕາມມາ.

ນອກຈາກນີ້, ທີມວິໄຈຍັງພົບວ່າ ການກິນອາຫານກ່ອນເວລາ 19.00 ໂມງ ຈະສົ່ງຜົນຕໍ່ການປ່ຽນແປງລະດັບຮໍໂມນໃນຮ່າງ ກາຍ ທັງຮໍໂມນຄວາມຫິວ (ເກຣລິນ) ແລະ ຮໍໂມນຄວາມອີ່ມ (ເລບຕິນ) ເຊິ່ງຈະຊ່ວຍໃຫ້ເຮົາຮູ້ສຶກອີ່ມທ້ອງໄດ້ດົນກ່ວາການກິນອາຫານໃນຕອນກາງຄືນນຳອີກ.