ປະໂຫຍດຂອງວິຕາມິນ D ທີ່ມີຫລາຍກວ່າບຳລຸງກະດູກ
ວິຕາມິນເດ ນອກຈາກຈະຊ່ວຍເລື່ອງການດູດຊຶມທາດການຊຽມ ແລະ ຟົສຟໍແລ້ວ ຜົນການສຶກສາວິໄຈຄັ້ງໃໝ່ນີ້ຍັງພົບປະ ໂຫຍດຂອງວິຕາມິນ D ວ່າມີສ່ວນຊ່ວຍປິ່ນປົວພະຍາດຕ່າງໆໄດ້ນຳ.
– ວິຕາມິນ D ມີໜ້າທີ່ແນວໃດ?
ນັກວິທະຍາສາດຮູ້ກັນດີວ່າວິຕາມິນເດແມ່ນສິ່ງຈຳເປັນໃນການຮັກສາສຸຂະພາບໃຫ້ແຂງແຮງ ຖ້າໃຜຂາດວິຕາມິນເດກໍຈະເຮັດໃຫ້ເກີດບັນຫາຕ່າງໆ ທັງທາງຮ່າງກາຍ ແລະ ຈິດໃຈ. ສ່ວນໜ້າທີ່ສຳຄັນທີ່ສຸດຂອງວິຕາມິນເດນັ້ນກໍຄືໃນເລື່ອງການເສີມສ້າງທາດການຊຽມຂຶ້ນມາໃນຮ່າງກາຍ ເຮັດໃຫ້ກະດູກມີຄວາມແຂງແຮງ ແລະ ປ້ອງກັນພະຍາດກະດູກຜ່ອຍໄດ້.
ນອກຈາກນີ້, ການສຶກສາວິໄຈຄັ້ງໃໝ່ຍັງພົບຕື່ມວ່າ ວິຕາມິນເດອາດຊ່ວຍປ້ອງກັນພະຍາດຫົວໃຈວາຍ, ເບົາຫວານ, ມະເຮັງ, ການຕິດເຊື້ອໃນລະບົບການຫາຍໃຈ, ພະຍາດແພ້ພູມຕ້ານທານຕົນເອງ ແລະ ອາການຜົມຫລົ່ນ ເຊິ່ງຄົນໃນຍຸກນີ້ມີອາການຂາດວິຕາມິນເດກັນຫລາຍຂຶ້ນ ເນື່ອງຈາກຕ້ອງນັ່ງເຮັດວຽກຢູ່ໃນຫ້ອງການແຕ່ເຊົ້າຮອດຄໍ່າ ຫລື ແມ່ນແຕ່ທາຄຣີມກັນແດດ ຈຶ່ງເຮັດໃຫ້ຜິວໜັງບໍ່ໄດ້ຮັບການກະຕຸ້ນຈາກແສງແດດໃນການສ້າງວິຕາມິນເດຂຶ້ນມາ. ອາການຂາດວິຕາມິນເດຂອງແຕ່ລະຄົນຈະແຕກຕ່າງກັນໄປ, ແຕ່ສ່ວນຫລາຍແລ້ວກໍມັກຈະມີອາການປວດບໍລິເວນຂໍ້ຕໍ່, ກ້າມຊີ້ນ ແລະ ກະດູກ, ອ່ອນເພຍ, ມີບັນຫາດ້ານການຫາຍໃຈ ແລະ ມີອາການຊຶມເສົ້າ.
– ວິຕາມິນ D ກັບພະຍາດຫົວໃຈລົ້ມເຫລວ : ຜົນການສຶກສາວິໄຈຫລວງຫລາຍສະແດງໃຫ້ເຫັນວ່າ ວິຕາມິນເດອາດຊ່ວຍປ້ອງກັນພະຍາດຫລອດເລືອດຫົວໃຈໄດ້, ແຕ່ນັກວິທະຍາສາດຍັງຕ້ອງຫາຂໍ້ສະຫລຸບຕື່ມວ່າ ວິຕາມິນເດສົ່ງຜົນແບບນີ້ໄດ້ແນວໃດ. ເມື່ອບໍ່ດົນມານີ້ມີການລາຍງານວ່າ ນັກວິໄຈໄດ້ທົດລອງກັບໜູທົດລອງເພື່ອສຶກສາໃນເລື່ອງເນື້ອເຍື່ອບໍລິເວນຫົວໃຈທີ່ເກີດຮອຍແປ້ວ ເນື່ອງຈາກເວລາທີ່ເນື້ອເຍື່ອບໍລິເວນຫົວໃຈເກີດຮອຍແປ້ວນັ້ນ ຫົວໃຈກໍຈະຟອກເລືອດໄດ້ລຳບາກຂຶ້ນ ສົ່ງຜົນໃຫ້ເກີດອາການຫົວໃຈລົ້ມເຫລວຂຶ້ນໃນທີ່ສຸດ ເຊິ່ງຜົນການສຶກສາພົບວ່າວິຕາມິນເດຊ່ວຍບໍ່ໃຫ້ເນື້ອເຍື່ອບໍລິເວນຫົວໃຈຂອງໜູທົດລອງເກີດຮອຍແປ້ວຂຶ້ນມາ ຈຶ່ງຊ່ວຍປ້ອງກັນການອັດຕັນໃນລະບົບຫລອດເລືອດຫົວໃຈ ເຊິ່ງຖ້າສຶກສາວິໄຈຕື່ມໃຫ້ຫລາຍຂຶ້ນ ນັກວິໄຈເຊື່ອວ່າ ວິຕາມິນເດໜ້າຈະເປັນໂຕຊ່ວຍໃໝ່ທີ່ມີລາຄາຖືກໃນການປ້ອງກັນພະຍາດຫົວໃຈລົ້ມເຫລວໃນຄົນໄດ້.
– ວິຕາມິນ D ກັບພະຍາດມະເຮັງ : ການສຶກສາວິໄຈພົບວ່າພະຍາດມະເຮັງເຕົ້ານົມ ແລະ ມະເຮັງລຳໄສ້ນັ້ນມີສ່ວນກ່ຽວຂ້ອງກັບອາການຂາດວິຕາມິນເດໃນຮ່າງກາຍ ນອກຈາກນີ້ ຍັງພົບວ່າມີວິຕາມິນເດໃນລະດັບສູງ ຍັງຊ່ວຍປ້ອງກັນພະຍາດມະເຮັງເຕົ້ານົມໄດ້ນຳອີກ ເວົ້າງ່າຍໆກໍຄື ຍິ່ງມີວິຕາມິນເດຫລາຍກໍຍິ່ງຫລຸດຄວາມສ່ຽງໃນການເປັນມະເຮັງເຕົ້ານົມໄດ້ ໂດຍນັກວິໄຈໄດ້ຄຳນວນໄວ້ວ່າ ຜູ້ທ່ີມີລະດັບວິຕາມິນເດຕໍ່າກ່ວາທີ່ລະບຸໄວ້ໃນເກນມາດຕະຖານມີຄວາມສ່ຽງທີ່ຈະເປັນພະຍາດມະເຮັງລຳໄສ້ເພີ່ມຂຶ້ນ 31%. ສ່ວນຄົນທີ່ມີລະດັບວິຕາມິນເດສູງກ່ວາທີ່ລະບຸໄວ້ ຈະມີຄວາມສ່ຽງໃນການເປັນມະເຮັງຊະນິດນີ້ຫລຸດລົງເຖິງ 22%.
– ວິຕາມິນ D ກັບໄຂມັນໜ້າທ້ອງ : ການສຶກສາວິໄຈກ່ຽວກັບຄວາມຕຸ້ຍ ແລະ ການມີລະດັບວິຕາມິນເດຕໍ່າ ໂດຍເນັ້ນສຶກສາວ່າ ໄຂມັນຊະນິດໃດໃນຮ່າງກາຍທີ່ອາດຕອບສະໜອງຕໍ່ວິຕາມິນເດ ເຊິ່ງນັກວິໄຈລາຍງານວ່າ ໄຂມັນສ່ວນເກີນບໍລິເວນໜ້າທ້ອງນັ້ນມີສ່ວນກ່ຽວຂ້ອງກັບວິຕາມິນເດໃນລະດັບຕໍ່າ, ແຕ່ຍັງຕ້ອງສຶກສາຕໍ່ໄປ ເພື່ອຫາຂໍ້ສະຫລຸບວ່າການຂາດວິຕາມິນເດເຮັດໃຫ້ເກີດໄຂມັນສ່ວນເກີນບໍລິເວນໜ້າທ້ອງ ຫລື ການມີໄຂມັນສ່ວນເກີນບໍລິເວນໜ້າທ້ອງ ແລ້ວເຮັດໃຫ້ເກີດອາການຂາດວິຕາມິນເດກັນແທ້.
– ວິຕາມິນ D ກັບຄວາມຈື່ຈຳເສື່ອມ : ໃນການຫາຂໍ້ສະຫລຸບວ່າ ວິຕາມິນເດສາມາດຊ່ວຍປ້ອງກັນຄວາມຈື່ຈຳເສື່ອມໄດ້ບໍ່ນັ້ນ ຜົນການສຶກສາວິໄຈໄດ້ເຜີຍຂໍ້ມູນມາວ່າ : ອາການຂາດວິຕາມິນເດນັ້ນບໍ່ມີສ່ວນກ່ຽວຂ້ອງກັບຄວາມຈື່ຈຳເສື່ອມ, ແຕ່ອາດມີສ່ວນກ່ຽວຂ້ອງກັນລະຫວ່າງການຖືກລັງສີຢູວີໃນແສງແດດກັບການປ້ອງກັນອາການປອກສະປາດເສື່ອມ, ພາກິນສັນ ແລະ ຄວາມຈື່ຈຳເສື່ອມ, ແຕ່ກໍຂຶ້ນຢູ່ກັບການຜະລິດວິຕາມິນເດໃນຮ່າງກາຍນຳ ເຊິ່ງນັກວິໄຈບອກວ່າຍັງຕ້ອງສຶກສາຕື່ມ.
– ອາຫານທີ່ມີວິຕາມິນ D : ຖ້າທ່ານໄດ້ຮັບແສງແດດບໍ່ພຽງພໍກໍລອງກິນອາຫານທີ່ມີວິຕາມິນເດ ເຊິ່ງຈະຊ່ວຍເພີ່ມລະດັບວິຕາມິນເດໃຫ້ທ່ານໄດ້.
– ປາແຊວມັອນ : ຜົນການສຶກສາວິໄຈພົບວ່າປາແຊວມັອນມີວິຕາມິນເດຫລາຍເຖິງ 988 IU ຕໍ່ນຳ້ໜັກ 100 ກຣາມ ເຊິ່ງຫລາຍກ່ວາປະລິມານທີ່ຄວນກິນໃນແຕ່ລະມື້ເຖິງ 247%.
– ປາຊາດີນ : ມີວິຕາມິນເດ 272 IU ເຊິ່ງຫລາຍກ່ວາປະລິມານທີ່ຄວນກິນໃນແຕ່ລະມື້ເຖິງ 68%.
– ປາທູນ່າກະປ໋ອງ : ປາທູນ່າກະປ໋ອງມີວິາມິນເດ 236 IU ຕໍ່ນຳ້ໜັກ 100 ກຣາມ ເຊິ່ງຫລາຍກ່ວາປະລິມານທີ່ຄວນກິນໃນແຕ່ລະມື້ 50%.
– ຫອຍນາງລົມ : ມີວິຕາມິນ D 320 IU ຕໍ່ນຳ້ໜັກ 100 ກຣາມ ເຊິ່ງຫລາຍກ່ວາປະລິມານທີ່ຄວນກິນໃນແຕ່ລະມື້ 80%, ແຕ່ມີກາລໍຣີຫລາຍເຖິງ 68 ກາລໍຣີ ເຊິ່ງກິນຫລາຍກໍສາມາດເຮັດໃຫ້ທ່ານຕຸ້ຍງ່າຍໄດ້ຄືກັນ.
