ມວນຊົນຕ້ອນຮັບປັນຈັກສີລັດທີ່ຍາດໄດ້ 1 ຫລຽນເງິນທີ່ອິນໂດເນເຊຍ
ທ້າຍອາທິດຜ່ານມາ ທີ່ສະໜາມບິນວັດໄຕ ນະຄອນຫລວງວຽງຈັນ ມວນຊົນແຫ່ຕ້ອນຮັບນັກກິລາ ປັນຈັກສີລັດ ທີ່ສ້າງຜົນງານໂດດເດັ່ນຍາດໄດ້ 1 ຫລຽນເງິນ, 2 ຫລຽນທອງ ໃນງານມະຫາກໍາ ເອຊຽນເກມຄັ້ງ 18 ທີ່ນະຄອນຫລວງຈາກາຕາ ປະເທດອິນໂດເນເຊຍ ໃຫ້ກຽດຕ້ອນຮັບໂດຍ ທ່ານ ນາງ ໂພໄຊ ແພງພົງ ຮອງກົມກິລາສາຍສູງ ກະຊວງສຶກສາທິການ ແລະ ກິລາ ພ້ອມດ້ວຍພໍ່ແມ່ຜູ້ປົກຄອງຂອງນັກກິລາ.
ທ່ານ ນາງ ໂພໄຊ ແພງພົງ ໄດ້ໃຫ້ສໍາພາດວ່າ: ການແຂ່ງຂັນງານມະຫາກໍາເອຊຽນຄັ້ງທີ 18 ນີ້ ທີ່ຈັດຂຶ້ນລະຫວ່າງວັນທີ 10 ສິງຫາ – 1 ກັນຍາ ສປປ ລາວ ສົ່ງ 19 ປະເພດກິລາຄື: ກະຕໍ້, ວູຊູ, ເທຄວັນໂດ, ຢູໂດ, ປັນຈັກສີລັດ, ຍິງທະນູ, ມວຍສາກົນ, ແລ່ນ-ລານ, ລົດຖີບ, ລອຍນໍ້າ, ກາຣາເຕໂດ ແລະ ຍົກນໍ້າໜັກ ຊອບເທັນນິສ, ປິ່ງປ່ອງ, ບານເຕະຊາຍ, ພາລາກາຍດິ້ງ, ເບສບອນ, ອີ່ສະປອດ ແລະ ຍິງປືນ. ຜ່ານການແຂ່ງຂັນທີມນັກກິລາ ສປປ ລາວ ສາມາດຍາດໄດ້ 2 ຫລຽນເງິນ ແລະ 2 ຫລຽນທອງ ເຊິ່ງໃນນັ້ນ 2 ຫລຽນເງິນໄດ້ ຈາກກະຕໍ້ທີມຊຸດຊາຍ ແລະ ປັນຈັກສີລັດ ຈາກປະເພດຕໍ່ສູ້ ນາງ ນ້ອງອ້ອຍ ພົງພັກດີ ເຊິ່ງເປັນຫລຽນເງິນທໍາອິດທີ່ສ້າງຊື່ສຽງໃຫ້ແກ່ສະຫະພັນປັນຈັກສີລັດແຫ່ງຊາດລາວ ກໍຄື ສປປ ລາວ ໃນເວທີພາກພື້ນ ແລະ ສາກົນ.
ການແຂ່ງຂັນຄັ້ງນີ້ສະຫະພັນປັນຈັກສີລັດແຫ່ງຊາດລາວ ສົ່ງນັກກິລາເຂົ້າຮ່ວມທັງໝົດ 8 ຄົນ, ເຂົ້າຮ່ວມລາຍການຕໍ່ສູ້ ແລະ ຟ້ອນ.
