ກະຕໍ້ຍິງ ລົງສະໜາມພົບ ໄທ ມື້ນີ້

ນັກກິລາກະຕໍ້ 4 ຄົນຍິງທີມຊາດລາວ ລົງສະໜາມແຂ່ງຂັນໃນຮອບຮອງຊະນະເລີດພົບກັບ ທີມຊາດໄທ ໃນວັນທີ 31 ນີ້ ຂອງການແຂ່ງຂັນເອຊຽນເກມ 2018 ທີ່ປະເທດອິນໂດເນເຊຍ ຈັດຂຶ້ນລະຫວ່າງວັນທີ 10 ສິງຫາ – 1 ກັນຍາ.

ທ່ານ ສົມໃຈ ແກ້ວປະເສີດ ຫົວໜ້າຄູຝຶກກະຕໍ້ທີມຊາດລາວ ໃຫ້ສໍາພາດວ່າ: ການແຂ່ງຂັນຄັ້ງນີ້ທີມຊາດກະຕໍ້ຍິງພວກເຮົາສົ່ງເຂົ້າຮ່ວມ 2 ລາຍການຄື: ທີມຊຸດ ແລະ ທີມ 4 ຄົນ, ການແຂ່ງຂັນໃນລາຍການທີມຊຸດພວກເຮົາບໍ່ສາມາດຜ່ານເຂົ້າຮອບໄດ້ ຍັງເຫລືອພຽງແຕ່ລາຍການທີມ 4 ຄົນ. ສໍາລັບລາຍການທີມ 4 ຄົນ, ທີມຊາດຍິງລາວ ຖືກຈັດຢູ່ກຸ່ມເອ ປະກອບມີ: ທີມຊາດມຽນມາ, ສ.ເກົາຫລີ, ອິນໂດເນເຊຍ ແລະ ລາວ. ການແຂ່ງຂັນໃນຮອບແບ່ງກຸ່ມທີມຊາດລາວ 3 ນັດ ຊະນະ 2 ນັດ ເສຍ 1 ນັດຄື: ມຽນມາ 2-0 ເຊັດ, ຊະນະ ສ.ເກົາຫລີ 2-0 ເຊັດ ແລະ ເສຍ ອິນໂດເນເຊຍ ເຈົ້າພາບ 0-2 ເຊັດ (7-21,16-21) ສົ່ງຜົນໃຫ້ທີມກະຕໍ້ຍິງລາວ ເປັນອັບດັບທີ 2 ຂອງກຸ່ມ A ເຂົ້າຮອບຮອງຊະນະເລີດ ເຊິ່ງຕ້ອງພົບກັບ ທີມຊາດໄທ ອັນດັບທີ 1 ຂອງກຸ່ມ B ໂດຍຈະລົງສະໜາມແຂ່ງຂັນໃນມື້ນີ້.

ສະຫລຸບຕາຕະລາງຫລຽນ ສປປ ລາວ ຍາດໄດ້ 2 ຫລຽນເງິນ 2 ຫລຽນທອງ ຈາກການສົ່ງເຂົ້າຮ່ວມ 19 ປະເພດກິລາຄື: ກະຕໍ້, ວູຊູ, ເທຄວັນໂດ, ຢູໂດ, ປັນຈັກສີລັດ, ຍິງທະນູ, ມວຍສາກົນ, ແລ່ນ-ລານ, ລົດຖີບ, ລອຍນໍ້າ, ກາຣາເຕໂດ ແລະ ຍົກນໍ້າໜັກ ຊອບເທັນນິສ, ປິ່ງປ໋ອງ, ບານເຕະຊາຍ, ພາລາກາຍດິ້ງ, ເບສບອນ, ອີ່ສະປອດ ແລະ ຍິງປືນ.