ຄວາມຄືບໜ້າການຊ່ວຍເຫລືອ ແລະ ບັນເທົາທຸກແກ່ຜູ້ປະສົບໄພນ້ຳຖ້ວມຢູ່ອັດຕະປື
ໃນວັນທີ 28 ສິງຫານີ້, ຄະນະຟື້ນຟູ ແລະ ແກ້ໄຂໄພພິບັດຖະແຫລງກ່ຽວກັບການຊ່ວຍເຫລືອ ແລະ ບັນເທົາທຸກຜູ້ປະສົບໄພນ້ຳຖ້ວມວ່າ: ປັດຈຸບັນຍັງບໍ່ສາມາດປະຕິບັດວຽກງານການຄົ້ນຫາຜູ້ສູນຫາຍໄດ້ ເນື່ອງຈາກພື້ນທີ່ດັ່ງກ່າວຍັງມີນ້ຳ ແລະ ຕົມເລິກ ເຊິ່ງບໍ່ສາມາດຍົກຍ້າຍກຳລັງພົນ ແລະ ອຸປະກອນເຂົ້າໃນພື້ນທີ່ດັ່ງກ່າວໄດ້. ດັ່ງນັ້ນ, ໜ່ວຍກອບກູ້ຜູ້ສູນຫາຍຂອງກອງທັບປະຊາຊົນລາວ ຈຶ່ງໄດ້ຈັດແບ່ງກຳລັງເຮັດວຽກງານປິ່ນປົວສຸຂະພາບໃຫ້ປະຊາຊົນຜູ້ປະສົບໄພນ້ຳຖ້ວມທີ່ເຂົ້າມາປິ່ນປົວຢູ່ໂຮງໝໍສຸກເສີນ ໃນຄ້າຍທະຫານເມືອງສະໜາມໄຊ ແລະ ອື່ນໆ.
ທ່ານ ບຸນໂຮມ ພົມມະສານ ເຈົ້າເມືອງສະໜາມໄຊ ໃຫ້ຮູ້ວ່າ: ສຳລັບການກໍ່ສ້າງທີ່ພັກຊົ່ວຄາວ ຢູ່ບ້ານຫາດຍາວ ຈຳນວນ 14 ຫລັງ, ມີ 140 ຫ້ອງ ໃຫ້ປະຊາຊົນທີ່ໄດ້ຮັບຜົນກະທົບແມ່ນມີຄວາມຄືບໜ້າກວ່າ 85% ແລະ ຄາດວ່າຈະໃຫ້ສຳເລັດໃນຕົ້ນເດືອນກັນຍານີ້, ພ້ອມທັງເລັ່ງບຸກເບີກພື້ນທີ່ປຸກສ້າງເຮືອນພັກຊົ່ວຄາວໃຫ້ປະຊາຊົນຢູ່ 4 ຈຸດຄື: ເຂດດົງບາກ ແມ່ນນຳໃຊ້ແຮງງານຄົນອະນາໄມຖາກຖາງສຳເລັດແລ້ວ, ເຂດບ້ານຕະມໍຢອດ ແມ່ນໄດ້ສືບຕໍ່ບຸກເບີກອະນາໄມຄືນຂອບເຂດເກົ່າ ປະຕິບັດໄດ້ 98%, ປັດຈຸບັນ ພວມດຳເນີນການສຳຫລວດ ແລະ ວາງແຜນຜັງເພື່ອດຳເນີນການປຸກສ້າງ, ຄຸ້ມດອນບົກ ແມ່ນໄດ້ສືບຕໍ່ບຸກເບີກອະນາໄມຄືນຂອບເຂດເກົ່າ ປະຕິບັດໄດ້ຫລາຍກວ່າ 35% ແລະ ຈຸດບ້ານປິນດົງ ແມ່ນຍັງບໍ່ທັນໄດ້ຈັດຕັ້ງປະຕິບັດ ເນື່ອງຈາກບໍ່ສາມາດເອົາກົນຈັກເຂົ້າໄປໄດ້ ເຊິ່ງໄດ້ຊຸກຍູ້ໃຫ້ບໍລິສັດຜູ້ຮັບຜິດຊອບບຸກເບີກພື້ນທີ່ດັ່ງກ່າວ ຊອກຫາວິທີນຳກົນຈັກເຂົ້າໄປບຸກເບີກໃຫ້ໄວເທົ່າທີຄວນ. ສຳລັບການກະກຽມການຮຽນ-ການສອນ ໂດຍສະເພາະແມ່ນການເປີດສົກຮຽນໃໝ່ ສົກ 2018-2019 ກໍໄດ້ມີການກະກຽມຮອບດ້ານ ແລະ ຄາດວ່າຈະເປີດສົກຮຽນໃໝ່ຢ່າງເປັນທາງການ ໃນວັນທີ 3 ກັນຍານີ້.
