ກຳປູເຈຍພ້ອມເປັນເຈົ້າພາບກອງປະຊຸມເວທີເສດຖະກິດໂລກວ່າດ້ວຍອາຊຽນ
ພະນົມເປັນ 4 ພຶດສະພາ: ສຳນັກຂ່າວຊິນຮົວຂອງທາງການຈີນລາຍງານວ່າ: ກຳປູເຈຍປະກາດພ້ອມເປັນເຈົ້າພາບຈັດກອງປະຊຸມເວທີເສດຖະກິດໂລກວ່າດ້ວຍອາຊຽນ ລະຫວ່າງວັນທີ 10-12 ພຶດສະພານີ້.
ທ່ານ ຊັນ ຈັນທອນ ລັດຖະມົນຕີວ່າການກະຊວງຄົມມະນາຄົມກຳປູເຈຍ ກ່າວວ່າ: ຜູ້ເຂົ້າຮ່ວມກອງປະຊຸມໃນເທື່ອນີ້ຈະມີຜູ້ນຳຈາກພາກສ່ວນຕ່າງໆ ແລະ ນັກວິໄຈຈາກທົ່ວໂລກ 620 ກວ່າຄົນ ລວມທັງປະທານາທິບໍດີ ໂຣດຣິໂກ ດູເຕີເຕ ຂອງຟີລິບປິນ, ນາຍົກລັດຖະມົນຕີ ຫງວຽນ ຊວນ ຟຸກ ຂອງຫວຽດນາມ, ນາຍົກລັດຖະມົນຕີ ທອງລຸນ ສີສຸລິດ ຂອງ ສປປ ລາວ ແລະ ທ່ານ ຈິນ ລີ່ສິວ ປະທານທະນາຄານເພື່ອການລົງທຶນໂຄງລ່າງພື້ນຖານແຫ່ງອາຊີ ຫລື AIIB ທີ່ຈະເດີນທາງມາເຂົ້າຮ່ວມນຳ. ຂະນະທີ່ນາຍົກລັດຖະມົນຕີ ຮຸນ ເຊນ ຈະເປັນປະທານໃນພິທີເປີດໃນວັນທີ 11 ພຶດສະພາ.
ທ່ານ ຊັນ ກ່າວອີກວ່າ: ກອງປະຊຸມເທື່ອນີ້ຈະເປັນໂອກາດທີ່ດີຂອງກຳປູເຈຍຈະສະແດງປະສິດທິພາບດ້ານການລົງທຶນໃຫ້ບັນດານັກລົງທຶນຕ່າງປະເທດຮັບຮູ້ ເຊິ່ງຈະຊ່ວຍດຶງດູດນັກລົງທຶນ ແລະ ນັກທ່ອງທ່ຽວໃຫ້ມາກຳປູເຈຍຫລາຍຂຶ້ນ. ນອກຈາກນີ້ ເພື່ອເປັນການສະໜັບສະໜູນການທ່ອງທ່ຽວພາຍໃນປະເທດ. ພາຍຫລັງກອງປະຊຸມສຳເລັດ, ຜູ້ເຂົ້າຮ່ວມປະຊຸມທຸກທ່ານຈະໄດ້ຮັບປີ້ເຮືອບິນເດີນທາງຈາກນະຄອນຫລວງພະນົມເປັນໄປຢ້ຽມຊົມອຸທະຍານປະຫວັດສາດນະຄອນວັດ ຢູ່ແຂວງສຽມລຽບນຳອີກ.
