ຣັດເຊຍເຕືອນວ່າຈະຕອບໂຕ້ ມາດຕະການຂວ້ຳບາດຂອງອາເມລິກາ
ທ່ານ ເຊີເກ ລາຟຣອຟ ລັດຖະມົນຕີຕ່າງປະເທດຣັດເຊຍ ຖະແຫລງເຕືອນວ່າ: ຣັດເຊຍຈະດຳເນີນມາດຕະການຕອບໂຕ້ໃນລະດັບດຽວກັບທີ່ອາເມລິກາໃຊ້ມາດຕະການຂວ້ຳບາດຫລ້າສຸດກັບຣັດເຊຍ.
ທ່ານ ລາຟຣອຟ ໃຫ້ສຳພາດໜັງສືພິມປາບດາ ທີ່ຕີພິມໃນວັນທີ 28 ສິງຫານີ້ ເຊິ່ງຖືເປັນຄຳຖະແຫລງຫລ້າສຸດຂອງເຈົ້າໜ້າທີ່ຣັດເຊຍ ແລະ ບົ່ງບອກວ່າ: ຣັດເຊຍຈະໃຊ້ມາດຕະການຕອບໂຕ້ການຂວ້ຳບາດຂອງອາເມລິກາຕາມຂັ້ນຕອນ ແລະ ຂະບວນການໃນແບບດຽວກັບທີ່ອາເມລິກາໃຊ້ກັບຣັດເຊຍ. ຄຳສຳພາດດັ່ງກ່າວຍັງເຜີຍແຜ່ທາງເວັບໄຊກະຊວງຕ່າງປະເທດຣັດເຊຍນຳອີກ. ເຖິງຢ່າງໃດກໍຕາມ, ທ່ານ ລາຟຣອຟ ກ່າວວ່າ: ອີກດ້ານໜຶ່ງ ຣັດເຊຍຍັງເປີດກວ້າງໃນການສົ່ງເສີມການຮ່ວມມືກັນໃນລະດັບປົກກະຕິກັບລັດຖະບານອາເມລິກາຕາມຫລັກຜົນປະໂຫຍດຮ່ວມກັນ. ລັດຖະບານອາເມລິກາເລີ່ມໃຊ້ມາດຕະການຂວ້ຳບາດຮອບໃໝ່ກັບຣັດເຊຍໃນເດືອນນີ້ ຈາກຂໍ້ຫາວ່າພະຍາຍາມວາງຢາສັງຫານອະດີດສາຍລັບໃນອັງກິດ ທັງໃຊ້ວິທີລະງັບການຊ່ວຍເຫລືອຂອງຕ່າງປະເທດທີ່ມີກັບຣັດເຊຍ, ສະກັດຊ່ອງທາງໃນການຂາຍອາວຸດ ແລະ ລະບົບຄວາມໝັ້ນຄົງຂອງຣັດເຊຍ ແລະ ຫ້າມລັດຖະບານປະເທດຕ່າງໆຊ່ວຍເຫລືອຣັດເຊຍ.
