ສຕລ ກຽມຄັດເລືອກ U 19
ສະຫະພັນບານເຕະແຫ່ງຊາດລາວ (ສຕລ) ກຽມຄັດເລືອກນັກກິລາທີມຊາດຍິງ U 19 ລາວ ໃນວັນທີ 31 ສິງຫາ – 7 ກັນຍາ 2018 ທີ່ເດີ່ນ ສຕລ ເພື່ອເຂົ້າຮ່ວມການແຂ່ງຂັນບານເຕະຍິງຊີງແຊ້ມອາຊີ ຮຸ່ນອາຍຸ 19 ປີ ຮອບຄັດເລືອກ 2019 ຫລື AFC U-19 WOMEN’S CHAMPIONSHIP 2019 QUALIFIERS ROUND 1 ທີ່ປະເທດມຽນມາ ຈະຈັດຂຶ້ນໃນທ້າຍເດືອນຕຸລານີ້.
ທ່ານ ວົງມີໄຊ ສຸບົວຄໍາ ຄູຝຶກທີມຊາດ U 19 ລາວ ໃຫ້ສໍາພາດວ່າ: ໂດຍອີງຕາມແຜນການເຄື່ອນໄຫວຂອງ ສຕລ ປະຈຳປີ 2018. ດັ່ງນັ້ນ ຈຶ່ງຄັດເລືອກນັກກິລາທີ່ມີພອນສະຫວັນ ແລະ ທັກສະ ເພື່ອກະກຽມນັກກິລາທີມບານເຕະຍິງທີມຊາດລາວ ຮຸ່ນອາຍຸບໍ່ເກີນ 19 ປີ ເຂົ້າຮ່ວມການແຂ່ງຂັນບານເຕະຍິງຊີງແຊ້ມອາຊີ ຮຸ່ນອາຍຸ 19 ປີ ຮອບຄັດເລືອກ 2019 ຫລື AFC U-19 WOMEN’S CHAMPIONSHIP 2019 QUALIFIERS ROUND 1 ເຊິ່ງຈະໄດ້ຈັດຂຶ້ນໃນວັນທີ 24 ຫາ 28 ຕຸລາ 2018 ນີ້ ເຊິ່ງທີມຊາດລາວ ຢູ່ຮ່ວມກຸ່ມ F ປະກອບມີ: ມຽນມາ (ເຈົ້າພາບ), ອີຣານ ແລະ ປາແລັສຕິນ.
ສໍາລັບນັກກິລາຕ່າງແຂວງ ທາງ ສຕລ ມີບ່ອນໃຫ້ພັກ ຖ້ານັກກິລາຄົນໃດສົນໃຈສາມາດພົວພັນໄດ້ທີ່ຫ້ອງການເຕັກນິກຂອງ ສຕລ ຫລື ສາມາດສອບຖາມໄດ້ທີ່ເບີ 0305997118.
