ລາວປຶກສາລືການຄຸ້ມຄອງ ແລະ ກວດສອບສິນຄ້າຫຸ້ມຫໍ່ຜະລິດຕະພັນຊີມັງ
ສູນວັດແທກ ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມປຶກສາລືກ່ຽວກັບການຄຸ້ມຄອງ ແລະ ກວດສອບສິນຄ້າຫຸ້ມຫໍ່ຜະລິດຕະພັນຊີມັງ ໃນທ້າຍອາທິດຜ່ານມາ ໂດຍການເປັນປະທານຂອງທ່ານ ສຸກສະຫວາດ ສີຫາປັນຍາ ຮອງຫົວໜ້າກົມມາດຕະຖານ ແລະ ວັດແທກ ແລະ ບັນດາບໍລິສັດໂຮງງານຊີມັງທົ່ວປະເທດເຂົ້າຮ່ວມຢ່າງພ້ອມພຽງ.
ເພື່ອແນໃສ່ເຮັດໃຫ້ບັນດາຜູ້ປະກອບການ, ບໍລິສັດໂຮງງານຊີມັງໄດ້ຮັບຮູ້ ແລະ ເຂົ້າໃຈກ່ຽວກັບກົດໝາຍວັດແທກ, ຂໍ້ກໍານົດວ່າດ້ວຍການຄຸ້ມຄອງສິນຄ້າຫຸ້ມຫໍ່, ວິທີການກວດສອບສິນ ຄ້າຫຸ້ມຫໍ່ ແລະ ວິທີການຈັດຕັ້ງປະຕິບັດຕົວຈິງ ເພື່ອເຮັດໃຫ້ສິນຄ້າ ໂດຍສະ ເພາະແມ່ນຊີມັງໃຫ້ມີຄວາມຖືກຕ້ອງ, ຊັດເຈນທາງດ້ານປະລິມານຂອງສິນຄ້າ ທັງເປັນການປົກປ້ອງສິດຜົນປະໂຫຍດຂອງຜູ້ຊົມໃຊ້ບໍ່ໃຫ້ເອົາປຽບຜູ້ບໍລິໂພກທາງດ້ານປະລິມານ ເຮັດໃຫ້ສັງຄົມມີຄວາມຍຸຕິທໍາ, ເປັນເອກະພາບກັນໃນການຈັດຕັ້ງປະຕິບັດໃນຂອບເຂດທົ່ວປະເທດ ແລະ ສອດຄ່ອງກັບລະບຽບການຂອງບັນດາປະເທດສະມະຊິກໃນພາກພື້ນ ແລະ ສາກົນ.
