3 ເອັສດີ ມອບເງິນ 30 ລ້ານ ຊຸກຍູ້ U 12

ບໍລິສັດ 3 ເອັສດີພັດທະນາ ຈໍາກັດ ໄດ້ມອບເງິນສົດ 30 ລ້ານກີບ ໃຫ້ແກ່ນັກກິລາທີມຊາດລາວ U 12 ( KIETTISACK INTERNATIONAL SCHOOL BY LOB STADIUM) ໃນວັນທີ 23 ສິງຫາຜ່ານມາ ທີ່ສະໜາມກິລາຊ້າງ 2 ບ້ານຮ່ອງສຸພາບ ເມືອງໄຊເສດຖາ ນະຄອນຫລວງວຽງຈັນ ຕາງໜ້າມອບໂດຍທ່ານ ພອນປະເສີດ ອິນທະສອນ ປະທານບໍລິສັດ 3 ເອັສດີພັດທະນາຈໍາກັດ ແລະ ຕາງໜ້າຮັບໂດຍທ່ານ ອາລ໋ອບ ມະນີບົດ ປະທານອາຄາເດມີ ລ໋ອບສະເຕດ້ຽມ ທັງເປັນຄະນະຄູຝຶກນັກກິລາທີມຊາດລາວ U 12  ທີ່ຍາດໄດ້ແຊ້ມຊູງຊີງລີງຄັບ 2018 ທີ່ ສປ ຈີນ.

ທ່ານ ອາລ໋ອບ ມະນີບົດ ໄດ້ກ່າວວ່າ: ການແຂ່ງຂັນຄັ້ງຊູງຊີງລີງຄັບໄດ້ຈັດຂຶ້ນໃນທ້າຍອາທິດຜ່ານມາ ເຊິ່ງນັກກິລາຂອງພວກເຮົາສາມາດຍາດໄດ້ແຊ້ມລາຍການດັ່ງກ່າວມາຄອງ ແລະ ເປັນຄັ້ງທີ 2 ທີ່ພວກເຮົາໄດ້ເຂົ້າຮ່ວມການແຂ່ງຂັນລາຍການນີ້ ເຊິ່ງປີຜ່ານມາສາມາດຍາດໄດ້ພຽງອັນດັບທີ 3 ເທົ່ານັ້ນ ແຕ່ມາປີນີ້ພວກເຮົາສາມາດສ້າງຜົນງານຢ່າງໂດດເດັ່ນ ສິ່ງດັ່ງກ່າວເກີດຂຶ້ນໄດ້ຍ້ອນມີກໍາລັງໃຈຈາກຜູ້ປົກຄອງ ແລະ ຜູ້ສະໜັບສະໜູນຂອງບັນດາບໍລິສັດທັງພາກລັດ ແລະ ເອກກະຊົນ. ດັ່ງນັ້ນ ຕົນເອງໃນນາມຄະນະຄູຝຶກທີມຊາດ U 12 ຂໍຂອບໃຈມາຍັງບັນດາບໍລິສັດທີ່ໃຫ້ການສະໜັບສະໜູນຕະຫລອດມາ ໂດຍສະເພາະບໍລິສັດ 3 ເອັສດີພັດທະນາຈໍາກັດ ທີ່ໄດ້ມອບເງິນ 30 ລ້ານ ໃຫ້ແກ່ພວກເຮົາ.

ສໍາລັບການແຂ່ງຂັນຊູງຊີງລີງຄັບ 2018 ມີ 8 ປະເທດເຂົ້າຮ່ວມ ແບ່ງອອກເປັນ 2 ກຸ່ມຄື: ກຸ່ມເອ ປະກອບມີ ຈີນ,ອິນໂດເນເຊຍ, ກໍາປູເຈຍ, ຟີລິບປິນ; ສ່ວນກຸ່ມບີ ປະກອບມີ ລາວ, ມຽນມາ, ໄທ, ຫວຽດນາມ.