ທ່ານ ທຣຳ ເຕືອນ “ຫາຍະນະ” ຖ້າຖືກປົດຈຳຕຳແໜ່ງຜູ້ນຳອາເມລິກາ
ປະທານາທິບໍດີ ໂດນັລ ທຣຳ ກ່າວວ່າ: ຖ້າສະພາຄອງເກຣດມີມະຕິຖອດຖອນທ່ານອອກຈາກການເປັນຜູ້ນຳອາເມລິກາ ເສດຖະກິດໂລກຈະລົ້ມສະຫລາຍ ແລະ ປະຊາຊົນຈະ “ລຸກຮື້”.
“I don't know how you can impeach somebody who's done a great job. I tell you what, if I ever got impeached, I think the market would crash.” –President @realDonaldTrump pic.twitter.com/b22iGKE7iu
— FOX & friends (@foxandfriends) August 23, 2018
ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂດນັລ ທຣຳ ໃຫ້ສຳພາດພິເສດໃນລາຍການໂທລະພາບຂອງສະຖານີໂທລະພາບຟ໊ອກ ໃນວັນທີ 23 ສິງຫາວ່າ: ຖ້າສະພາຄອງເກຣດມີມະຕິຖອດຖອນທ່ານອອກຈາກຕຳແໜ່ງຜູ້ນຳອາເມລິກາ, ສະຖານະການດັ່ງກ່າວຈະນຳໄປສູ່ການລົ້ມສະຫລາຍຂອງຕະຫລາດໂລກ ແລະ ການເກີດ “ຄວາມວຸ້ນວາຍທາງການເມືອງ”. ທັງນີ້ ບົດບັນຍັດທີ 2 ມາດຕາ 4 ຂອງລັດຖະທຳມະນູນອາເມລິກາ ລະບຸວ່າ: ເຈົ້າໜ້າທີ່ລັດ ລວມທັງປະທານາທິບໍດີ ແລະ ຮອງປະທານາທິບໍດີ ອາດຖືກສະພາຄອງເກຣດລົງມະຕິຖອດຖອນ ໃນກໍລະນີເປັນກະບົດ, ສໍ້ໂກງ ແລະ ກະທຳຜິດທາງອາຊະຍາກຳ.
ເຖິງຢ່າງໃດກໍຕາມ, ມີຄວາມເປັນໄປໄດ້ໜ້ອຍທີ່ແກນນຳຂອງພັກລີພັບບລີກັນ ແລະ ພັກເດໂມແຄຣດຈະຫາລືກ່ຽວກັບການຖອດຖອນຜູ້ນຳອາເມລິກາໃນໄລຍະເວລານີ້ ເນື່ອງຈາກທຸກຝ່າຍກຳລັງໃຫ້ຄວາມສຳຄັນໃສ່ການຫາສຽງສຳລັບການເລືອກຕັ້ງກາງສະໄໝທີ່ຈະມີຂຶ້ນໃນວັນທີ 6 ພະຈິກນີ້ກ່ອນ ເຊິ່ງຈະເປັນການເລືອກຕັ້ງສະມາຊິກສະພາຜູ້ແທນລາສະດອນຊຸດໃໝ່ 435 ບ່ອນນັ່ງ, ສະມາຊິກວຸດທິສະພາ 35 ຈາກ 100 ບ່ອນນັ່ງ ແລະ ການແຂ່ງຂັນຊີງຕຳແໜ່ງເຈົ້າຄອງລັດໃນ 39 ລັດ.
